古珐蛋糕 Castella Cake：美味嘅不二「珐」門

雖然，台式嘅古早蛋糕開到成行成市，但感覺似去到尾聲，話題性都無初初咁大，之不過，卻又不時從啲報紙、雜誌，見到有新店開張，仲要晌依家疫情都仍然喺反反覆覆，真喺都好佩服啲店主咁勇。過開嚟九龍城，經過呢一家「古珐蛋糕」，唔喺新開，仲晌太子、將軍澳有分店，仲做得住，心諗都試得過啩！ 

啲鋪面、環境呢啲唔多講，間間都差唔多。就睇睇佢哋有咩選擇，同定價點樣，款式算有唔少，但就唔會有啲太新奇、古怪嘅味道，而定價跟外間大部份古早蛋糕店稍稍偏高，$65-$85，此外，眼見就無咩折扣優惠提供。

香酥肉鬆蛋糕 $75

試咗一款肉鬆口味，包裝盒幾可愛，盒面貼有「肉鬆」二字，俾錯嘅機會更細，而另一邊，就標榜佢哋嘅出品喺零香精、零色素、零防腐劑。其實，有食開或食過啲古早蛋糕，基本上間間都喺咁寫。

另外兩側，就列明一啲食用嘅溫馨提示，賞味期限都喺3天內，以及表明佢哋會用精選材料。

打開個包裝盒，蛋糕面鋪滿肉鬆，都算喺厚厚一層。曾經喺一間標榜賣「正宗」古早蛋糕店嘅介紹，話喺經過低溫慢火烘培而成，賣相要挺身，無裂紋，表皮要薄，底皮無過火，口感應該鬆軟而帶點濕潤，唔應該太乾身，有濃厚蛋香，咁先叫好、正宗。如以此為標準，「古琺」呢一個算挺，但喺底皮有所謂烘過火。幸而，蛋糕嘅口感綿密而鬆軟，確喺帶點濕潤，唔會太乾，且甚富蛋香，肉鬆則有點脆口感添。

前前後後都試過好幾家古早蛋糕店，覺得口味上搞得太「花臣」唔喺好事，反而，味道簡單一點，先食番出「古早」嘅風味，當然，呢個只喺個人睇法，總有啲客人喜歡新奇、古靈精怪嘅口味！

個人評分
味道：7/10
環境：7/10
服務：7/10
抵食：7/10
平均每人消費：HK$75

餐廳資料：
古珐蛋糕 Castella Cake
九龍城福佬村道49A-49D號地下3號舖
2806 3722