山區裡的走走趯趯: 深仔記茶餐廳 Shan Chai Kee Restaurant：「深」水推介

2022年9月6日星期二

深仔記茶餐廳 Shan Chai Kee Restaurant：「深」水推介

今晚屋企無飯開，捉咗個老友陪小弟食番餐，兩個麻甩佬，都喺去茶記「浪漫」吓，之不過，老友對食都頗有要求，唔喺「求求其其」一間茶記佢都OK，想喺有啲特色，或有啲賣點，我話尖沙咀嘅「深仔記」啦，前「澳牛」大廚坐鎮，出名喺啲炒滑蛋，又有煲仔飯、懷舊鐵板餐。

餐廳嘅環境都幾大、幾闊落，一室木系裝修襯番木地板，天花又加「綠化」，裝修摩登得嚟帶點小清新。我哋剛好遇到有客離開，可以掗到個窗口卡位，啲卡位非常寬敞，雖然外面只喺街景，「夜媽媽」亦無嘢好睇，但勝在感覺會開揚啲。

雖然室內嘅裝修無咩大玩懷舊元素，但門口傳統造型嘅霓虹招牌，同啲舊式鐵皮拉閘，都喺茶記嘅標誌，依家呢類嘢已賣少見少，過多十年八載，可能要晌啲片先睇得番。

而枱面只放咗少少調味料，各樣餐具就如大多數茶記咁，放晒晌側旁嘅拉櫃中，自由取用，唔使煩住啲侍應，呢啲都成為茶記嘅指定設定。

一如茶記特色，食物選擇包羅萬有，早餐、下午茶餐、常餐、湯粉麵、炒粉麵、秘製咖喱、家常小菜、招牌蔥花滑蛋飯系列、鐵板餐……等等，專登掃描張外賣紙，就一目了然。

此外，仲有是日靚快餐，夾晌餐牌嘅第一頁，有晒日期，明顯就喺個個星期都會轉款嘅午餐同晚餐選項，包是日例湯及基本餐飲，目測喺唔少客人嘅心水。

另外，餐牌最底一頁，亦夾有似乎只有亞士厘道分先有嘅煲仔飯系列，跟是日例湯，飲品就需另外加錢，但定價都算抵。

除餐牌上列出嘅特飲之外，晌枱面，仲有啲夏日推介嘅特飲，好本土，亦可以跟餐加配。

招牌蔥花滑蛋三拼飯 $60

雙拼同三拼一樣價錢，無乜理由唔揀三拼，三拼有齊蝦仁、叉燒、牛肉，啱晒貪心嘅人。整碟飯好大堆頭，睇都睇到份量有幾足，餸料有幾多，淋上豉油，絕無欺場。蝦仁好鮮爽，叉燒鬆化，牛肉軟腍，炒蛋滿有蛋香，唯一挑剔位喺炒得有丁點過火，部份滑，部份已經變成煎蛋皮咁，但整體仍然好食。

美國肉眼牛扒鐵板餐 $88

老友話想懷舊吓，就揀咗鐵板餐，另一個原因喺，有特色忌廉湯，有扒鋸，都喺賣$88，感覺好抵。的確，份扒餐堅抵，先講個湯，就算喺素翅，但加埋啲鮑魚絲，一定比普通嘅「白湯」高檔次啲啦；再睇份扒，無10oz，咁大件都一定足8oz啦，煎得外層焦脆，肉質軟腍，既有肉香，又富肉汁，配黑椒汁，好惹味；仲有驚喜位喺扒蕃茄仲要加芝士，連皮嘅薯角炸得香脆不膩，夠晒誠意。