講到室內環境，入去用餐區前，喺水吧區，再以一組典雅嘅燈櫃間隔開外面同裡面，等用餐區保持多少少私隱度。
再行入去到餐廳大堂用餐區，一室摩登時尚，卻又顯得高雅，一排設晌對海一面落地大玻璃窗嘅座位，自然喺此時此刻嘅最佳位置，就算無坐出去，一樣可以飽覽藍天白雲，予人感覺舒服悠揚。坐唔到近窗口位，其他位置其實都好舒服，除咗啲梳化位本身喺好嘢嚟，仲有就喺座位嘅編排唔擠迫，保持一定嘅空間感。
然而，純坐吓飲嘢，餐廳環境嘅亮點之一喺坐擁無敵海景，下午嚟到剛好唔會曬住，180°環廻維港景，加上是日藍天白雲，景致一流，景觀方面真喺無得輸。室外位有一排排藤椅，舒服悠閒，嚟齋飲嘢又好、嘆個下午茶又好，都喺賞心樂事，寫意無限。就算晌裡面用餐完畢，轉枱坐出嚟嘆埋杯餐飲都可以嘅。
講番佢哋嘅午餐先，分為前菜、主菜、甜品，包餐飲，餐廳所賣嘅喺融合亞洲各地元素嘅新派法國菜，而定價為2 course（1前菜+1主菜）$398、3 course（1前菜+1主菜+1甜品）$468、4 course（2前菜+1主菜+1甜品）$538，豐儉由人，咁好環境，咁好招呼，就當然要收加一服務費啦，不過，啲服務就真喺好專業，侍應對每道菜式都好熟悉，每次上菜，都會細心講解一下菜式嘅用料及其亮點，而且，上菜速度不緩不急，節奏良好。
French Bread Selection 麵包喺新鮮焗製成，睇個樣已感到好有質量，採用酸種製作，純天然發酵，自然唔易控制，風味絕佳，外層香脆，包心卻柔韌有個性，既富麥香，裡面仲混有好多無花果乾及合核粒。亮點其實晌啲牛油度，以酸忌廉、法國牛油及馬卡風芝士打成，再灑少少海鹽，柔滑而味道甚具層次。仲有，麵包喺可以添食，不過呢，酸種包易飽肚，食一件都已經好夠。
Sweet Corn, Crab, Amasake, Caviar由於到訪過，都知道佢哋嘅菜式會做得精緻過人，尤其帶着日本匠人嘅精神，就更加一絲不苟。呢一道前菜賣相非常清新，初時以為單喺送嚟時嘅模樣，原來仲要即場注入粟米凍湯。不得不讚，除食材大多嚟自外國之外，仲用料優質，好似個凍湯咁，粟米味超濃郁清甜，質感幼滑。碟上一邊喺墊有白露筍配蟹肉，再以一啲食用花、爆谷做裝飾，並以日本甘酒調和，入口非常清爽鮮味，白露筍細嫩無渣；另一邊則以炙燒過嘅日本超甜粟米伴以黑魚籽，一甜一鹹，讓味蕾帶嚟衝擊感，味道極具層次，可以講餘韻悠長。
Foie Gras, American Cherry, Lime 另一款前菜喺法國菜嘅經典 – 香煎鵝肝，鵝肝嘅份量好大，煎得賣相誘人，並伴以車厘子及美國嘅黃杏仁。鵝肝入口絕對喺外脆內嫩，外層有種焦脆感，而裡面質感粉嫩綿滑，濃濃嘅鵝肝獨有香氣，喺靚貨嘅表現；精彩位不止在鵝肝身上，伴碟嘅車厘子亦有驚喜，因為以砵酒浸透再煮熱，暖暖嘅車厘子散發出酒香，正正可以平衡番鵝肝嘅濃味，喺一道配搭出色嘅前菜。
Australia Skirt Steak, Lotus Root, Chicory, Macaroni兩位男士都喺揀番食肉，咁啱亦喺經理嘅推薦菜式。小弟就揀咗Skirt Steak（有譯為側腹橫肌牛扒，晌網上搵搵，喺指牛後腰脊柱兩側嘅肉，即喺邊度？小弟不才，都真喺唔太清楚，不過，由於一隻牛可以取出嘅份量都唔多，所以，價格都幾貴。）賣相貫徹番一樣咁精緻，襯以菊苣、鮮青豆、烤蓮藕片、豆蓉，色彩繽紛，有少少藝術氣息。而講到件牛扒，真喺一流，煎到5乘熟，睇樣就知啱啱好，色澤保持粉嫩，卻無半點血水，而肉質果然細嫩柔軟，又富肉香，肉汁亦好豐盈。
Pluma Iberico, Lotus Root, Chicory, Macaroni 表哥就想試試西班牙黑毛豬，由於豬種靚，經理話可以同樣做到5乘熟，非要全熟不可，還記得曾經食過一種優質嘅加拿大豬鞍，一樣可以唔需要全熟。小弟都小試咗一件，果然又喺一道優質菜式，黑毛豬肉質好嫩滑，估唔到喺咁細緻，細嚼下仲食到少少油香，卻完全唔會有咩油膩感，加上有咁多唔同種類嘅蔬菜伴菜，更加唔需要擔心膽固醇超標啦。
兩道肉類嘅主菜都有一份配菜香焗芝士通心粉（Macaroni），整道通粉都填滿香濃嘅芝士，焗過嘅通粉又多添份咬口感，而裡面更加有牛肉粒粒，變得更惹味，細細份作為配菜就最好不過啦。整體而言，午餐嘅份量好足夠。
Mango, Black Rice, Black Lemon 睇見個菜式名，就有少少泰國風，侍應將甜品送上時，介紹中亦講到明喺以泰式嘅芒果黑糯米做藍本，但就重新演繹。睇賣相就知喺一道完全西式嘅甜點，外觀亮麗，以忌廉、馬卡風芝士做成主體，加入黑檸檬，口感輕柔而清新，而作點綴嘅黑糯米喺焗到爆開，咬落脆卜卜，此外，餡心內確喺有煮透煙煙韌韌嘅黑糯米，再配以甜度極高嘅日本芒果，混埋一齊食，味道多元，口感極具層次，真喺大滿足。
Latte 自從有次介紹表哥試試鮮奶咖啡之後，佢都鐘意起呢一款意式咖啡，至於小弟，有睇過小弟啲咖啡店食評，都知我一向喺鮮奶咖啡嘅忠粉。雖然，眼前呢杯鮮奶咖啡嘅表面未做到完美平滑，但拉花唔錯，圖案對稱，入口口感綿密且好均勻，完全唔使攪，每口都一致，足證咖啡店手勢好，再者，豆靚出嚟嘅咖啡夠醇香，已差唔的去邊。
單睇價錢可能覺得有點高，但計及環境、服務、食物質素、菜式嘅配搭，可以講性價比高，值得一啲紀念日子嚟豪一豪，平日嘅話更適合商務客人。由於呢度環境實在好，悠悠閒閒，兩老表慢慢坐，細味香醇嘅咖啡，話題已由分享家族近況已轉到退休事上，哈哈。
個人評分
味道：9/10
環境：9/10
服務：9/10
抵食：8/10
平均每人消費：HK$515
味道：9/10
環境：9/10
服務：9/10
抵食：8/10
平均每人消費：HK$515
餐廳資料：
TIRPSE
尖沙咀梳士巴利道18號Victoria Dockside K11 Musea2樓219號舖
2333 0031
TIRPSE
尖沙咀梳士巴利道18號Victoria Dockside K11 Musea2樓219號舖
2333 0031
沒有留言:
發佈留言