餓媽家姐：搵食「餓」底

早前去過厚福街嘅「元祖沾麵專門店 」食沾麵時，偶然見到呢間「餓媽家姐」，睇佢買啲嘢都幾特別，所以，趁今晚得一支公過嚟尖沙咀，就嚟到呢度快閃食個漢堡包餐。

喺門口都已經一眼睇晒成間舖咩環境，主打外賣嘅小店，不過，有少少立食位置，而鋪面、牆上就貼滿晒餐牌同啲食物相。

驟眼睇，應該喺主打港日美式新派嘢食，花少少時間研究一下，食物嘅種類包括：餓媽小食、炸燒賣系列、炒腸粉皇系列、炸物系列、沙律系列、烏冬系列、便當系列，以及手工漢堡系列、酸種包貝高系列，選擇都幾多樣化。聽店員講，最人氣喺啲炸燒賣系列，因為有成14款醬咁多俾人揀，此外炒腸粉同手工漢堡亦有唔少人捧場，更強調全部即叫即做，故製作需時，要耐心等等喔！

芝士菠蘿安格斯牛堡 $64
本來想食炒腸粉，不過，無加配嘅套餐選項，另外又見啲手工漢堡幾吸引，所以，改咗食漢堡。講得喺手工就因為喺100%手打，又用埋竹炭包，賣相更有型。果然用料好十足，安格斯牛肉漢堡好大件，非常厚身，煎得焦香，肉味濃郁，又甚富肉汁，不愧為安格斯；厚厚嘅菠蘿輕煎過，酸酸甜甜嘅香味正好平衡番牛肉嘅濃味，仲夾有蕃茄、青瓜、生菜以及半溶鹹香嘅芝士，味道豐富，確喺非常好食。

日式紫薯甘栗薯餅+檸檬茶 +$22

升級為套餐就揀咗呢個薯餅，可以講喺咁多款小食當中最心水嘅一款，啲薯餅炸得甘脆，咬落去咔嚓聲咁響，但又唔會好油膩，而裡面夾有唔少紫薯蓉，口感非常之綿滑粉香，並混有細細粒嘅 栗子粒，添加多一份粒粒口感度，十分搭配。

作為香港人，一定對腸粉唔陌生，布拉腸粉、潮式皺皮腸粉、煎腸粉、炒腸粉，各式其色。店員話佢哋啲炒腸粉可以講喺全港必食推介，下次有機會真喺要試試先。

個人評分

味道：9/10
環境：7/10
服務：8/10
抵食：8/10
平均每人消費：HK$86

餐廳資料：
餓媽家姐
地址：尖沙咀加拿芬道45-47號宏生大廈地下D2號舖
電話：6606 0313