咖喱碼頭 Pier De Curry：「咖」日小聚

知道表哥退休後，有時無乜太多細藝，所以，今朝專登拉埋佢去行轉短山，帶佢由美孚一路行上馬騮山，兜個大圈再落返去荔枝角食晏，輕輕鬆鬆行一轉。落到嚟荔枝角，其實無太多心水，不過，咁啱晌大街經過呢間「咖哩碼頭」，主打一睇就知喺咖喱小店，又想試下。

晌鋪外已經睇到裏邊有幾大，數埋都喺10個位左右，座位五顏六色，感覺幾醒目，又有少少同碼頭相關嘅擺設，都幾得意。聽店員（定老闆？）講都喺新開無耐，主要都喺做附近工廠區外賣生意，所以，見唔少工友網上落咗單，轉頭過嚟攞。

嘢食方面，早餐或下午茶供應三文治、飛碟及雙拼湯粉麵，午市、晚市呢，主力就喺兩款咖喱嘅 碟頭飯，都喺以套餐形式，主食加飲品，飲品可以升級揀其他，亦有加配小食嘅選項。

此外，仲有好多款小食嘅選擇，不過，就唔包喺套餐內嘅選擇，想試就要另外散點喇！

飲品方面，一大個雪櫃睇曬，標明咗個價錢（散點價） ，而套餐嘅就包基本飲品，即喺$5、$7嗰啲，另外嗰啲可以加錢選配。我哋見只加$5，就試咗佢啲樽仔咖啡同奶茶。

咖喱燴牛面肉飯 $49

呢一款喺配南洋咖喱，色澤淺少少，食落有少少辣勁，亦都叫幾香，咖喱撈飯一向都喺好好食，無得點輸。睇落啲牛面肉都唔少，炆得都算幾鬆化，甚富肉香，仲有好多薯仔同甘筍，而白飯就寫住喺蕉葉蒸白飯，飯底下確喺有片蕉葉，雖然唔喺話好突出，不過，啲白飯夠晒軟熟。

日式漢堡扒滑蛋飯 $54

表哥就揀咗個日式蘋果咖喱，色澤比較深，嗒落唔辣，仲帶少少甜味，漢堡扒都幾大件、幾厚身，煎得外層焦脆，滑蛋睇樣都見到炒得好滑，蛋香十足，仲半有少少飯素，加埋咖喱，撈飯一流。

椒鹽竹輪卷 +$12
睇落唔貴就試吓，一串有5件，口感跟平常食嘅「獅子狗魚蛋」無乜特別，不過，多咗陣陣椒鹽味，當喺「加餸」都OK。

越南咖啡、泰式奶茶 +$5
呢兩款飲品都值得加錢試，我就試咗前者，咖啡味好香濃，滲出少許苦味，可能加咗煉奶去沖，所以有少少偏甜；表哥嘅奶茶就無試，但佢話茶底芳香，比港式嘅較甜，但都好好飲。

今餐雖然簡簡單單，但味道確喺唔錯，又可以支持吓啲小店。

個人評分
味道：8/10
環境：7/10
服務：8/10
抵食：8/10
平均每人消費：HK$60

餐廳資料：
咖喱碼頭 Pier De Curry
地址：荔枝角青山道479號地下1A號舖
電話：5136 9050