介紹番今晚嘅主角「龍蝦鮑魚海鮮蒸鍋餐」，4位用，收$1,180，但另收茶芥，再加一，埋單價要$1,355。成個套餐內容都幾豐富，包9樣蒸鍋食材，加個瑤柱排骨粥底，加送健康飲品一渣及大枝裝啤酒一枝。
是晚嘅健康飲品喺竹蔗茅根，啱晒我哋，再者，我哋咁多個都唔好酒，所以，換多枝竹蔗茅根先。
都相隔咗幾件年無食過海鮮蒸鍋，依定啲器具又先進多一步，好似個蒸爐蓋，已加裝透明玻璃，更方便睇到裡面食物嘅狀況。不過，如果講啲嘢熟唔熟，都喺睇番餐牌嘅建議晚間，再用個電磁爐嘅時間制嚟控制就最方便。
上文都講過套餐會包個粥底，所以，開得爐，就由侍應出手，將瑤柱碎、排骨、南瓜、銀杏同米，放晒晌鍋底等佢慢慢熬，最後就有鍋靚粥食。
澳洲龍蝦 餐牌有標明每款食材嘅份量，童叟無欺，話有斤半龍蝦，照睇都無呃秤。啲龍蝦色澤光鮮，肉質晶瑩，放滿金蒜，按佢建議嘅時間蒸好，嘩！蒜香一湧而出，啖啖蝦肉，又爽口，又鮮甜，仲有少少蝦膏。
新鮮南非鮑魚 啲南非鮑好大隻，處理得相當乾淨，蒸佢4分鐘就食得。一人一大隻，夾住豪食，食得爽，雖然無話配果皮蒸咁花巧，但原味就食得出其鮑味不俗，口感柔韌富彈力； 順帶一提，出面有個醬料區，可以自行「混醬」，沾上少少辣椒豉油，鮑魚嘅鮮味更突出。
沙巴龍躉斑 二斤嘅斑件，切埋真喺一大碟，無欺場，睇見啲魚肉，色澤新鮮有光澤，唔會暗暗啞啞，放上少少薑絲蒸，清蒸就最能食出啲魚靚唔靚。啲魚肉入口極之嫩滑就唔在講，魚味鮮甜，大大嚿放咁入口，正呀喂。
生猛海蝦 海蝦有段小插曲，初時嚟咗8隻，即喺每人分得兩隻，但餐牌標示有半斤，轉頭補番一大碟嚟。啲蝦好生猛，送到嚟有啲仲「紮紮跳」，清蒸後，沾上豉油，好鮮味，口感又爽彈，再者，唔喺蝦毛細細隻，每隻都幾大吓，好好肉。
紅棗雲耳走地雞 食完海鮮，接住食肉，先試試啲雞，啲雞件好大堆頭，保持住份量十足，而啲雞件幾大件厚身，就要蒸耐少少。估唔到啲雞肉確喺幾嫩滑，一啲都唔嚡口，皮下脂肪亦少，又有少少紅棗香，真喺唔錯。
安格斯牛肉 晌安格斯牛肉與西班牙黑毛豬只可二選一，我哋一致通過都喺鍾意食牛多啲，嚟到一大碟牛肉，睇落真喺幾靚仔，都幾多油花。一次過蒸晒佢，人人都分到好多片，大啖大啖咁食，啲牛既有油香，又有肉香，真喺食得過癮。
手打蝦丸 食打鞭爐就唔少得啲乜丸物丸，而今晚嘅蒸鍋一樣帶有啲手打蝦丸，清蒸真喺第一次囉。都唔好睇少，真材實料，好有鮮蝦味，又極之彈牙，可惜喺每人只得兩粒，兩啖食晒。
日式餃子 睇樣就似喺來貨嘢，因為，自己包嘅，啲樣呀、摺紋呀，應該會靚仔啲，嚟到都仲有好多雪花晌面，不過，都無乜太大期望，食落叫做OK啦，唔好太多肥肉都收貨喇。
鮮甜津白 接近尾聲，補番啲蔬菜，平衡一下餐飯嘅肉類，不過，就只有津白，幸而都夠晒鮮甜，之但喺，如果喺以蔬菜籃形式，同樣都喺一籃，但多幾款蔬菜就感覺有睇頭啲。
瑤柱排骨粥底 蒸鍋食完，輪到嘆個粥底喇，喺咁唔停蒸佢兩個鐘，啲粥真喺好綿，而且，啲海鮮呀、雞肉呀、牛肉呀嘅精華滴晒落鍋粥度，加上事前放入去嘅瑤柱、排骨、南瓜，令到碗粥好食到不得了。
總結餐飯，用料不賴，有海鮮，有靚肉，份量又十足，4個麻甩佬，飽到上心口，而且，招呼都幾唔錯，個別阿姐亦好好傾。最後，祝老死過到去，事事稱心，生活更愉快！
個人評分
味道：9/10
環境：7/10
服務：8/10
抵食：9/10
平均每人消費：HK$340
味道：9/10
環境：7/10
服務：8/10
抵食：9/10
平均每人消費：HK$340
餐廳資料：
真味鮮廚 Tastefull Kitchen
地址：旺角洗衣街39-55號金雞廣場1樓
電話：2782 3836
真味鮮廚 Tastefull Kitchen
地址：旺角洗衣街39-55號金雞廣場1樓
電話：2782 3836
沒有留言:
發佈留言