金裝燉奶佬餐廳 Daniel's Restaurant：死佬下午茶

大大話話我諗都隔咗成年無出嚟踢過波，咁啱有場衛生足球，都喺圍內一班老友玩吓。雖然踢得輕輕鬆鬆，無乜競爭成分，但踢完都好攰吓，而補充體力嘅最佳方法就梗喺嘆個下午茶啦！

美孚呢間「燉奶佬」都好耐無幫襯過，因為對上一次嘅用餐體驗感覺麻麻，況且，美孚茶記選擇多。今次再幫襯都喺同行死佬提議，我就純粹食個下午茶餐，都無乜所謂。格局方面，咁多年都無變過。

下午茶餐嘅選擇，一張餐牌底面兩頁睇晒，輕盈型啲嘅可以揀西多士餐、三文治餐，大份量啲嘅可以揀啲炒粉飯麵、意粉焗飯餐。

二維碼落單，依家大家都熟晒呢個模式啦，唔使多講。

餐具、基本調味料整齊咁放晒喺枱側，自由取用。

雙拼三文治餐 $35
因為過幾個鐘就食晚飯，所以，揀份三文治餐就夠晒皮，最後揀咗午餐肉拼北海道3.6牛乳炒滑蛋。唔係講笑，睇相都見喺交足貨，首先塊餐肉唔會太薄，食得出唔喺平價嘢，而啲炒滑蛋一層搭一層，堅厚，咬落嫩滑有蛋香，就連塊麵包都喺厚身啲嗰一款，總之加兩蚊烘埋底啦。

熱奶茶

可能由於對杯熱奶茶無乜期望，所以，飲落比預期好，雖然未叫做絲咁滑，但喺至少個茶底夠醇香。

雖然簡單食份雙拼三文治，但夠足料，精神、力氣都返晒嚟。所以話呢，行完山，打完波，食個下午茶喺幾爽嘅事。

個人評分
味道：7/10
環境：7/10
服務：7/10
抵食：7/10
平均每人消費：HK$35

餐廳資料：
金裝燉奶佬餐廳 Daniel's Restaurant
地址：美孚美孚新邨第五期蘭芳街6A及6B號地下N21-22號舖
電話：2959 1126