而餐牌，亦即喺點菜紙，打開一睇，真喺選擇多多，類別五花八門，海鮮呀、雞牛豬、蔬菜、丸類、餃類、甜品……一應俱全，兼有少少主食，一時間真喺花多眼亂。除各式各樣嘅串燒之外，仲加咗多款麻辣嘅菜式，搞搞新意思。
另外一張喺飲品餐牌，底面兩頁，有多款日本清酒、紅白餐酒、生啤、手工啤、及多種非酒精飲品……等等。
枱上有一罌孜然粉，一罌辣粉，其實，大部份串燒都已有調味，所以，基本上都唔使點用，除非你喺食得好重口味嘅人。
可樂 $18、青檸梳打 $38、自家製冰糖雪耳雪梨水 $32 打鞭爐同食串燒一樣，點都要搵啲冰凍嘅飲品嚟先夠搭配。小弟就揀咗青檸梳打，入口冰涼清爽，夾川菜或熱焫焫串燒，感覺寧舍過癮，夠大杯，夠頂晒成晚食串燒時段。而其中一位老友揀自家製雪梨水，佢讚潤心潤肺。
燒香甜車厘茄煙肉卷 $29、燒手切雞腎串 $32、海鹽燒皇牌牛舌 $49、鹽燒穀飼三層肉 $39 先登場喺4款串燒，呢度特別在以熱石板擺放串燒，保持溫度，不會咁易攤凍晒。不過，我哋都醒，分幾次嚟點，所以，次次都嘆到熱焫焫嘅串燒。
以前晌其他串燒店都食過，好推薦呢款菜式作「頭盤」，因為香甜嘅車厘茄勁爆汁，有份清爽感，搭油香嘅煙肉，真喺好夾，百吃不厭。
雞腎本常都喺食滷水嘅多，做串燒我自己就比較少食。啲雞腎灑咗好多孜然粉，非常惹味，而入口爽爽哋，真喺幾唔錯。
牛舌喺小弟另一推介，因為確喺幾有質素，入口軟腍，卻又有份柔韌感，加上牛舌獨特嘅羶香味，喜歡牛舌嘅朋友真喺唔好錯過。
為咗食，就將膽固醇拋諸腦後，三層肉應該即喺啲五花腩，睇相都清楚肥瘦相間，但肥肉部份都唔少嘢，不過，入口又無想像中咁肥、咁油膩，充滿油香，惹味香口。
麻辣四姊妹 $88老友都有興趣試啲川菜，小弟唔嗜辣，但今晚難得一聚，真喺捨命陪老友。四姊妹即喺蓮藕、淮山、萵筍、雲耳，以有型格嘅鐘板奉上，下面仲放有蠟燭熱住，長時間保持一定溫度。各款蔬菜有唔同口感，麻辣方面就叫店員幫幫忙做個微辣版，但一樣好有辣勁，而且，帶點點甜味，老友食得滋味。
喜聚麻辣滋補鮮烏雞（半隻）$198 既然啲麻辣幾啱食，再下一城，試埋烏雞，同樣以鐵板上，半隻嘅份量都唔少。鮮烏雞夠滋補當然喺好嘢嚟，最緊要喺啲雞肉入口都夠嫩滑，麻辣都喺揀番微辣啦，雖然都喺辣勁十足，且散發出重重花椒嘅麻，但點到即止，唔會好嗆喉，半隻份量，兩、三人食就啱啱好，而老友就過足麻辣癮。
燒蟶子皇 $78、燒珍寶大扇貝 $78、燒貴妃蚌 $68跟住，豪一豪各自揀款海鮮試吓，啲海鮮睇落好新鮮，好靚仔，趁上枱時熱辣辣，先試為快。
小弟揀咗蟶子皇，我就覺得喺3款海鮮中性價比最高，好大隻又好新鮮，師傅烤得剛剛好，令蟶子肉剛熟而唔靭，入口則充滿蒜香。
大扇貝雖無預期咁「珍寶」，但都算大隻、厚肉，但老友就大讚夠鮮、夠甜，而且，肉質好彈牙，配上大量蒜蓉同粉絲，正呀喂！
反而貴妃蚌比想像中大隻，有半隻手掌大，好有睇頭，望落去又有光澤，入口口感軟腍，而且，無話咬到沙粒之類，處理得宜，帶淡淡嘅海水鹹鮮味，仲有，唔好錯過留晌殼上嘅「湯汁」。
燒韭菜 $20、燒雞肉串 $28 之後，就喺主攻燒蔬菜，不過，都整多串雞肉先，而燒韭菜以前食串燒時都經常會點，所以，推介俾啲老友試試。
雞肉串可以揀沙嗲或BBQ，我哋揀咗後者，相信揀邊款都咁惹味。啲雞肉燒到有焦脆感，然而，咬落卻喺好腍滑，好正。
韭菜就燒到好軟身，但入口就有種柔韌感，加上灑上大量孜然粉，令其更有獨特風味。
燒日本一口甜薯 $24、燒芝士翠玉瓜 $24、海鹽燒法國鮮蘆筍 $32最後一輪串燒，喺3款蔬菜登場，啲日本甜薯細細粒，方便食，入口口感夠晒粉，甜度非常高，喺我嘅心水項目；翠玉瓜本身平平無奇，平時用嚟炒菜多，做串燒其實幾好食，爽口、多汁，今次加埋溶透嘅芝士，添上一份鹹香味；燒露筍一客只有一支，所以，確喺幾貴架，但老友想試，就無所謂啦，露筍已經切成一小件，簡單灑咗少少鹽嚟燒，質感清爽，鮮嫩得入口無渣。
燒玉桂焦糖金菠蘿 $38 壓軸登場喺燒菠蘿，既喺「飯後果」，又喺甜品。燒過嘅菠蘿會特別好食，因為燒得好手勢嘅，外表會有一層焦香感，而燒過之後收收水，菠蘿味會更濃郁、更清甜，喺唔好錯過嘅飯後之選。
今晚同老友一聚，唔知下次又喺幾時，不過，今晚都夠盡興，食咗多款好嘢，大部份都喺有質素嘅，就連咀刁嘅老友都認同。整體服務又唔錯，上串燒嘅速度唔會太急，讓客人可以慢慢嘆，邊食邊傾，愉快嘅時光特別快過。
個人評分
味道：9/10
環境：8/10
服務：8/10
抵食：8/10
平均每人消費：HK$370
味道：9/10
環境：8/10
服務：8/10
抵食：8/10
平均每人消費：HK$370
喜聚燒 Happy Circle Q
地址：尖沙咀寶勒巷10號10 Prat 8樓
電話：6625 7568
地址：尖沙咀寶勒巷10號10 Prat 8樓
電話：6625 7568
沒有留言:
發佈留言