越男仔 De Viet Son：搵食指「男」

疫情有啲反彈，仲未踢得波住（老婆唔批），就只好繼續行吓山，出身汗。今次由小弟帶路，同老友由黃大仙上獅子亭，再落番另一邊嘅水泉澳邨，最終目的地喺沙田圍。小弟對新界區唔太熟，所以，由家住新界嘅老友帶路做我嘅搵食指南，嚟到佢推薦嘅「越南仔」嘆番餐下午茶，啱啦，我都好似大半年未食過越南嘢。

走進餐廳，裝修方面走少少東南亞復古風，而比較重越南元素嘅喺啲竹笠吊燈罩。我哋就選上卡位，因為大大張墨綠色懷舊款式嘅梳化，份外好坐。

雖然走啲懷舊風，但牆上及好多位置，都擺設咗好多港式潮語句子牌，好多都好抵死，但如果對啲句子牌認真你就輸，就好似以下專登影低呢一個。

餐牌有好多張，加埋貼晌啲間板呀，牆上呀，真喺花多眼亂，不過既然過嚟食個下午茶，就聚焦番下午茶餐內啲平靚正選擇，而飲品有升級優惠。

越式生牛肉湯河粉 $48

老友想食啲濕濕哋嘅嘢，所以，最好喺湯河粉，加上生牛肉喺越式粉麵嘅特色。河粉未嚟之前，店員先送上調味架，除辣醬，仲有辣椒、蒜蓉及青檸，自由取用。

老友先喝啖湯，佢話保持水準，個牛骨湯濃香不膩，而河粉份量勁多，口感又夠滑溜，而生牛肉啱啱好浸熟，所以，入口口感嫩滑到不得了，肉味亦唔失禮。

凍檸茶 +$3

老友話對飲品無要求，最緊要喺夠凍，話晒出咗一身汗，補補水兼解口渴。睇見杯檸茶嘅色澤都知茶味夠濃，而檸味與茶味都夠平衡，冰涼清爽。

法式芝心蝦多士配沙律 $47

小弟就睇啱呢一款蝦多士，因為佢喺店家嘅推介食物之一，送到嚟嘅第一個感覺真喺覺得平平無奇架，但細心啲睇，就知道咩叫真材實料、絕無欺場，影張大特寫俾大家參考就見到啲蝦膠有幾厚身，而啲多士面就沾滿芝麻，一大口咬落去，香脆不油膩，充滿芝麻香，咬入心就喺爽彈嘅蝦膠，再搭上溶到透嘅芝士，口感、味道都極富層次，超好食。一口多士，再加一口越式沙律清清味蕾，無得彈呀。

椰汁紅豆冰 +$12

今回紅豆冰喺我嘅心水，由於早餐、午餐都飲咗杯咖啡，所以，原本就想試試椰汁拉茶紅豆冰，不過，都喺簡單少少要杯椰汁紅豆冰。平常茶記嘅紅豆冰就加奶水，初時都以為呢杯只不過加入罐裝現成椰奶，實質喺加入鮮打嘅椰汁，因為飲得到微微粒嘅椰蓉，夠真材實料，椰子味變得份外自然、清甜，而紅豆亦煮得夠腍，只喺略嫌份量少咗啲。

多謝老友推介，估唔到小小一間「屋苑鋪」，製作、用料都無欺場，加上卡位好好坐，好舒服，令我哋食完都坐多陣先走。

個人評分
味道：9/10
環境：7/10
服務：8/10
抵食：9/10
平均每人消費：HK$60

餐廳資料：
越男仔 De Viet Son
地址：沙田沙田圍路1-7號勵城花園地下1號舖
電話：2337 0075