簡單嚟講，一邊喺製作茶飲，另一邊就擺放多種特色麵包。先介紹吓茶飲呢邊，採開放形式，所以，見到師傅泡茶、沖茶、調茶……製作各式飲品。
而櫃前更擺放多款店家招牌飲品，目的都喺吸引路過嘅客人。
小弟趁等嘢飲時，睇睇師傅沖調飲品，前枱放咗好多茶葉、茶包、用具……等等，而沖泡嘅過程，更好似沖咖啡咁，茶葉嘅份量要量過，用高壓相沖泡，真喺一絲不苟。型格嘅師傅更解釋佢哋用咗以專利研發萃茶程式嘅萃茶機製作茶飲，發揮茶葉嘅最佳狀態，令味道更自然純正。
所以，呢度賣嘅茶飲，從餐牌所見，都頗為別具特色，分咗多種系列，如拿鐵、果茶、奶蓋、花茶……等等，選用來自台灣及世界各地嘅茶葉製作出精緻茶飲，定價$25-$45。最好就喺甜度有得揀，由正常嘅可減到得番3分甜度。
墨沏烏龍拿鐵 $35
若非身體有少少抱恙，首選喺會揀奶蓋系列，不過，呢杯熱飲都唔錯，打開杯蓋，面頭一層層奶泡，話佢似杯咖啡都有人信。入口，有啲似奶茶嘅感覺，但茶底唔會太濃，散發陣陣茶香。晌冷冷嘅街道上，拎住暖吓手，邊行邊飲，喺寒冬良伴。
另一邊區域，就喺陳列咗各款麵包，既然店方都想大家晌FB / IG打卡，當然好歡迎客人影相，既收宣傳之效，亦喺信心嘅表現，就算俾對手知道有咩麵包款式、定價，都唔怕你抄，喺怕你做唔到佢哋嘅質素。
既然店家大方俾人影相，就等小弟以相片介紹吓佢哋有咩產品，而小弟都喺第一次晌麵包店內肆無忌憚咁慢慢影。題外話，大家知唔知咩叫做軟歐包呢？小弟都喺上網查找吓，軟歐包喺近年晌台灣及內地新興起嘅名詞，其實喺指所做嘅歐陸式麵包，外表睇嚟好似好硬身，但口感卻喺煙韌而鬆軟。不單無添加，更會以特別嘅天然酵母嚟做發酵工序，務求令麵包嘅風味更有個性。
唔止大方俾你影，仲有多款麵包俾你試食，有啲已晌麵包櫃內切成小片俾你拎嚟試，亦不時有店員捧出一大籃麵包俾客人試試，款式更喺啲招牌包款添。
特登影影個包裝袋，因為袋背印有唔少溫馨提示，建議你點樣保存及回烤喺最好嘅。
爆漿珍奶軟歐 $15
佢哋每款包都有個名牌，唔單只得個名，更喺標明大概有咩成份，以及包款嘅特色，非常細心，更顯專業。據店員介紹，由於製作程序都幾繁複吓，所以，每日嘅供應都有限量。
切開就見到幾「爆漿」，先講包身，頗為軟熟，仲有陣陣茶香，而餡心喺紅茶吉士嚟，軟滑幽香，此外，啲黑糖白玉珍珠柔韌富黑糖清香，令整體嘅口感、味道都富層次，真喺幾得。
全麥鬆餅 $8
貪過癮又試吓呢一款鬆餅，都好特別架，喺用紅酒酵母嚟發酵，更描述到會有淡緻嘅酒香，真喺要試過先知。
口感一如大多數鬆餅咁，比較乾身、實淨，但極富麥香，搽啲牛油或果醬，配紅茶就最好。
髒髒之胖 $35
見到70%黑朱古力，就知道老婆一定鍾意，專登揀嚟俾老婆試試。而除了用上70%比利時松露朱古力、可可粉之外，內裡仲夾有忌廉芝士，並以天然酵母製作，絕對喺令人期待。
老婆第一眼見到個「嗱渣包」就嘩嘩聲，因為真喺勁大個，大過我隻手掌有多，而且，非常墜手。擘開個包就見到包心粗糙中見綿密，夾有好多忌廉芝士，而表面冚咗一層黑朱古力，灑上大量可可粉，所以，朱古力香氣撲鼻而來，咬落更加好似層「脆皮」咁，味道帶甘苦，麵包嘅口感極有「軟歐」嘅個性，咬落韌韌哋，卻喺軟綿綿，唔會一陣風咁，忌廉芝士嘅鹹香味更有畫龍點睛之效。
雖然只喺試咗佢哋幾款包，但無論用料、製作，以至材料配搭，都盡見心思及誠意，怪唔之得咁多人嚟潮聖。加上天然、健康，款式夠特別，真喺值得麵包控走一趟過嚟試試。
個人評分
味道：9/10
環境：7/10
服務：8/10
抵食：8/10
平均每人消費：HK$35
味道：9/10
環境：7/10
服務：8/10
抵食：8/10
平均每人消費：HK$35
餐廳資料：
微酵烘焙 Share le Pain
銅鑼灣告士打道280號世貿中心2樓207-208舖
2328 0178
微酵烘焙 Share le Pain
銅鑼灣告士打道280號世貿中心2樓207-208舖
2328 0178
沒有留言:
發佈留言