添好運點心專門店 Tim Ho Wan：「運」身解數

有老友過開嚟中環搵小弟食晏，當然應約啦，就番佢方便泊車，行遠少少過到嚟香港站嘅「添好運」飲茶。午市超多人，但老友幫手等位，慳番我好多時間。不過安排入座方面，個阿姐態度、語氣確喺幾差！

環境唔講啦，晌鋪面一眼睇晒，簡單而言，就喺裝修簡約，企理光猛。

打開張點心紙，有咩食都列晒出嚟，蒸點、煎炸點、腸粉、粥粉、燉湯、小食、甜點……等等，而茗茶睇你揀咩而定，有傳統熱茶、特色熱茶及冷泡茶。啲招呼就基基本本啦，勝在又唔收加一。

酥皮焗叉燒包 $33

呢個喺招牌點心，目測所見，近乎枱枱都有嗌，我哋就當然都要試試啦。一客3個，個個都烘得金黃，外層一咬落去好鬆脆，包身好軟熟，而裡面嘅叉燒餡又多又好食，醬汁唔會過多而顯得太濕，又無乜肥豬肉喎。

黃沙豬潤腸 $32

飲茶食點心點可以無腸粉架，叉腸、蝦腸成日食啦，所以，揀咗豬潤腸，亦喺店家嘅推介之一。單睇外觀，外皮拉得薄，少少透到啲豬潤出嚟，腸粉入口好滑溜，但又唔會話好易斷，而啲豬潤份量唔少，又起晒沙，夠粉香，好食。

香滑馬拉糕 $28
點心中另一經典就喺馬拉糕，雖然唔喺話必食嘅點心，但我都好想食。睇到馬拉糕中嘅氣泡就知蒸得好鬆軟，食落果然唔錯，入口又好有黃糖嘅香味，當然，亦唔可以講有咩驚喜。

馬蹄土魷肉餅飯 $42

兩個麻甩佬梗喺要叫個蒸飯墊底啦，幾款蒸飯中 以呢一款最少機會食到。賣相可能你會覺得普普通通，但件肉餅確喺做得不俗，一來口感鬆化，唔會死死實實，二來加入土魷就令到個味道有陣陣海味香味，仲混有馬蹄粒，增加口感嘅層次，令到食落有啲爽口感，加埋軟熟有飯香嘅飯粒，大家都食到飽晒。

雖然都好多年無嚟「添好運」，但今次再幫襯，覺得啲質素都保持到，確係唔錯。喺一開始安排入座有啲混亂，招呼亦麻麻，講到食物，就無咩太多挑剔啦！

個人評分
味道：8/10
環境：7/10
服務：5/10
抵食：8/10
平均每人消費：HK$75

餐廳資料：
添好運點心專門店 Tim Ho Wan
地址：中環港鐵香港站1樓12A號舖
電話： 2332 3078