賞島咖啡屋 The Pal Isle：先「島」為快

講起「花園街」，可能好多人諗起有好多小販檔，好平民，有好多平嘢賣，其實，如果熟太子嘅話，就知隔住「太子道西」另一邊嘅「花園街」，就靜好多，仲有好多車房，夜晚嚟更顯的寧靜。今晚，老婆有聚會，一支公嚟到「賞島咖啡屋」嘆吓「一個人的咖啡」，原來間店新開無耐，先睹為快。

湖水綠嘅門面，吊咗少少盆栽，放咗張小木櫈，完全有晒文青元素。

窄窄嘅門面，其實入到去鋪形都喺窄長，不過，個鋪位都幾深吓。近門口喺水吧，一切咖啡及各類飲品都喺呢度製作；而再入啲，就會見到開放式廚房。由於是夜客人唔多，感覺寧靜舒服。

一室以白色為主調，配以柔和嘅燈光，部份餐枱以雲石為材料，但我就喜歡木餐枱多啲喇。

作為咖啡店，總會有啲跟咖啡相關嘅擺設，例如大門嘅門柄，枱上嘅咖啡豆，感覺都幾得意。

晚市嘅餐牌主要得一個散點餐牌，無套餐嘅配搭。面頁喺各類食物，如麵條、主菜、沙律、牛角包及小食……等等，而下頁喺各式飲品同甜點。溫馨提一提，凡正價選購咖啡一杯，都可以以半價加購一件蛋糕。

青醬帶子螺絲粉 $128

小弟就揀咗一客螺絲粉，因為都好雲無食青醬呢一款口味。睇賣相，都幾青吓，感覺都幾對辦，份量又幾足。先試粒帶子，食得出新鮮貨色，有鮮甜味，口感爽彈；再試試啲粉，煮得咬口，每炷粉都掛滿醬汁，粉內又混了好多本菇，不過，啲青醬無以往遇過嘅咁重羅勒味，事後跟店員溝通，先知師傅加入菠菜汁，去平衡一下，遷就番少少港人口味。反而，小弟幾欣賞部份細節位，例如加咗啲合桃碎、杏仁片嚟增加啲口感，撒咗啲辣粉嚟提一提味，感覺喺唔同啲。

鮮奶咖啡 $42

叫得咖啡屋，就無乜理由飲啲非咖啡飲品，加上小弟確喺幾鍾意飲鮮奶咖啡，又打算配一客甜品，就當然喺嗌番咖啡啦。咖啡師喺位年紀輕輕嘅妹妹仔，沖泡得唔錯，至少個拉花都幾靚仔，線紋算細緻，天鵝亦拉得工整。飲落喺點呢？咖啡本身好醇厚，沉實帶果仁香，完全無攪過之下，每一口口感都好均勻，喺飲到最底時會差咗啲啲，個人覺得撞奶泡時未夠深。

意大利芝士蛋糕 $48

本來就想試其招牌芝士蛋糕，不過，已售罄，不過，意大利芝士蛋糕我都啱，點咗咖啡仲有半價優惠添。半價咗，都無話「求其」製作，唔單止大大件蛋糕，仲灑咗啲糖霜，並以鮮藍莓、紅莓乾、合桃碎做啲裝飾，賣相立時唔同晒。海綿蛋糕浸透咖啡，濕潤綿密，當然，如果喺加入白蘭地或冧酒嘅傳統酒精版本就更合小弟口味，但無酒版本就大眾化多啲；而中間嘅馬卡風芝士層做得輕柔而挺身，口感軟滑滲出微微芝士香，加上濃郁嘅唂咕粉表層，算喺一道有誠意嘅出品。 

臨走時，店員都介紹埋佢哋嘅午餐，所以，都影埋出嚟俾大家參考。

雖然今晚做咗一晚孤獨的美食家，不過，食到好嘢就唔孤獨，可以寫吓食吓評同大家分享，又可以介紹俾朋友有啲出色小店，希望小店繼續努力不斷，做出有目共「島」嘅成績。

個人評分
味道：8 /10
環境：8 /10
服務：8 /10
抵食：8 /10
平均每人消費：HK$194

餐廳資料：
賞島咖啡屋 The Pal Isle
太子花園街233-235號偉雄大廈地下A號舖
660 7480