Satay Pop：沙「pop」晚餐

我都講過小弟算幾鍾意星馬菜，今日處理完事情，因為家中無飯開，而經過天后一個美食廣場「Food Loft」，發現裡面有多家食肆，最後都喺揀咗賣馬拉菜嘅「Satay Pop」快閃食個晚餐就走。 

講番個美食廣場環境先，地下層主要有多家食店，有賣西式、韓式、沙律、台式飲品、咖啡店……等等，有少量座位。

而上一層亦有多間食肆，不過，好些鋪位仍在裝修中，但可供坐嘅地方就多啲。再上一層喺零售市集。

所有食物都喺即點即做，故此，晌鋪面就會見到師傅淥麵、整串燒、三文治……等等，所以，經常傳出彈陣陣香氣。

餐牌就貼晌鋪面，外觀好美式漫畫化，色彩繽紛，睇落好醒目。種類包括沙嗲串燒系列、主食與配菜、三文治及飲品，話多唔多，話少唔少。

佢哋仲出咗相信喺自家品牌嘅咖吔醬，名叫「三叔公」，都幾搞笑。

沙嗲牛肉粒排包 $58、馬來西亞椰子水 $18

包裝得整整齊齊，紙製食物盒相對環保少少，貼咗張自家標誌貼紙，除附送紙巾外，更附上膠手套，咁就更衛生，可見店家嘅服務好細心。

排包本身已充滿牛油香，烘到一條條坑紋蹤橫交錯，非常靚仔，外層帶點脆口，裡面就好軟熟。除咗啲沙嗲牛肉粒，仲夾有爽脆嘅生菜、超薄嘅青瓜片、紫洋蔥，並塗上自家製沙嗲醬汁，入口濃郁惹味得嚟，又有份清爽感，而牛肉粒既有肉香，又有陣陣焦香，更喺非常軟腍，整體比預期好呀！

呢一個品牌嘅椰子水都喺第一次接觸，其實定價都唔平，又無啲加配飲品優惠，不過，叫大馬直送，無晌市面見過，即管一試。椰子水入口有好濃郁椰子味，感覺清爽怡人，尤其夠冰凍時，配啲濃味嘅沙嗲真喺幾唔錯。

呢餐「pop up」快閃晚飯，感覺唔錯，都有別以往食開嘅馬拉菜，店長亦好有禮。不過，用餐時間都喺晚飯高峰時段，嚟呢個美食廣場買外賣嘅客人都唔算多，可能仲要守吓。

個人評分
味道：8/10
環境：7/10
服務：8/10
抵食：7/10
平均每人消費：HK$76

餐廳資料：
Satay Pop
天后電氣道54號亨環天后地下7號舖
9308 1409