家傳滬曉 China House：滬有不足

近呢一、兩個月到訪過多家上海菜館，包括：「稻成京川滬」、「上海婆婆336」及「王家沙」，而最後分享嘅一家喺位於美孚嘅「家傳滬曉」，其實喺老婆同姨仔幫小弟賀牛嘅生日飯。但講起嚟都失禮，話晒美孚都算喺小弟嘅主場，而呢家上海菜館都開咗好多年，但就一直未嚟過幫襯。

晌美孚，上海菜館就唔喺得佢一家，不過，以佢為較高格調，走進餐廳，極豐中國色彩嘅裝潢，以紅色為主調，掛滿特色嘅吊燈，令燈光柔和，加上通花屏風做裝飾，突顯中國元素。

大堂中大多數喺4-6人枱，最鍾意喺卡位，舒服好坐，又自成一角。而靠牆一邊，則喺啲大圓枱，喺大棚人嘅選擇啦。

餐牌好大本，亦好難影，好在晌門口有啲菜式單張，掃描晒出嚟就一清二楚。如一般中菜館，選擇非常之多，由頭盤、鮑參翅、湯、海河鮮、家禽、豬牛羊、田園蔬菜、飯麵、點心，到甜品，應有盡有，一應俱全。

此外，仲有多款套餐，由2位到12位都有。雖然計落套餐喺底，但我哋3個人，又想自主啲，所以，都喺散點。

上海小籠包 $55

一客5個，外觀望落啲皮就唔喺好薄，咬落又確喺如此，而且，摺位更喺好厚吓，影響個口感。但還好嘅喺啲肉餡好鬆化，兼且多汁，味道上喺唔錯。

脆皮素鵝 $65

叫得脆皮，果然無老作，碟素鵝炸到金黃，一咬嗰下真喺脆到咔咔聲，腐皮碎掉到一枱都喺，內裡仲夾有冬菇絲增添食味，唯個人就覺得佢有少少油膩啫，幸而沾少少醋就抵銷晒啲油膩感。

南瓜白雪 $75

個名就夠晒靚嘞，查實喺咩嚟？咪就喺加咗啲南瓜粒、青豆粒嘅賽螃蟹囉，貪佢夠清，啱晒老婆食。啲蛋白白皙光亮，的確炒得嫩滑，沾少少浙醋，就如白皙嘅肌膚塗上胭脂，清爽好食又健康。

砂鍋雲吞雞 $160

呢道菜既可以當餸，又可以當湯水，人少少就揀半隻，已經可以每人分到兩碗湯，當喺飲多碗湯水，如果揀全隻就要$320。先講個湯，鮮甜得嚟又好清，意思即喺唔會好油、好濁，而整件雞由店員撈出嚟，足半隻，可謂童叟無欺，難得啲雞肉又一啲都唔嚡，幾好食，配合埋包足料嘅雲吞，抵食。

野菌炒年糕 $98

呢道炒年糕就最能體現上海菜嘅濃油赤醬嘅神髓。年糕入口煙韌有咬口，醬汁個味道好濃郁，而年糕中混入好多野菌及紹菜，全素菜式，最啱我老婆。

值得一提喺菜水唔喺普通嘅香片、普洱，而喺四寶茶（$12/位），味道比較幽香。上海菜都有唔少甜點，不過，無食到就埋單離開，皆因老婆預備咗個精緻蛋糕，另文再講。

味道：8/10
環境：8/10
服務：8/10
抵食：7/10
平均每人消費：HK$180

餐廳資料：
家傳滬曉 China House
荔枝角寶輪街1號曼坊地下G06-07號舖
2266 0022