菊月町：「鮨」味無窮

約咗老表出嚟食飯，知道佢好鍾意食日本嘢，所以走遠少少過到嚟牛頭角嘅「菊月町」，因為在地嘅老友讚呢間嘢嘅性格比高，用料新鮮，製造用心。雖然隱身於牛頭角廠廈、商廈之中，但離地鐵站唔遠，都喺5分鐘左右步程，非常方便。

室內嘅環境裝修比較摩登，以深灰、黑色為主調，加上不同嘅聚焦燈效，確喺有種好型格嘅感覺。

由於餐廳可以講主打喺鐵板燒同廚師發辦，所以，L型板前席喺搶手位，一半喺食鐵板燒，另一半喺食廚師發板。除咗欣賞到師傅嘅手藝之外，更可以直接跟師傅交流。

而另一邊嘅散枱就比較適合4到6人坐埋一齊，方便有傾有講，嗌下唔同嘅散點菜式。好似今晚即使喺閒日，都坐到近乎坐無虛席，就可知餐廳嘅質素絕對有番咁上下。

除咗牆上掛起一啲好和風嘅擺設之外，喺唔同嘅位置仲擺咗一啲好趣緻嘅公仔，見有唔少客都專登走埋去打機張卡。

順帶一題，嚟食日本菜，每種餐具、盛器都會好靚、好骨子，值得再多欣賞一下。

上文都講過呢度主打喺鐵板燒同廚師發板，都有好幾款套餐俾客人選擇，此外，仲有唔同嘅散點選擇，例如刺身拼盤、丼飯，仲有啲漬物酒肴，依家仲加多咗吉列之類。

田園沙律

店員話每個客餐前都會送上醒胃嘅沙律，雖然只喺田園沙律，但都無求其，沙律菜好新鮮，入口爽脆，仲加咗啲柚子肉、車厘茄，淋上酸香嘅醋汁，酸酸咪咪食落好清爽開胃。

菊刺身 $338
食日本菜最賞心樂事嘅喺每道菜式嘅賣相都做得靚靚，尤其喺刺身，先試番一客刺身拼盤作為熱身先，「菊刺身」喺由師傅嚴選6款時令刺身，每款兩件，厚身而新鮮有光澤，再加上華麗雅致嘅擺盤，單喺賣相已經叫人興奮。而眼前所見嘅6款刺身包括帶子、鰤魚、深海池魚、牡丹蝦、中拖羅及馬糞海膽。

帶子

做得刺身嘅帶子一般都喺靚貨，因為，好易一食就食得出啲質素。白雪雪嘅帶子口感非常之柔嫩細緻，味道好鮮甜，喺極新鮮嘅感覺。

鰤魚
呢款魚雖然曾經食過，不過印度中都可能喺一次或兩次咁多，所以，認識唔深。魚肉晶瑩通透，喺新鮮度嘅明證，魚味足，又柔嫩，口感帶少許爽。

深海池魚

池魚喺食廚師發辦嘅常客，魚身同樣晶瑩，光澤亮麗，魚質嫩得嚟帶點點爽口感，魚鮮味頗突出，每件都切得幾厚身，食得夠爽。

牡丹蝦

唔單止大大隻，入口堅喺鮮甜到不得了，咬落先喺一陣陣爽口感，再細嚼喺牡丹蝦獨有嘅黏糯感。被頭都唔好錯過，因為內裡有好多蝦膏，好綿香。

中拖羅
色澤呈現一片嫩粉紅色，充滿油花之感，真喺睇上嚟好吸引。咬落魚味鮮得嚟有少少油脂香，唔過重，正呀！

馬糞海膽
海膽嘅色澤橙紅，非常之靚，唔會暗暗啞啞，放進口腔，豐腴之感一拼湧出，口感綿密細膩，仲有種甘甜嘅餘韻。

金銀海鮮丼 $258

餐牌就會標明用上以下嘅刺身入饌，包括赤身、油甘魚、季節魚、帶子、牡丹蝦、蔥碎拖羅蓉，不過，店員會話有時都會按貨源稍作調整，但有好無差嘅，加埋灑咗啲金箔及銀箔，自然變得矜貴好多。此外，呢道嘅芥末都喺由新鮮山葵研磨製作，丼飯標明用上日本米，除加咗赤醋，更加添唔少飯素，令其更具風味。

吉列豬扒定食 $168
吉列菜式一向大有捧場客，皆因炸嘢香口又滋味，大大件又厚切嘅豬扒炸得金黃乾身，睇落唔會油淋淋，咬落真喺好正，外層脆到咔咔聲，一啲都唔油膩，而肉質好軟腍。正所謂「工欲善其事，必先利其器」，食吉列豬扒都要有個好配搭，白芝麻俾你手動研磨，再加上自家製嘅醬汁，食出獨特風味；輕怡少少亦可以沾上自家製他他醬，更有種去膩之效。此外，日本椰菜切得幼細，淋上梅子酸汁，寧舍清爽，更有清新一下味蕾之效。

吉列原隻虎蝦 @$168
追加多一客吉列虎蝦，虎蝦都食得多，但成呎長嘅大虎蝦就比較少，嚟自馬來西亞嘅大虎蝦甫上枱真喺幾震撼，一身金黃外衣，未食都興奮。呢度嘅吉列真喺有一手，香脆不膩，甘香十足，而蝦肉非常之鮮味，口感彈牙；其實，本身已唔油膩，但再唧上少少檸檬汁，食起嚟更具清新感，蝦頭都唔好錯過，因為裡面仲有少少蝦膏，好甘腴。

今晚所食嘅菜式都喺用料新鮮上乘，師傅嘅功夫又紮實，侍應對每道菜嘅食材都好有認識，送到上枱時都會稍作介紹，再者，環境舒服，招呼熨貼，可謂走進一處美食快活「菊」，令我哋都食得好稱心。

個人評分
味道：9/10
環境：9/10
服務：9/10
抵食：9/10
平均每人消費：HK$600

餐廳資料：
菊月町
地址：觀塘鴻圖道23號利登中心地下1號舖
電話：6588 5354