德興茶餐廳：「德」一想二

行山熱血嘅老友今日揀咗由大美督起步，經橫七古道行到去鹿頸， 唔難行，全程約10km，大概用咗4.5鐘。不過，去到鹿徑等小巴出返粉嶺就大排長龍。返到粉嶺，大家第一時間就哋搵地方食下午茶，亦喺行程之一，貪方便，加上大家對粉嶺都唔太熟，就隨意揀咗黐住地鐵「名都商場」內嘅「德興茶餐廳」，見好似好多人幫襯，搏一搏而已。

個名就改成茶餐廳，查實就喺快餐店，一眼望入去個格局都已經喺，而晌門口櫃枱落單，攞住張飛仔去另一邊廚房櫃枱擺低，等叫「冧巴」，餐具亦自取，完全喺快餐店模式。

所有食物就列晒晌鋪外嘅大水牌，當然，比快餐店嘅選擇多好多，種類、款式就行番茶記模式，包羅萬有。

而下午茶時段，門口前就楝咗另一個餐牌，陳列咗多款特價茶餐、特價粉麵餐，話就話特價，但跟大部份嘅價錢相若。

菠蘿油 $26

始終行山帶咗啲乾糧，所以，唔需要食得太大份量，菠蘿油配奶茶就喺小弟嘅最心水喇。菠蘿油睇嚟無乜搞特別喇，實際呢，都真喺好普通，而已，「菠蘿皮」唔喺好脆，牛油仲少得可憐，唯一喺佢烘番熱個包，好軟熟，好香。

熱奶茶

菠蘿油真失望咗少少，好彩杯熱奶茶都幾得，當喺補番條數。奶茶色澤好對辦，深褐色得嚟有光澤，入口茶底醇香之餘，口感都算幼滑。鍾意佢哋用番全統茶記厚身瓦杯，保溫力強，更喺一種情懷。

炸雞脾 $30、紅豆冰 +$6

通常啲下午茶餐炸脾喺配沙律或薯條，但呢度就淨食，老友喺炸脾狂熱，再次點炸脾。呢度啲炸脾又確喺唔錯喎，最基本嘅，就喺無炸燶先啦，炸得皮脆甘香，雞肉都見肉汁；加錢配咗紅豆冰，驚喜就無，但睇到啲豆成大半杯，煮得腍甜，抵飲。

公司三文治 $45

有老友就揀咗份公司治，三文治內夾有蕃茄、火腿、芝士、生菜、吞拿魚、餐肉、煎蛋，絕無欺場，份量夠晒十足。夾有咁多料，味道自然喺唔錯，等耐少少都喺值得。

雖然，小弟嘅菠蘿油餐真喺麻麻哋，但行完山，出一身汗，有個地方涼吓冷氣，又有啲嘢填肚，其實已好知足。當然，食到份正嘅下午茶就更好啦，做人總喺得一就想二嘅。

個人評分
味道：6/10
環境：7/10
服務：7/10
抵食：8/10
平均每人消費：HK$26

餐廳資料：
德興茶餐廳
粉嶺粉嶺車站路18號粉嶺名都商場3樓26-28號舖
2682 0813