黃金小館：分「金」同味

近排市況好番好多，大家都多咗出嚟活動、行街，雖然，每日新增確診數字都喺高位橫行，但無阻大家消費，小弟都多咗出嚟買吓嘢，無他嘅，要清一清呢消費券嘛！今晚同老友短聚，佢話好耐無食過點心，就平平嚟，嚟到深水埗嘅「黃金小館」試試，睇佢風評不俗，價位又唔高，位處平民區，我哋兩個麻甩佬又食得夠自在。 

裝修喺好基本嗰啲，見到餐廳尾位似喺水吧，所以，有啲茶記格局，只喺牆上貼上大張食物相，但勝在夠光猛整潔，而且，地方亦唔細，尤其啲卡位，都好闊落。而幫襯嘅，目測都喺街坊多，同啲阿姐有講有笑，以及有唔少外賣客，相對，生客就少啲。

枱面就擺好晒碗、茶杯，而筷子同匙羹就好似啲茶記咁，放晒晌枱側嘅櫃桶，不過，擺得有啲凌亂，哈哈！

而食物嘅選擇，唔好諗住好多驚喜嘢，都喺穩打穩紮嘅款式，蒸點、包點、腸粉……等等，不過，亦有啲住家蒸飯、養生燉湯供應，成為唔少街坊嚟食晚飯嘅心水。店內點心，全部都喺即叫即做，茶位收$5一位，無加一！

酥脆蝦多士 $34

脆口嘢，個個都鍾意架啦，所以，先嚟一客香脆甘香嘅蝦多士，件件炸得金黃，沾滿芝麻，入口果然脆到不得了，而且，絕無油膩感，充滿芝麻香之外，蝦膠更喺厚身彈牙，有蝦鮮味！

XO醬鮮蝦菜苗餃 $26

食完個炸嘅，食番啲清嘅，菜苗餃就夠健康，一客3隻，賣相晶瑩，面頭仲加咗少少XO醬作點綴，顯得更精緻。咬落外皮煙韌唔黏牙，蝦肉鮮爽彈牙，菜苗刴得幼細又鮮嫩，做到皮薄餡靚。

懷舊鵪鶉蛋燒賣 $24

依家真喺好少見鵪鶉蛋燒賣，後生一輩可能唔知有呢款點心，所以，點都要點一客懷舊吓。其實食味唔會有咩大驚喜，都喺穩打嘅豬肉餡，算打得鬆化，包住一整粒鵪鶉蛋，蛋黃綿香，喺食出一份情懷。

香噴噴招牌流沙包 $24

飲茶又點可以少咗包點架，既然叫得招牌，就梗喺要試一試啦，果然做得有一手，拎上手熱焫焫，一咬包身非常軟熟，而中間嘅流沙餡澎湃咗湧出嚟，做得綿滑、香濃，甚富鹹蛋嘅香氣，真喺不失招牌之名。

原籠椰汁黃金糕 $20

最來嚟一客甜點作結，就選上椰汁黃金糕，原因喺因為唔喺度度都有供應。黃金糕色澤金黃，入口口感煙煙韌韌，好有咬口，滲出清香嘅椰汁味，又無話過甜，食口糕，飲啖茶，幾搭配架。

雖然小店一間，但點心做得有水準，招呼亦唔錯，當然唔好諗有咩優質服務啦，但感覺有啲親和，最緊要喺價錢相宜，地點又就腳嘛。

個人評分
味道：8/10
環境：7/10
服務：7/10
抵食：8/10
平均每人消費：HK$70

餐廳資料：
黃金小館
深水埗北河街159號地下
3689 6535