Aroydee Thai 船麵：「泰」隱蔽泰式麵店

呢個周六要過嚟葵涌有小組聚會，晌聚會前搵個地方食，兼打打躉，就晌附近搵檔好嘢試吓，兼打發時間。兜咗個圈，晌「屏麗徑」見到呢一家有少少隱世感覺嘅泰國菜小店，好好醜醜，一於試試。

因為廚房設晌門口位，所以，入門位置比較窄長，但入到裡面又有另一番景象。雖然，地方都仲喺細細哋，之但喺，牆上掛咗啲食物相、手工擺設，而枱上又放有小盆栽，立時有種小清新嘅感覺。

因為店家嘅餐牌過咗膠，事後發覺有少少反光，好彩一向都會拎埋啲外賣紙，貼出嚟俾大家當個參考。菜式選擇有湯河、撈麵、小食、甜品，甚至火鍋都有，當然唔少得富泰式風味嘅飲品啦。

枱上已備有餐具及醬料，客人可自由取用，不過，因為小弟點嘅喺冬陰功湯河，所以，都唔需要再額外加調味。順帶一提，店員似喺泰國人，一口流利廣東話，而且，非常有禮貌。

冬陰功湯生牛肉金邊粉 $55

揀冬陰功湯底貪其富泰國特色嘛，而選生牛肉就感覺喺比其他料貴價啲咁囉，滿足自己揀得醒嘅心態啦，哈哈！而晚市會比午市貴$5，不過，成碗粉大大碗，份量十足，除生牛肉，仲伴有生菜、菇菌，確喺交足貨。

睇到個湯底就知有料到，唔止色澤靚，捧到嚟仲聞到陣陣冬陰功獨有嘅香氣，先試為快，呷一口湯先，熬得非常濃香，辣得嚟唔嗆喉，又滲出陣陣微酸，好有醒胃感。再試試啲生牛肉，其實都已經熟晒，但就緊緊熟，入口嫩滿到不得了，正呀喂；而金邊粉即喺幼身嘅河粉，口感滑溜，掛上冬陰功湯，真喺淨食粉都覺得好味。

龍眼冰 +$8

飲品都有加配優惠，都唔算貴，嚟泰國菜館，小弟就經常揀龍眼冰，因為，覺得佢夠清甜冰爽，襯辣底嘅湯河就夾晒啦。夠大杯，入口個糖水底好潤，無過甜嘅毛病，雖然龍眼唔算多，但確喺好清甜，唔喺罐頭貨之類。

臨尾離開時先再留意一下廚房，師傅又喺泰國人，所以，嚟呢度食嘢，正宗度唔差得去邊，希望小店繼續努力，生意越做越好。

個人評分
味道：9/10
環境：7/10
服務：8/10
抵食：8/10
平均每人消費：HK$63

餐廳資料：
Aroydee Thai 船麵
地址：葵涌屏麗徑21號地舖
電話：6297 7767