先介一吓午餐有咩嘢食，雖然，睇勻就唔覺有咩貴價嘢喇，但種類、款式都算多。而大部分食物都集中晌中央區，其次嘅，甜品及飲品就安置晌附近另一組區域。
沙律、生果（8/10）
5大盆沙律菜、10多款配料、4款醬準就喺組成沙律吧嘅陣容，話多唔多，話少唔少咁啦。唔鐘意自己搞嚟搞去，仲有8款預製好嘅沙律，喺沙律嘅懶人包。沙律旁放有幾款生果，喜歡嘅話亦可以拼埋沙律一齊食。
冷盤、芝士盤（8/10）
冷盤類有啲煙三文、切肉腸、肉卷……之類，款式較大路常見，唔算好特色。反而，芝士嘅選擇就比預期多喎，有成4款，有軟，有硬，但最鍾意喺佢已經切好晒一嚿嚿。
慣性，第一碟點都喺要食啲沙律及生果先，堅可以開開胃增加戰鬥力，因為沙律陣容都唔算強勁，就再配啲冷盤嘢，就成為小弟嘅頭盤。整體唔錯架，啲食材夠鮮，淋上好多法式沙律汁，確喺好醒神。
餐湯、麵包（8/10）
如大多數自助餐，都喺一款中湯，一款西湯，雖然有個牌仔，不過都只喺寫住「中式例湯」，飲落先知喺乜。而餐湯旁就放咗多款麵包，軟硬兼備。
食完第一轉「生冷嘢」過後，搵啲餐湯暖暖身，明明初頭記得喺野菌湯，話咁快無晒，到小弟拎嘅時候已變為甘筍湯，個湯做得幾滑，而且，甘筍味勁出，搭一個歐黑麥包及草脆餅，配點心水芝士，其實，平常淨喺咁食都可以當一餐。
凍海鮮（7/10）
一向啲人想回本就會晌凍海鮮度搶灘，亦喺盡見港人貪婪之地，因為見過有兩枱人，一趁長蟹脚翻貨，亳不留情就扒滿一整大碟。稍為貴價啲嘅只有長蟹脚，其次仲有青口、大蜆、凍蝦、翡翠螺，補貨較慢。
刺身、壽司、和食
雖然，小弟晌自助餐一向都好少食呢個類別嘅菜式，皆因質素普遍都喺普通貨色，不過，都稍稍介紹下。刺身有3款，包括三文魚、油甘魚及希靈魚，再另一邊有啲烏冬、冷麵、墨魚仔及什錦壽司。
熱盤（7/10）
由於客人太多，都好難咁慢慢影相，加上小弟今日狀態一般，食嘅嘢唔太多，唔能夠介紹得太詳細。熱盤嘢憑記憶及相片，大概有16、17樣左右，選擇唔少，足夠應付到絕大部份人嘅需要。
印度咖喱（8/10）
雖同屬熱盤嘢，但都專登分開嚟寫，因為真喺將食物區一角全擺放咖喱類食物，而且，更放咗清真認證證書出嚟，表示啲雞牛羊喺經過頌經，適合信奉回教人士享用。
烤肉（7/10）
由頭到尾，見佢都喺主要得燒豬脾，如果有多款西冷或肉眼就好嘞。
今日確實狀態不足，所以，熱盤類食物就唔多揀，只喺一碟過有啲凍海鮮、又有啲肉。因為試嘅嘢唔多，評論都未必全面，只可以講合格有餘。
池畔燒烤（8/10）
由於由電梯一轉就進入餐廳範圍，所以，好少人留意到出面泳池旁仲有一個戶外燒烤區，當中更提供原條燒魚，仲有雞翼、豬扒、烤野菜、菠蘿……等等。
因為都想食番多啲蔬菜，以及有我心水嘅燒菠蘿，所以，專登執咗碟烤蔬菜返嚟，熱辣辣嘅茄子、翠玉瓜、雞脾菇及燒菠蘿，晌冷天食就更感滋味。
甜品（8/10）
由門口位，再轉角嘅長枱，擺咗好多甜品，的的骰骰又有、原個裝蛋糕又有、中式西式兼備、即製班戟機啦……等等，概略目測，絕對超過廿款。
Dreyer's雪糕、Fruttato Gelato（9/10）
午餐都有呢兩個品牌嘅雪糕，算喺咁喇，而且，放滿兩大個雪糕櫃，口味亦有唔少，雖然狀態未喺十足，但點都要淺嚐番少少。
平常見我嘅自助餐食評，最尾就梗喺一大碟甜點，今回就只揀幾款心水款式。一向食開甜品嘅我，對今次嘅甜品都覺得唔錯，算唔上好高質，但做得有辦有眼，最鍾意喺個榴槤雪糕，勁榴槤味，不過，佢本身雪到好硬，真喺攤咗好耐先易入口。
飲品（9/10）
呢方面比唔少高星級嘅自助餐選擇多，除啡茶，一入門口位就有好多韓國樂天嘅罐裝飲品，任攞任飲，立時有啲似去咗食日式放題或任食韓燒，哈哈！
上番官網睇，假日嘅自助午餐正價要$298，但某啲信用卡最低做到65折優惠，折咗即喺二百頭，比起尖沙咀、銅鑼灣嘅星級酒店平一大截，老實講，整體質素就唔算好高，卻喺算多嘢食，咁嘅價，都算值搏嘅！
個人評分
味道：7/10
環境：8/10
服務：8/10
抵食：8/10
平均每人消費：HK$268
味道：7/10
環境：8/10
服務：8/10
抵食：8/10
平均每人消費：HK$268
餐廳資料：
濠餐廳 L'Eau Restaurant
沙田大涌橋路34-36號麗豪酒店3樓
2132 1040
濠餐廳 L'Eau Restaurant
沙田大涌橋路34-36號麗豪酒店3樓
2132 1040
沒有留言:
發佈留言