先介紹吓呢度嘅玩法，以往好多雞煲火鍋，都喺先食個雞煲，跟住加水打鞭爐，但呢度就升幾級，先喺有3款煲任食（雞煲、鴛鴦鴨煲、豬手煲），之後，揀個湯底打鞭爐。先俾個價錢牌大家睇睇，有3個價位：$218、$258、$318，大家食開都知，唔同價位在乎指定嘅選項多少、質素多高，其他放晌自助區嘅火鍋料就任攞任食，大前提就喺唔好嘥嘢啦。我哋揀「特級極上和牛」，一來肉類選項多，又送多份澳洲M6和牛，二來就喺無限時，食到打烊都得，但溫提一聲，無限時限於星期日至四。
火焰鴛鴦鴨煲 先嚟鴨煲，食住再慢慢研究啲火鍋料。鴨煲上枱，香氣四溢，店員會為你兜炒一吓，再加入玫瑰露，點火，火焰四竄，夠睇頭，聞到陣陣酒香，極有視覺效果。店員都好醒目，見我哋兩個人，鴨煲喺半份，唔會一個煲撑飽晒我哋。
何謂鴛鴦鴨？絕對唔喺鴛鴦同鴨啦，喺鮮鴨同臘鴨，前者肉質鮮嫩，帶點鴨羶香，後者口感有咬口，帶點油脂香，喺好兩極嘅感覺，而個汁底好惹味，揀咗微辣，易接受，仲有微微花椒香，真喺正呀。此外，仲有好多枝竹同洋蔥，嗦晒啲汁就更好味！
點餐就以二維碼落單，方便快捷，又可以睇番點過乜，自己有無點錯或點漏，基本上，整晚嘅落單都無乜錯漏。食完個鴛鴦鴨煲，初時都有諗過再試埋個黑椒豬手煲，但唔計出面食物區自取任食部份，單喺透過二維碼落單嘅肉類同海鮮都非常之多，根本都試唔晒。順帶一提，落單時小心啲，因為後幾頁又啲食物喺單點，需另外加錢。
自取醬料區未落下一部份火鍋之前，簡單介紹吓出面自取嘅食物區，先喺醬料，長長一排嘅火鍋醬料有：乾蒜、豆瓣醬、乾蔥、沙嗲醬、辣椒、蒜蓉、青蔥、芫荽、豉油，咁冚住蓋嘅仲有炸響鈴、炸魚皮，上面仲有出前一丁同啲韓國拉麵。小弟就唔喜歡太雜，「求求其其」金銀蒜、蔥花、醬油就夠晒！
自取火鍋料一排過雪櫃內有各式各樣嘅丸類、餃子、腸類、牛柏葉、土魷、豬皮、豆品類、午餐肉、蟹棒、燒賣、多款菇菌、蔬菜，以及年糕，全部都有晒名牌，都唔會唔知食咗咩，數一數都超過成50款，我哋都有揀少少嚟食。
自取飲品區既然喺任食任飲，介紹埋有咩飲品先，詳細就唔講喇，總之有汽水、有涼茶、有啤酒、有果汁，五花八門，梗有幾款啱你飲，而且，補貨都非常快。
老友好懷舊，揀咗罐沙士同蘆薈，小弟就先嚟罐清爽嘅馬蹄爽，襯番個鴛鴦鴨煲，都好耐無飲過呢類嘢，再加罐芒果汁打底，因為真喺幾鍾意芒果系飲品，其實仲蛹番啲鴻福堂涼茶解解燥熱先。
胡椒豬肚雞鍋打鞭爐嘅湯底共有9款，雖然，唔喺咩奇奇怪怪嘅新款嘢，都喺見慣見熟嘅較傳統嘅款式，就好似我哋所揀嘅「胡椒豬肚雞鍋」，飲得出真材實料，奶白色嘅湯底，滲出芳香卻唔霸道嘅胡椒香，加上以雞入饌，湯頭多一份清甜，撈一撈，交足貨。
澳洲M6和牛 二話不說，未落單，先跟湯底一齊送上一客澳洲M6和牛，啲色澤真喺好靚，色澤紅潤，油花分佈平均，片片切得夠薄，輕輕灼十數秒就夠，入口真喺脂香滿溢，肉質嫩滑得緊要，老友都大讚超好食。
滿心「肉」望 我哋都算喺食飲獸，所以，第一輪自己點嘅嘢都喺以肉為先，包括頂級安格斯牛、黑安格斯牛頸脊、美國SRF極黑和牛、安格斯牛小腓，最鍾意店家睇住人數供應，每樣食材唔多，兩、三件咁，所以，正正等我哋可以試到更多款式。
今次同樣唔逐樣逐樣寫喇，因為真喺有啲難度，因為有時高質素嘅肉差別都好微，高下難分，但睇相，你都見啲牛都喺靚料嚟，尤其啲和牛，夠紅潤，紋理靚，有光澤，油脂平均，所以，灼幾灼就入口，有需要就沾少少醬料，質素都無咩挑剔。
拉「雜」成軍呢一轉就食番啲唔同嘅食材，由老友發辦，佢晌凍櫃執乜我就食乜，執吓執吓執咗兩兜仔，包括炸響鈴、炸魚皮、潮州魚蛋、豬肉丸、午餐肉、辣椒腸、雞肉腸、鮮枝竹、炸枝竹、蟹棒。
明顯都唔喺咩貴嘢，志在過吓口癮，尤其響鈴、魚皮，就喺必然之選，不過，辣椒腸（即喺平常食自助餐嘅凍切腸）打鞭爐都喺第一次，老友講笑咁講，加個韓國拉麵仲唔喺變成部隊鍋，哈哈！
食咗兩輪，都喺時候加番啲湯，加湯唔喺加水架，真喺放番啲上湯，夠誠意呀！
「肉」罷不能 食完第一輪4款肉，當然未夠喉啦，再下一城試另外4款，包括安格斯牛板腱、安格斯封門柳、本地鮮滑牛、紐西蘭羊卷肉，因為仲要預食海鮮、蔬菜，所以，都唔敢一次點太多，豚肉、雞肉都未有叫。
同樣，4款肉都好靚仔，牛板腱、封門柳之前都食過，知道喺靚部位嚟，所以，今次當然都唔可以錯過，果然，食落就知質素非常高。都想特別一提，好多肉類都喺「來路貨」，但本地鮮滑牛認真唔輸蝕，口感堅嫩滑。
民以食為「鮮」 喺時候都輪到試吓啲海鮮，唔介意可以加錢額外點啲珍寶虎蝦、廣島蠔、鮑魚嘆吓，不過，我哋啲「孤寒鬼」就梗喺揀任食嗰啲啦，一口氣點咗8款：脆肉鯇魚、白鱔片、吊筒仔、活海蝦、帆立貝、活海蜆、花枝片、墨魚滑。其實，睇外觀，啲海鮮都幾新鮮，有光澤，無話暗暗啞啞，而咁多樣嘢之中，基本上質素有番咁上下，脆肉鯇魚、吊筒仔、活海蝦、花枝片、墨魚滑呢幾樣喺小弟心水推介，喺可以翻點再翻點嘅食材。
一「素」而空近尾聲，都喺時候補番啲纖維質，一大份蔬菜拼盤由老友負責，佢話對住近廿款蔬菜，都喺求其執，我就一向隨遇而安嘅，揀咗娃娃菜、金菇、白菜仔、生菜、鮮冬菇及南瓜，前段食咗咁多肉，志在搵啲蔬菜嚟平均番吓，減低滿腹罪惡感而已。
甜品 食到九乘半飽，最後，自不然以甜品作結，並填埋嗰半乘位啦。晌醬料區側邊，放咗一大個雪糕櫃，有雪糕，有雪條，食完火鍋，再食番啲冰凍嘅雪糕、雪條感覺就特別爽。小弟一向喺甜品鐵粉，所以，一口氣就揀咗4樣嘢埋位慢慢食，分別喺榴槤雪條、紅豆雪條、沖繩海鹽雪糕、芒果雪糕。以榴槤雪條覺得最正，濃郁嘅榴槤味，雪條質感好軟滑，另外，沖繩海鹽雪糕就第一次食，打開蓋，原來喺咁藍，鹹鹹哋，又好重奶味，都OK喎！
今餐非常滿足，因為試咗好多嘢，當然，最心水人腳最好就喺4-6人，因為夠食力試齊3款煲之餘，再試得多啲其他火鍋配料，不過，今晚試到個鴨煲都好稱心，而各款肉類都好掂，其他食材都好唔錯，加上啲招呼又好，上火鍋料好快手，又不時過嚟收碟、添湯。
個人評分
味道：9/10
環境：8/10
服務：9/10
抵食：8/10
平均每人消費：HK$350
味道：9/10
環境：8/10
服務：9/10
抵食：8/10
平均每人消費：HK$350
餐廳資料：
二鍋頭
地址：尖沙咀漆咸道南53-55號嘉芙中心1樓
電話：3590 5650
二鍋頭
地址：尖沙咀漆咸道南53-55號嘉芙中心1樓
電話：3590 5650
沒有留言:
發佈留言