元祖沾麵專門店 Ganso Tsukemen：滋味自是有「元」

今日專登出到嚟尖沙咀，因為有大型聚會，晌聚會之前就先約咗個老友一齊食咗晚飯先出席。原來老友未食過沾麵，就想起厚福街有間頗有人氣嘅沾麵小店「元祖沾麵專門店」，所以，就喺度嘆過熱焫焫石鍋嘅沾麵先。

鋪面細細，貼滿晒多款沾麵嘅照片，以吸引食客，驟眼睇都幾花多眼亂。入到鋪內，呈長型，很有和風麵店嘅感覺，睇唔出原來入到好深，主要都喺單邊面壁位或者 二人枱。未夠7:00pm，可以講喺9乘滿，過多陣已經「全院滿座」。

櫈底下有啲小藤籃，啱晒嚟放背囊啦。

另外，筷子、小量調味料架空咗放晌枱側嘅牆上。

除咗沾麵，佢哋仲有提供拉麵、飯品、多款小食，不過目測所見，絕大部分客人都喺揀沾麵，始終喺店家嘅主打，款式非常之多，不失專門店之名。沾麵嘅「湯底」主要喺豚肉魚介湯，但有部份款式可以加錢升級為赤海老湯、龍蝦湯或芝士海膽湯。

朋友都喺第一次食沾麵，如果唔喺好知點埋手，最好就睇睇餐廳提供享用方法嘅建議，我就唔多講喇，反正大家看圖識字、一文看清。

豚肉魚介沾麵 $89

平平哋試咗款豚肉魚介沾麵，裝住豚肉魚介沾汁嘅石鍋非常之熱焫焫，睇個沾汁起晒泡，出晒煙就知啦，沾汁內仲有好多豚肉角，此外，拉麵底仲有叉燒、竹筍、溏心蛋及紫菜，所以，非常豐富。

而個沾汁真喺好香濃，質感厚身好掛汁，麵條咬落夠煙韌，兼且份量超多；而啲叉燒唔肥，仲炙燒過，有份焦香，更好食，此外，隻溏心蛋亦都好正，筍乾又爽口。

極上芝士蟹皇沾麵 $148

朋友就試咗個加入蟹膏元素嘅沾麵，整體賣相好搶鏡，因為除咗一大碗麵條及配料、熱騰騰嘅沾汁 之外，仲有就喺一份芝士甲羅燒，搭上大量蟹籽，睇見都心郁郁。個沾汁裡面，原來唔止有豚肉角，仲有啲龍蝦肉，真喺意外嘅驚喜，食落，朋友仲話個汁似喺仲有啲龍蝦鮮味；而芝士、蟹膏、蟹籽用嚟撈落啲麵條度食，又別有一番風味。

睇見啲侍應捧住熱焫焫，又重揼揼嘅石鍋，都戥佢哋辛苦，埋單先發覺原來呢度唔收加一，真喺要俾要個讚佢哋！

總結一下，啲沾汁確喺做得有水準，而且，仲可以無限添加，而且，如果臨尾仲有剩沾汁，可以加啲木魚湯飲埋佢。此外麵條嘅份量真喺超多，男生食到飽一飽，何況女生，而啲配料亦做得有水準，個人覺得性價比真喺高。

個人評分
味道：8/10
環境：7/10
服務：8/10
抵食：9/10
平均每人消費：HK$119

餐廳資料：
元祖沾麵專門店 Ganso Tsukemen
地址：尖沙咀厚福街5-6號多富閣地下5號舖
電話：6799 9663