開放式廚房嘅設計，路過時傳嚟陣陣香氣，駐足一陣更可以睇到大廚們做菜嘅功架。
我哋被安排坐近門口附近，仲見到少少「煤氣燈樓梯」嘅街景，另一邊就整咗個新派啲嘅「水簾洞」，別具一格嘅設計，非常別緻。
而枱上擺設嘅餐具，都高雅亮麗，當坐低之後，店員更會為你鋪上餐巾，並介紹一下餐牌中部份菜式嘅亮點，當然，對任何菜式有咩唔明，佢哋都樂意為你解答。
午餐時段，餐牌設有兩款，一款喺3道菜嘅午餐（$428 / 位），另一款就喺6道菜嘅精選套餐（$980 / 位），雖然餐牌無寫，但實際上都會奉送餐飲嘅。但需留意，午餐中，部份選擇喺需要另外加錢。
Bread Selection等候上菜前，先嚟一份麵包籃，有3款麵包：意大利香草包、多穀麥種籽包及一款薄脆片，簡單配上油醋，意大利香草包喺小弟嘅心水，除鬆軟又有香草味之外，食得出面面仲灑咗少少鹽粒，夠正宗，而多穀麥麵包帶韌性，富口感，沾上少少油醋已好好食。溫馨提示，麵包仲可以添食架。
Lobster Bique (+$68)舊同學所選嘅前菜喺法式龍蝦湯，咪以為就咁一碟湯送上，而喺先送嚟一份意式雲吞，下底更墊有少許干邑泡沫，之後再由侍應將龍蝦湯注入碟內，非常有氣派。雖然小弟無試，但舊同學就讚不絕口，龍蝦湯不單蝦鮮味盡出，倒落去時撞勻啲干邑泡沫，滲出微微酒香，甚具畫龍點睛之效，而且，口感絲滑；至於雲吞外皮厚薄剛好，咬落煙韌，裡面包住好多龍蝦肉，鮮甜爽彈，加上外皮掛上少少龍蝦湯，食起嚟就更濃香。
Beef Carpaccio, Foie Gras Terrine and Truffle Mayo呢一道意式生牛肉薄片真喺以生牛肉為賣點，敢將完完全全生嘅牛肉奉上，當然對牛肉嘅質素充滿自信先敢做。薄薄嘅法國牛肉以手切平鋪晌碟底，色澤艷紅卻唔會有半點血水，配上少少沙律菜、食用花，令賣相更好睇，再伴以鵝肝醬及松露蛋黃醬，以生牛肉捲起所有食材入口，集柔嫩、鹹香、油潤於一身，味道嘅層次豐富。
Fettuccine, Red Prawn, Tomato and Basil (+$98)主菜方面，舊同學揀咗呢一款由店長推介俾佢嘅紅蝦寬條麵，因為紅蝦嚟自西班牙，喺比較少食嘅蝦種，而寬條麵喺大廚嘅自家製出品，夠晒誠意。一身鮮紅嘅紅蝦，比一般蝦種大隻，蝦鮮味比較濃，口感就有別慣常所知嘅爽牙，而喺帶少少黏身；麵條色澤偏橙，富蛋香，而口感柔韌有咬口，並且非常掛汁，講到醬汁，更加入埋蝦膏製作，自不然更具風味，將蝦香味發揮得淋漓盡致。
USDA Ribeye, Pumpkin and Shallot Jus小弟就簡單啲，揀咗款美國頂級肉眼扒，選五乘熟，順帶一提，侍應上菜時都會為每道菜作出解釋，講講食材嘅亮點，又或一啲特別嘅烹調法，就好似呢一份肉眼，位置就取咗最鮮嫩嘅邊位肉眼蓋，夠刁鑽。睇見成品，就知燒得啱啱好，外層帶焦脆感，裡面紅潤得嚟一啲血水都無，肉質軟腍細緻，卻好有肉味，又富肉汁，件肉眼嘅質素非常之高；此外，伴有南瓜蓉、法邊豆同南瓜脆片，雖然都好食，但略嫌南瓜蓉太少喇，食得唔夠喉啫，哈哈！
Ginger Crème Brûlée with Caramel Sauce甜品共兩款選擇，咁就唔需要多懸念，兩款都可以試晒！法式甜品一向都喺賣相靚，單喺外觀，兩款甜品都如藝術品般，先分享呢一道薑味法式布甸，法式燉蛋帶有突出嘅薑汁味，撈埋啲開心果仁碎、焦糖醬一齊食，感覺唔錯。
Orange Chocolate Mousse and Chocolate Sponge Cake另一道喺橙味朱古力慕絲蛋糕，主角朱古力慕絲真喺做得非常柔滑，朱古力味濃郁而帶點甘苦，再慢慢滲出橙香，味道非常有層次，兼且平衡而唔怕搶去其他食材嘅味道；旁邊仲伴有好鬆軟嘅朱古力海綿蛋糕，以及香濃嘅朱古力醬，以完美嘅甜味作結。
Lemon Tea and Coffee 舊同學要一杯熱檸檬茶來消消滯，要欣賞嘅喺套茶具，非常雅致漂亮；而小弟最喜歡喺以咖啡嚟襯甜品，咖啡醇香四溢，只要豆靚，即磨出品，都差唔得去邊，更窩心喺仲伴有一小件意大利杏仁曲奇，配咖啡確喺譜出美妙時光。
食法國菜喺飲食中嘅一種漫活，就算食午餐，都記得預留多少少時間嚟慢慢享受，唔單止食物，仲有環境同服務。
個人評分
味道：9/10
環境：9/10
服務：9/10
抵食：8/10
平均每人消費：HK$560
環境：9/10
服務：9/10
抵食：8/10
平均每人消費：HK$560
餐廳資料：
A Lux
地址：中環都爹利街13號樂成行地庫M2號舖
電話：2663 9938
A Lux
地址：中環都爹利街13號樂成行地庫M2號舖
電話：2663 9938
沒有留言:
發佈留言