Cafe Imagine：未達「素」求

同姨仔食完慶生飯無耐，又因事約出嚟聚一聚，就佢是日晌荔枝角有行程，摷吓摷吓就搵到呢一家素食店「Cafe Imagine」，單睇店名，真喺完全估佢唔到喺間純素嘅素食店。

店家所處嘅位置對好多人嚟講有少少僻，但小弟反而好熟，因為有唔少親戚都居於順寧道一帶。走進餐廳，地方唔大，目測所見，廿個位多少少，裝修簡約，但勝在企理。店員都好有禮，但唔知喺咪人手少，感覺有少少踢腳。

餐牌就主要有兩面，一面喺散點嘅菜式，有自家製純素手工小食、純素Fusion主食及特調飲品，唔收加一；另一面餐牌就有幾定食套餐，即喺多杯桂花茶。

台灣金針蒸淆玉球 $45

睇見啲小食好似幾特別，所以，老婆就話點款嚟試試，結果揀咗好似山竹牛肉球咁，不過就用咗台灣嘅金針花代替馬蹄，再加新豬肉做成嘅淆玉球。賣相有啲麻麻哋，口感都OK，打得鬆化，啲「豬肉」，但味道好似有啲問題，3個人食，有2個覺得有少少酸味，唔知喺有啲食材變咗，定喺源自啲金針花，總之，事後無人肚痛就當無事啦。

韓式粉絲定食 $78

韓式粉絲炒得似模似樣，睇到有幾多材料，豆腐乾呀、菠菜呀、燈籠椒呀、木耳絲呀……等等，仲撒上好多芝麻。而粉絲幾滑身，但又有少少柔韌感，口感確喺不俗，喺是夜比較滿意嘅菜式。

自家製泡菜叉燒印度米炒飯 $88

炒飯就食得多，但係用印度米嚟炒飯都幾敢肯定喺第一次啦，感覺有啲特別，所以先點嚟試試。個飯可以可揀茄汁或沙茶醬炒，小弟就揀後者，不過，整體都唔喺好覺有咩沙茶醬味，而素叉燒切得細碎，食落唔喺好覺咁，較多嘅喺泡菜，比一般食開嘅泡菜無咁辣，整體嚟講，都喺好普通一個炒飯咁，所以確喺有少少失望。

純素Omakase $138

姨仔揀呢一款純素「廚師發辦」，唔好睇個名以為同壽司有關係，其實喺完全無關，實際上你可以當喺一般定食，只喺餸菜由廚師安排無得揀，所以，見到一大兜餸菜配上白飯、前菜同桂花茶，當喺個6、7餸飯咁啦，但最奇怪嘅係唔知點解擺咗啲杏脯乾。講真，食味OK嘅，但覺得唔夾囉，姨仔亦唔鍾意啲桂花茶咁沖法，飲落一口桂花粒，有少少巉咀。

依家好流行食素，其實食素在我嚟講都喺清清哋，想食得健康啲。不過，佢哋啲素菜菜式部份可以講喺特別啲，但又有啲古怪，整體感覺我自己個人嚟講就一般般而已！

個人評分
味道：7/10
環境：7/10
服務：8/10
抵食：8/10
平均每人消費：HK$115

餐廳資料：
Cafe Imagine
地址：長沙灣順寧道338號豐盛居商場地下1號舖
電話：2281 6020