祝ご居酒屋 IwaiGo Izakaya：稱心滿「祝」

都好耐無同老婆食日本嘢，不過，老婆仍對日本海產有少少戒心，小弟就無特別話唔食，但亦唔會刻意去食，總之取個平衡，唔好走兩邊極端，故此，最好就喺去居酒屋，選擇夠多元化嘛。趁今日佢要出去返公司做數，就搵咗食友推介呢間居酒屋小店「祝ご居酒屋」。

一出電梯就喺餐廳，整個地方唔大，但環境裝修得極之和風，以深木色為主調，昏黃嘅燈光，以及周圍都擺放咗跟日本相關嘅物品，頗充滿日本風情，好有深夜食堂嘅感覺。

相信店主可能喺個模型迷，店內展示咗好多模型，尤其日系嘅超人，相信喺佢嘅珍藏。

而晌餐廳一角，更僻作一個榻榻米座位區，好適合5、6個朋友坐埋一齊嚟聚一聚，扮下去咗日本都得。

作為一家屋酒屋，食物選擇自然十分之多，餐牌以平板顯示，有酒肴（即喺伴酒小食）、超多款式串燒或燒物、刺身、炸物、料理、食事、甜品及飲品，不過，因為我哋兩個都唔好酒類，所以，酒類飲品就無影出嚟。

蟹肉玉子燒 $20
仲研究緊餐牌嘅時候，店員就送上前菜，賣相好精緻，咪睇佢外表好似平平無奇，其實面頭喺淋上鮮甜嘅蟹肉芡汁，而件玉子燒好有回彈力，入口軟綿綿，好濃嘅蛋香，有驚喜喎。

味醂魚乾 $52

雖然無嗌酒，都叫咗一客味醂魚乾嚟過下 口癮，大大片雞泡魚乾燒得金黃焦香，睇樣就非常吸引，切成一小條一小條，入口柔韌，帶點咬口感，加上用咗啲味醂調味，更芳香並帶點甜味，好食。

燒山藥 $38

山藥當然食過啦，不過以燒烤做法都應該喺第一次食，生藥燒過之後暖暖哋身，咬落非常之爽脆，而山藥本身有啲滑潺潺嘅汁液，令到個感覺非常有趣。因為灑咗少少黑椒粉、淮鹽調味，立時令到味寡嘅山藥變得不一樣。

燒帶子 $68
原粒帶子非常有睇頭，其實燒過後，粒帶子肉都仲喺咁大粒就知本身嘅尺寸有返咁上下。師傅知我哋兩個人享用，就已經將帶子肉切成兩小件，由於帶子夠厚身，所以，入口非常之彈牙爽口，而且，食落仲有陣陣牛油香味，兼非常之鮮甜，絕對喺新鮮貨色。

厚燒大根 $68

老婆一向好鍾意食蘿蔔，更不時晌家中自製蘿蔔糕，所以，專登叫呢個燒大根俾佢試一試。雖然只喺蘿蔔一件，但燒過之後嘅白蘿蔔，水份仍然保持，但食落蘿蔔味似乎更濃，又好清甜，再加上炸蒜、蔥粒帶出嘅惹味，有種好鮮明對比嘅衝擊感。

味噌牛什錦 $78
呢個牛什錦真喺超推介，佢喺是晚性價比最高嘅菜式，當中嘅牛雜包含有牛舌、牛肚、牛筋、牛腩，仲附有少少蘿蔔，幾樣嘢都好好食，當然牛舌就最啱我，老婆就好鍾意食牛筋同牛肚，而個味噌味香濃有層次，令每樣食材都好入味。

明太子茶漬飯 $78

臨尾都喺要叫啲食事嚟墊吓肚，叫咗一客茶漬飯，一整件燒飯糰加上明太子，再附上一壺熱茶，整體賣相非常之雅緻，倒入熱茶，令到個燒飯糰食落有啲脆口感之餘，又有啲好似食泡飯濕濕哋嘅感覺，鹹香嘅明太子令到整體味道添加咗幾分鹹鮮。

特色五目飯 $68
除咗茶漬飯，再追加多呢個五目飯，果然夠特色，雖然只喺一般嘅炒飯底，但面頭血橙色嘅蛋黃，一睇就知喺「蘭王」蛋，所以，蛋黃味極之濃郁，質感較為黏，仲有，初時以為蛋黃之下喺蛋白，錯晒，原來喺山藥搓成蓉，再將兩者跟炒飯混合一起加埋啲飯素，確實非常之好食。

櫻花奶凍（免費）

本來我哋都有打算叫返一客甜品作結，不過未嗌之前，店家就免費請我哋試咗一客奶凍，襯番近期櫻花季節，個奶凍就加入咗櫻花元素，單喺賣相睇見都已經賞心樂事。而底下奶凍部分做得幾挺身，卻香滑好重奶香，上層嘅啫喱裡面堅有櫻花，夾埋起嚟又確喺幾好食。

嚟居酒屋有樣好，樣樣細細份，就可以試到好多嘢，而且，逐樣叫，慢慢食，慢慢嘆，加上呢度環境好，有氣氛，店員招呼又好又燙貼，令到我哋成晚嘅用餐體驗都好稱心，加埋臨尾送贈嘅一客櫻花奶凍，令人更覺窩心！

個人評分
味道：9/10
環境：9/10
服務：9/10
抵食：8/10
平均每人消費：HK$273

餐廳資料：
祝ご居酒屋 IwaiGo Izakaya
地址：旺角彌敦道575號Ladder Dundas 5樓
電話：5281 9472 / 9880 4083