土司工坊 Toast Box：「司」毫不趕

約咗太太嘅朋友嚟到「吐司工房」食晚飯，雖然我哋合共四個人兩對夫婦，不過，見對方都無影食物相嘅舉動，所以，都唔好意思喺咁影，只影番自己嘅喇沙，同後補少少環境相。

都好多年無幫襯過「土司工坊」喇，今次就貪呢度地方大，位置又鼠埋一角，食完都無人趕，可以慢慢傾。餐廳環境算連繫埋商場，不過亦間咗個範圍喺屬於餐廳，採開放形式，故此，感覺都幾闊落。

呢度採自助形式，點餐就要晌櫃枱落單，兩頁紙嘅餐牌，就印齊晒店家所有食物，全以套餐形式，一面喺主食類，即粉麵飯，另一面喺輕食類，即多士、麵包。

晌櫃面落單後，會俾個傳呼器你，等佢響就有得拎嘢食。

另外，餐具都要自己拎，自己招呼自己！

星洲海鮮叻沙+南洋咖啡 $74
個叻沙同餐牌張相就有啲距離，實物就無咁大份，，餸料亦似乎喺少咗啲，不過，叻沙湯嘅色澤就幾對辦，一片鮮橙色，但其實就唔喺好辣，卻喺非常之香濃。有鮮蝦、魚片、豆卜、半隻烚蛋及少量芽菜，質素屬於平穩咁啦；此外，麵底就唔喺糝糝嚟，只喺一般米線，掛起啲汁，都好味道嘅。

南洋咖啡
佢哋主打南洋咖啡，又分咩南洋咖啡O、南洋咖啡C，唔識唔緊要，餐盤墊就正正一文看清，其實，就只喺加花奶、加煉奶定唔加奶咁解。小弟就揀杯只加煉奶嘅南洋咖啡，佢哋好似拉茶咁「拉」咖啡，雖然非用花奶，一樣算喺幾醇香順滑，我本身一向都鍾意飲星馬啲白咖啡。

雖然簡單食餐飯，不過，我哋就坐咗好耐，天南地北無所不談。總結，「土司工坊」啲嘢食不過不失咁啦，真喺貪佢食完無人理，坐幾耐都得。

個人評分
味道：8/10
環境：7/10
服務：7/10
抵食：9/10
平均每人消費：HK$74

餐廳資料：
土司工坊 Toast Box
地址：青衣青敬路31-33號青衣城1 1樓128號舖
電話：2155 1771