膳坊 Grand Cafe：質素大改「膳」

之前一篇食評「村校小賣部」就講到我哋三幾個死佬入咗去行烏蛟騰、梅子林、荔枝窩、印洲塘海岸公園、三椏村……，兜咗個大圈，行咗5個幾鐘。之後，搭巴士出返大埔，當然，喺食番個下午茶啦。由地膽帶路，又喺嚟番上次嘅「膳坊」，雖然，喺想試其他餐廳，但跟大隊啦，反正，我又唔喺太抗拒翻兜嘅。

上次就踩完單車嚟食，都只喺大概一年前嘅事，環境無變，所以，就唔多講，貼番張相當記錄，而當日嚟得晏，所以，眼下嘅客人唔多。但值得一提，上次嚟，啲餐具就咗以藤籃放晒晌枱面，無遮無掩，疫情下唔喺太好，但今次就由侍應拎嚟，真喺有改善喎，抵讚！

餐牌呢，都喺嗰張，三十多款茶餐、常餐，唯一有變，就喺個價錢，對比番兩次個餐牌，全部嘢都加$1，自己有去開買餸，食材呢年都貴咗好多，加$1都OK啦。

芝士鹹牛肉炒蛋包 $33

上次試咗個招牌沙嗲牛肉包，喺有水準嘅，今次就改試芝士鹹牛肉炒蛋包，同樣喺用上大大隻「潛艇」熱狗包，上面放滿鹹牛肉炒蛋包，料多夠實在，炒蛋夠滑，鹹牛肉惹味，加埋混咗少少芝士，食得到一絲絲，誠意嘅製作。

熱奶茶

都喺熱奶茶啱我，一口包，一口醇香嘅奶茶，下午茶嘅好享受。講番杯奶茶 ，茶底醇香馥郁之餘，口感幼滑，絕對沖出港式奶茶嘅神髓。都話，晌茶記揀奶茶，真喺衰極都有個譜。

招牌沙嗲牛肉包 $33

上次食過招牌沙嗲牛肉包，認為做得有一手，所以，推介俾同行友人。跟上之一樣，料多餡正，友人大讚有水準，牛肉腍滑，汁底惹味，熱狗包身烘過嚟，好軟熟。

西多士 $33
另一友人嘅西多士，睇落就喺大路貨色出品，無話好好，亦無話差，不過，定價要$33，佢就話總之跟我哋要芝士鹹牛肉炒蛋包或招牌沙嗲牛肉包，感覺抵食好多。

茄蛋治 $33

其中一位友人食嘢好健康，所以，就要咗一份蕃茄雞蛋三文治，做法喺以千島醬加蛋做成蛋沙律，再加生菜絲同新鮮蕃茄片，佢話味道幾清新喎，食味又真喺唔錯。

炸雞脾配沙律 $39

老友都喺唔信邪，再次點炸脾，繼續都喺好大隻脾。而對比番上次，今次真喺無咁燶，亦無咁乾，叫好食好多。此外，上次配薯條，今次改配沙律，平衡少少油炸嘢，沙律喺好有懷舊感嘅港式雜果沙律。

嚟得「膳坊」，我自己就無特別要求太多，大家亦只喺過過口癮嘆番個下午茶而已。整體而言，比上次嘅出品好好多，至少，無乜邊款出現大問題啦，真喺有改善到。

個人評分
味道：8/10
環境：7/10
服務：7/10
抵食：8/10
平均每人消費：HK$33

餐廳資料：
膳坊 Grand Cafe
大埔曉運路10號運頭塘邨運頭塘商場地舖
2989 2312