銀龍咖啡茶座：快閃午餐

幫手大型活動做車長，扶老携幼，幫手安排上落車嘅啫，其中一個點就喺嚟到鯉魚門食團餐。然而，因為座位所限，我哋有少部份人就需要另行安排午餐，其實晌海鮮街呢邊平平哋嘅選擇唔多 ，好似就喺得呢間「銀龍」，所以，簡簡單單喺度食餐晏。

環境一眼望晒，典型茶餐廳格局，不過，就幾乾鮮企理，地方整潔，嚟得茶幾都知無咩太多服務可言，不過啲阿姐都幾好禮貌，又幾好傾，而霎眼望埋去都可以講喺區外客。

呢度無乜飯餐碟頭之類，主要賣嘅都喺公仔麵、通粉，此外，所有嘢都喺散點，無話套餐、加配嘅組合，所以，計起嚟比出面茶記會貴咗一截。

雙拼通心粉 $31
睇嚟睇去都喺揀咗脆皮腸拼回鍋肉，因為都好耐無食過呢兩款食材，咪睇成碗通粉都紅噹噹，以為好辣，大家都知只喺罐回鍋肉嘅汁溝咗落去，所以，只喺微辣，但就幾惹味啲。老實講都喺啲現成嘢，所以，味道喺預期之內，最緊要啲通粉無過腍。

至尊奶茶王 $22

雖然改到個名都幾勁吓，不過，飲落又唔似預期咁犀利，查實個茶底都醇香嘅，口感都OK啦，但就唔會有咩驚喜感，個人覺得奶味偏重少少。

因為都唔喺專登嚟食，所以，亦無乜期望，質素只可以講不過不失，但與一般茶記相比，因為無套餐嘅關係，定價會令人覺得偏高。

個人評分
味道：7/10
環境：7/10
服務：7/10
抵食：7/10
平均每人消費：HK$51

餐廳資料：
銀龍咖啡茶座
地址：鯉魚門鯉魚門海傍道中31號地下B號舖
電話：2348 0711