最吸引喺推出唔少優惠，不過，鬥快嘅就真喺唔夠人爭。
睇睇餐牌，一個寫住晚市套餐，分類為特色煲仔麵套餐、特色飯餐、特定單點小食，定價唔算貴，不過，小弟有個疑問，睇落全部單點，何來套餐呢？
而另一張餐牌，剛主要喺台式嘅一人鍋晚餐，5款湯底，5款火鍋拼盤，而所有拼盤均送一份新鮮蔬菜配紅藜白飯、魯肉飯或招牌麵，連台灣茶，若轉飲其他飲品有半價優惠。此外，配料亦可以額外追加。
最後一張餐牌喺飲品類，選擇唔多，但睇落都喺較健康嘅飲品為主。而點餐，就咁用支箱頭筆圈起要點嘅菜式就可以喇，簡單、清晰又環保。
晌門口，仲特別貼咗張介紹，講明佢哋大部份嘅食材都喺採購自台灣，務求做到真正嘅台式風味，而且，所有湯底都喺精心燉煮，唔落味精，唔用速成湯包，讓人食得安心。
基本餐具及紙巾已放晒晌枱，最鍾意喺咁，方便自由取用，唔使下下麻煩啲店員。原本打算嚟食煲仔麵，見啲一人鍋又有少少賣點，就不如兩樣都試吓，加多一客小食，夠晒3個人享用啦。
六順三寶 $36
寫到明有秘製雲耳、鹽酥花枝丸、鹵水大腸及豆乾，不過豆乾就無咗，換咗喺豬耳，但我哋都啱食。雲耳好爽脆，拌有少少醋香，花枝丸一貫台式，唔喺彈牙嗰種，但有魷魚味，而腸有鹵水香，卻唔會有豬臊味，豬耳則爽爽哋，整體幾好食。只喺賣$36，份量唔會碎濕濕，絕對食得過。
秘製紅燒雙牛麵 $52
煲仔麵我哋揀個雙牛，因為台式紅燒牛肉麵一向好食，而煲仔麵真喺堅用瓦煲仔上，晌凍凍哋嘅冬天，點好得過食住滾熱辣嘅湯麵。除咗牛肉片、牛腩，仲有好多配菜，如小棠菜、白蘿蔔、腐竹及冬菜……等等。
牛肉片好軟腍，牛腩亦好鬆化，充滿濃濃肉味；湯頭亦好香濃，卻喺濃而不濁，加上無落味精，唔會話飲完令人感到超口渴。
講到啲麵條，咬口得嚟又耐浸，兼且份量十足，前前後後，都可以裝成4碗，一個女生食相信都食唔晒。
特級牛肉拼盤 $108、龍蝦花膠湯 +$20
今餐表姨甥女話想豪少少，就揀咗特級牛肉拼龍蝦花膠湯，其實單睇整個份量，連埋飯、野菜，真喺唔止一個人嘅份量。
先試個湯頭，喂！真喺唔錯喎，個鮮蝦味都幾強、幾濃郁，湯內堅有唔少花膠添，浸過龍蝦湯，味道亦喺唔同啲。
雖然啲牛肉唔喺油花平均嗰種，但肉質不俗，入口腍滑亦富肉香。
除咗湯內有唔少雞脾菇之外，蔬菜碗內仲有金菇、生菜、蕃茄、豆卜、南瓜，夠多樣化。
我哋揀咗魯肉飯，試試質素喺點，佢哋啲魯肉，無咁多肥肉，又無咁油，最好就喺配藜麥飯，雖然藜麥唔多，但感覺點都健康啲。
洛神蜂蜜花茶 +$9
由於個一人鍋包一杯指定飲品，表姨甥女話台灣茶好似普通少少，所以，就加錢改為洛神蜂蜜花茶，佢話酸酸甜甜都幾平衡，加上洛神花有安神之效，感覺良好。
第一次試煲仔麵感覺OK，不過，其實都喺跟食一般嘅台式牛肉麵差唔多，只喺以瓦煲仔上枱。服務上，我覺得幾好，啲店員幾友善有禮，見我哋食完啲嘢都先幫忙收拾一下，不時問我哋使唔使加湯……等等，又無加一。
個人評分
味道：7/10
環境：7/10
服務：8/10
抵食：8/10
平均每人消費：HK$75
環境：7/10
服務：8/10
抵食：8/10
平均每人消費：HK$75
餐廳資料：
六順煲仔麵 Six Success
長沙灣福榮街571號地舖
2868 0248
六順煲仔麵 Six Success
長沙灣福榮街571號地舖
2868 0248
沒有留言:
發佈留言