金鶴拉麵 Kane Tsuru Ramen：「鶴」有所長

約咗個老友聚一聚食餐飯，地點由我揀，其實老友好易話為，食咩都無所謂，所以，就番回家方便嘅路線，揀咗「閩街」嘅「金鶴拉麵」，一來曾經食過，知道質素去到邊，唔怕害到老友食劣食，二來行5分鐘唔使就到柯士甸站，返到屋企口使15分鐘，超方便。

踏進餐廳，跟其他分店嘅格局差唔多，都喺修長窄深，裝修摩登，配以柔和燈光，有別常見嘅木系主調。一幅金碧輝煌嘅金鶴圖喺佢哋嘅標誌，呢度對住吧枱位亦有一大幅。

我哋被安排坐晌吧位，可以睇到師傅整麵，而枱下有小勾，方便勾住啲袋。枱面有成大樽消毒啫喱，又有紙巾，供客人使用。

主餐牌印刷精美，黑底襯上食物圖片，夠格調，而主餐牌主要介紹店家主打嘅拉麵、鰻魚飯及小食。

其次，亦有啲散裝餐牌，喺期間限定嘅「鯛魚雞白湯拉麵」、多款串燒。

芥末八爪魚 $38

貪口爽過吓口癮，所以，點咗一客八爪魚試試，芥末味唔會好嗆喉，點到即止，而八爪魚切成小粒，咬落口感柔韌，涼涼爽爽咁，裡面又混咗啲芹粒，作為前菜都幾過癮。

金鶴雞白湯拉麵 $98

呢度以雞湯為主打賣點，所以，老友一早就打算試番店家嘅招牌「雞白湯拉麵」。一客拉麵有兩大片日本赤雞雞肉、一大片黑豚叉燒、溏心蛋、炸牛蒡片、筍乾、木耳絲、蔥絲，可以講喺材料豐富。老友就話湯底綿滑濃香，一點油膩感都無，好有驚喜，事後先知個湯熬足6個鐘，唔怪得咁堅；雞肉原來以低溫慢煮，老友大讚夠嫩滑；炸牛蒡片口感脆口，又不失牛蒡嘅獨有甘甘哋嘅味道，麵量十足，至於其他食材及配料就等我再分享。

北海道極濃蟹湯拉麵 $138

小弟不時都講，喺鍾意食蟹，但就好怕拆蟹，但呢一道同樣期間限定嘅蟹湯拉麵就啱晒我，因為完全唔使拆，就有蟹肉食，睇見碗面一大堆蟹肉就開心呀！此外，仲有一大片黑豚叉燒、溏心蛋、筍乾、黑木耳絲、蔥絲、紫菜，非常豐富。

蟹肉食得出喺新鮮貨色，味道非常之鮮甜，帶點海水嘅鹹味，大梳大梳蟹肉放入口，今次都算食得盡興。

叉燒亦好對口味，鬆化而有少少油香，卻唔會太過肥膩，個人都比較鍾意呢個做法，因為少肥肉。

至於隻溏心蛋，唔使我多描述，睇樣就知做得上乘，蛋黃半凝，又充滿蛋香，其他配料亦都好好食。

麵條亦具質素，厚度啱啱好，咬落有韌勁，夠耐浸，食到最尾一炷都無話浸腍，又好掛湯。

湯底就梗喺正啦，夠晒鮮香，濃而不膩，否則，都唔會成碗飲晒。

原來，店家仲有做埋外賣拉麵，唔怪之得不時有啲客快出快入，喺拎外賣。總括而言，兩款拉麵都好有水準，各有亮點，加上服務到位，值得再訪。

個人評分
味道：9/10
環境：8/10
服務：8/10
抵食：8/10
平均每人消費：HK$150

餐廳資料：
金鶴拉麵 Kane Tsuru Ramen

地址：佐敦閩街3號地舖
電話：27902988