四季餅店 Seasons Patisserie：好友狂嚐曲（81）

有位食友，真喺非常有小弟心，雖然，近年少咗一齊食飯，但年年佢都總會送上少少生日賀禮俾我，今年又收到一份嚟自「四季餅店」嘅曲奇。其實，呢盒喺「聖誕曲奇」嚟，由於聖誕過後無耐就喺小弟生日，所以，先出現聖誕禮物賀生日咁趣怪現象，補充一句，份禮物查實喺晌聖誕前收，故亦當埋喺聖誕禮物。

對「四季餅店」認識唔深，今次都喺第一次接觸佢哋嘅產品。不過，有樣嘢都幾奇，成份就表明喺「無添加」，但睇睇食用期話可以去到3月，真喺有少少疑問喺咪可以放咁耐。

打開餅罐，既然喺聖誕曲奇，有聖誕老人及雪人嘅擺設都好正常，而且，襯起嚟亦幾美觀。

內裡朱古力牛油曲奇及香蕉朱古力片裝曲奇整齊咁排列，各款口味均有10塊。其實，睇完罐底嘅標籤，都唔知喺咩口味，喺上番官網八一八吓先知。

朱古力牛油曲奇（8/10）

呢款喺唧花曲奇，塊塊都唧得靚仔，唔會巖巖巉巉，而且，朱古力味頗為香濃，口感好鬆化，簡單而好食。

香蕉朱古力片裝曲奇（6/10）

呢款唔講真喺唔知有香蕉元素，就算標籤有標明香蕉成份，都真喺唔覺有任何蕉味，我專登食多幾塊，仲慢慢嗒真啲，都食唔出，還好嘅喺曲奇本身好脆口。

撇除無香蕉味個問題，兩款曲奇本身嘅質素喺有啲水準，但始終對款香蕉朱古力曲奇喺有啲期望，故此，總分方面點都要扣分。

個人評分
味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
四季餅店 Seasons Patisserie
九龍城衙前圍道136號A5舖
2383 3155