Black Coffee：相聚一「黑」

上次出嚟旺角食飯時，經過見到呢間鋪面「暗黑」嘅餐廳，連名都唔見有，都有啲好奇架嘢。今晚又約咗老友聚舊食飯，因為就大家方便，就定晌旺角，結果想返起呢間餐廳，上網搵搵，原本喺間咖啡店，名叫「Black Coffee」，啱晒我啦。

踏進餐廳，一室以黑色或深灰色為主調，襯以水泥地，感覺都幾型格，加上樓底高，對外一邊又喺落地大玻璃窗，所以，整體空間感十足，予人感覺都幾舒服。

晌近門口餐廳嘅一角，仲有啲咖啡相關嘅產品，例如咖啡豆、咖啡杯作零售，有興趣嘅客人不妨選購一啲。

餐牌製作得好精美，同樣以黑色為背景色調，咁作為咖啡店，咖啡梗喺主打啦，一起首就介紹飲品先，除咗多款別具特色嘅咖啡之外，仲有雞尾酒、熱茶、手搖冰茶、果汁及其他特色飲品。

食物方面，類別就分為沙律、全日早餐、飯品、意大利麵、意大利飯、漢堡……等等。配搭都幾新派、幾有創意，所以，都話依家唔好睇少啲咖啡店，供應嘅食物非常之多元化。

此外，作為一間咖啡店，佢哋所提供嘅甜品款式亦算特別多，包括梳乎厘班戟、窩夫、法式千層酥及幾款特色甜點。

晌吧枱度仲番意到有張推廣到會套餐嘅餐牌，分6-8、10-12、20人以上，遲到聖誕、大除夕，啱晒搞派對時多個選擇。

餐廳備有小籃，俾客人擺放手袋、背包，咁樣就坐得更加舒服。

白桃手搖冰茶 $48

老友就對咖啡一般般，所以，揀咗呢個手搖冰茶，佢就話睇個賣相好清爽，入口茶底好清幽芳香，滲出陣陣白桃味，又無話太甜，可以講恰到好處，而跟一陣所食濃味嘅意大利飯，佢話好夾、襯到絕囉！

焦糖鮮奶咖啡 $44
唔使多講，我就梗喺飲鮮奶咖啡啦，呢個喺晌咖啡店嘅必然首選。睇見個拉花已經喺一件賞心樂事，拉花線紋細緻，表面好平滑，賣相就無乜挑剔位喇，而咖啡味道醇和，有果仁香氣，再滲出陣陣焦糖味，沖泡嘅手勢亦有一手，無攪過，飲落每一口都好均勻。

忌廉喇沙燴手製肉丸珍珠飯 $128

帶馬拉風味嘅喇沙喺小弟幾喜歡嘅味道之一，所以，就試一試下呢個珍珠飯。白飯之上灑上少少微辣嘅辣椒粉，再伴有少少沙律菜，令到賣相確精緻咗好多。啲手製肉丸幾鬆化，食落唔覺有太多肥肉，而啲忌廉喇沙汁好香濃，又滲出唔少香料味，用嚟撈飯真喺一流。

自家煙燻豬腩配黑啤意大利飯 $138
意大利飯一向喺可以試到師傅手勢嘅菜式，加上呢個又喺廚師推介，當然要試試佢啦。以一個小砵形式上枱，幾別緻，3片自家煙燻豬腩做得外觀吸引，入口外層有少少焦脆香，咬落鬆化，又無預期中咁油膩，而個黑啤意大利飯食落就唔會有酒味架喇，但飯粒口感煙韌有咬口，略帶微微甜味，加咗少少清爽嘅青蘋果粒，撈飯食，吊出陣陣清爽，好有畫龍點睛之效。

自家製青蘋果拖肥金寶醬日式疏乎厘班戟 $102

我哋就揀咗其中一款梳乎厘班戟作為飯後甜點，嚟到個班戟真喺震騰騰咁，淋滿晒拖肥醬汁，非常吸引。啲梳乎厘班戟做得好軟綿綿，空氣感強，微微濕潤，極有蛋香，單係襯啲拖肥醬已經好好味，再加埋烘焙過嘅青蘋果粒粒同埋鬆脆嘅金寶粒粒，真喺滋味三重奏。

餐廳嘅環境寫意舒服，而食物嘅設計有啲創意同心思，師傅煮嘢嘅手藝亦都唔錯，讓我哋今晚可以嘆返餐好嘅，仲輕輕鬆鬆傾咗成晚偈。

個人評分
味道：9/10
環境：8/10
服務：9/10
抵食：8/10
平均每人消費：HK$250

餐廳資料：
Black Coffee
地址：旺角廣華街3號地下3號舖
電話：2796 0082