山區裡的走走趯趯: 湖越 Lake Vietnam：閒情歲「越」

2023年11月25日星期六

湖越 Lake Vietnam：閒情歲「越」

趁陽光普照，天氣又涼涼哋喎，跟老友踩單車，目的地入大美督，呢條線對我哋嚟講比較輕鬆，可以hea住踩。踩到入去，想搵個好地方嘆個好啲嘅下午茶，老友推介對住湖畔呢一間越南小餐館「湖越」，貪其環境好。單睇鋪門嘅設計，模擬到成隻木船，已經好有心思。

餐廳分為室內及室外位，先介紹室內，裝修比較精緻，以鮮黃色為主調，望上去比較醒目。而牆上黑白嘅畫作，四周嘅掛飾，都充滿越南色彩。

再嚟介紹吓室外，一排露天位，雖然拉起簷篷，絕對冚唔住嗰一份寫意，點點西斜嘅陽光，令帶涼意嘅秋風滲進點點溫暖，爽到爆；而兩張馬蹄形梳化位，既舒服，又可以對住個湖同一片樹林景，景致一流，好有渡假感，寫意到不得了。

露天位旁仲放咗張人力車，絕對喺打卡位，更可以話俾啲後生仔知咩喺人力車。香港就無乜機會坐喇，去越南旅行就仲可以試吓嘅。順帶一提，你見鋪外一大片空地，喺可以免費泊車，啱晒啲揸車人士入嚟嘆吓越菜。

檯面除咗餐具之外，仲放咗幾款越式越南特色醬料，自由取用，不過，辣醬呀呢類我哋就唔喺好食，所以未有試。

食物嘅選擇，先講講個餐牌，由封面到底，製作真喺好精美，成本雜誌咁：先有餐廳嘅介紹，跟住，有小食、湯粉、撈檬、越式法包、越式薄餅、米紙卷、蔬菜類、越式咖喱、特色主菜、海鮮類、越式火鍋、飯類……等等，飲品方面亦有唔少特色嘢，總之選擇非常之多元化。

煙三文魚牛油果米紙卷 $118
先嚟講米紙卷，一客有6大件，晶瑩薄透嘅米紙卷睇得到真材實料，捲住大大片鹹香油潤嘅三文魚，以及牛油果、甘筍絲、青瓜絲、生菜絲、米粉，加上啲米紙卷咬落去煙煙韌韌，所以，口感非非常之豐富，不論沾上魚露或自家製帶微微甜嘅醬汁，食落去感覺都非常之清爽、清新，又夠晒健康。

經典越南法包配薯條 $88
越式法包都喺越南菜嘅特色之一，咁作為下午茶就啱晒嚟「些牙」，落單時店員更專登問我哋需唔需要一開四，咁呢個當然最好啦，咁我哋就易啲食，唔使自己再切咁麻煩，更意外地喺仲將每一件搵紙、橡筋砸住，方便我哋拎嚟食。而法包入口外脆內軟，裡面包住厚厚嘅越南豬耳扎肉、大大量嘅雞絲，仲有酸青瓜同甘筍絲，確喺幾好食，而香脆嘅薯條自然喺增值位啦！

湖越牛魔火車頭 $108

餐牌中有一處介紹店家嘅七大湯粉，我哋覺得又喺唔可以錯過，所以，揀咗以店家命名嘅牛魔火車頭。單睇牌面都覺得非常豐富，包括有安格斯牛肉、牛丸、牛筋、牛柏葉同牛展，仲伴以白蘿蔔、洋蔥，加上辣椒碎、青檸、銀芽、蔥、九層塔作為佐料。而啲牛肉非常之嫩滑，牛丸彈牙，牛筋又夠腍滑，牛柏葉就好爽口，牛展亦炆得鬆化，啲河粉多到真喺可以夠兩至三人共享，令人食得非常滿足。