中間有一棟大趟門，可以將兩區分隔，較裡面嘅一區就可以間成私人廂房，讓一大棚人訂嚟搞吓私人派對都得。
介紹下散點嘅主餐牌先，分為前菜、主菜、甜品3個大類別，睇到選擇唔算話超多，正所謂務求貴精不貴多，單睇菜色嘅描述已覺得好精彩！
當然，喺香港地食套餐永遠喺最划算嘅，所以，店家提供一個5道菜嘅晚市Tasting Menu，包括前菜、兩道小主菜（Entrée）、主菜及甜品，定價$588，以中環地段，食嘅喺法國菜，呢個價算得上好抵。每道菜主廚都會介紹吓，講吓做法、用料，真喺獲益良多。
Foie Gras Terrine前菜先喺賣相好精緻嘅鵝肝撻，小小一件鵝肝以紫菜捲住，再加點紅莓蓉點綴，好似一件小壽司咁，底下仲墊咗少少蘋果蓉，所以，整體食味非常特別。主廚更介紹鵝肝批喺自家製，唔用現成貨，而鵝肝取自匈牙利鵝肝貨色，用上慢煮，跟住再 去咗層面油，然後壓縮成鵝肝批，怪不得入口口感細膩，氣味芳香。
Tomato Salad另一道前菜，單睇個名就好似無咩特別，但成品上枱，感覺就好唔同，以法國原種蕃茄入饌，顏色已經好特別，一黃一綠，估唔到咬落啲蕃茄喺咁甜；此外，佐以芝麻醬混入法國第戎芥末所做嘅醬汁，更提升蕃茄嘅鮮甜味，好有神來之筆嘅感覺。
Beef Tartare輪到小主菜登場，原餐牌喺澳洲M4和牛，今晚就改為美國Prime級嘅安格斯牛，更採用油花分佈較均勻嘅牛柳，砌成圓塔形，好立體，再晌面面加隻鵪鶉蛋，配法式炸麵包片，份外好睇。牛肉他他切得唔會話太平，保持嗰種口感，肉質柔嫩，加上始終用咗高級別貨色，質素一定有保證。事後主廚過嚟分享，啲牛揀咗草飼牛，天然放牧，運動量多，比起穀飼牛肉質相對結實，肉味更濃，真喺長知識。
Prawn Tartare另一道冷食嘅小主菜同樣喺「他他」，不過就用上法國嘅水晶蝦，主廚分享靈感來自泰式生蝦，賣相非常漂亮，更以自家製他他醬調和，味道酸活，蝦肉食落去質感較黏身，有啲似西班牙紅蝦，但味道同樣鮮甜，搭埋一片脆口到不得了嘅傳統法式炸麵包片，真喺好唔錯。
Egg Bomb
Soup of the Day是日湯品就喺蕃茄湯，當然，蕃茄湯落到大廚手中層次會唔同晒，蕃茄味唔單止非常濃香，質感柔順，唔會太稀，味道酸酸甜甜，令人飲落好醒胃，幾有驚喜，好襯一陣間所食嘅兩到濃味嘅主菜。
Steak主菜3揀1，有龍蝦、牛扒、鴨脾，我哋都鍾意食肉多啲，所以揀咗後兩者。安格斯Prime級嘅牛柳，要5成熟，主廚晌鐵板枱度處理，不時火光熊熊，甚具玩味，然而，件牛柳真喺煎得有一手，外層焦脆，內裡色澤嫩粉紅，卻無半點血水，恰到好處，入口軟腍好食，極富肉香；佐以搵牛肉汁再加麵豉、原粒黑椒做嘅醬汁，實在相得益彰，並伴以甘筍仔、紅椒、黃椒、忌廉焗薯，好滿足。
Duck油封鴨脾喺好經典嘅法國菜，配上蘋果蓉、烔蘋果片、露筍仔及忌廉焗薯，外觀吸引。鴨脾煎到肉質好嫩滑，又甚具油香，外皮卻非常之甘脆；蘋果蓉專登加入青蘋果嚟做，令到味道多一層酸香鮮活感，更加能夠中和油封鴨嘅油膩。另外個忌廉烔薯千層又喺較多手工，好似千層麵嘅做法一層薯仔片搭一陣薯仔片，中間加入忌廉，壓實佢再烔，份外有薯香，又有一份忌廉嘅柔滑感。
Creme Brulee法式燉蛋又喺法國菜嘅另一經典，不過，做法有別於以往，平時會有個瓦杯裝起啲燉蛋，再做層焦糖上面，但今次所見，喺完全「拆殼」；另外，用上日本「蘭王」蛋，睇上去色澤亦比較深；此外唔喺主廚講真喺無可能知，當中用嘅奶唔係就咁用，而喺將奶做咗個滴漏嘅過程，令到奶味更加強勁，怪唔之得咁重奶味，卻不失蛋香，仲加埋忌廉，提升個柔滑度，可以講喺完美結束。
今次晚餐，由環境、食物到服務，都無咩挑剔位，雖然喺食法國菜，但又有種好似食日本菜「廚師發辦」咁，同主廚又有不少交流，喺一次非常有趣嘅用餐體驗。餐廳位處蘭桂坊上街一截，相對比較靜，唔及下面大街咁人氣，其實，佢卻喺卧虎藏龍。
個人評分
味道：9/10
環境：8/10
服務：9/10
抵食：9/10
平均每人消費：HK$647
味道：9/10
環境：8/10
服務：9/10
抵食：9/10
平均每人消費：HK$647
餐廳資料：
季 La Saison Restaurant & Bistro
地址：中環蘭桂坊15-16號協興大廈5樓
電話：2116 4639
季 La Saison Restaurant & Bistro
地址：中環蘭桂坊15-16號協興大廈5樓
電話：2116 4639
沒有留言:
發佈留言