鮨川 Sushi Kawa：丘．之良品

晌2018年，當然到訪過嘅日本餐廳確喺唔少啦，不過，專做「廚師發辦」（Omakase）嘅壽司店就只去過紅磡嘅「鮨文」及銅鑼灣嘅「道鮨」，兩次嘅「廚師發辦」都讓人印象深刻。今晚嚟到「鮨川」享受刺身及壽司嘅「鮨」味，同樣喺一餐美味及藝術嘅體驗。

餐廳佔商廈一整層，所以，地方其實都唔細。而一出電梯就喺餐廳，一眼望到嘅就喺U型嘅壽司吧枱，喺全場晒搶手嘅位，皆因可直接睇到師傅嘅手勢。

而環境整體予人有氣派，卻不俗套，除吧枱，近窗一邊就喺啲4人枱，而再走入少少，可以講喺一個廂房。店員都好貼心，會主動提供藤籃俾客人放背囊或手提包。

枱上嘅擺設、餐具都精緻優雅。

除一般散點，相信大多數客人嚟到都喺選擇「廚師發辦」菜式，而餐廳提供3個價錢嘅「廚師發辦」，分別喺「雲」（$1,080）、「丘」（$1,380）、「川」（$1,680），當然，需加一服務費啦。

而小弟今次所試嘅喺中價位嘅「丘」，理論上就包括前菜三點、廚師特選刺身、料理、壽司、手卷、吸物及果物，不過，師傅話今日有啲靚魚返貨，算喺自動升級，多咗刺身嘅菜式，省略手卷一環。

前菜三點

食日本菜其一亮點，就喺賣相定必精緻，先登場嘅「前菜三點」，唔使講，既精緻，配搭又見特色，擺放夠立體，認真賞心悅目。而師傅更特意提醒，由淡至濃喺最能感受到味道嘅層次。

湯葉配海膽，若非師傅介紹，小弟就實會叫佢做海膽腐竹。建議將兩者一啖放入口，因為既能細嚐特製腐竹嘅豆香，又食到海膽嘅淡鮮，黏滑細膩，好有趣嘅組合。

中間一道喺鮟鱇魚肝，師傅強調佢哋嘅魚肝喺自家原條鮟鱇魚嚟做，唔喺現成貨。灑下少少蔥花及辣蘿蔔蓉，讓綿密嘅魚肝添上一份清香，而底下嘅醋汁，令魚肝食起嚟感覺更輕盈。

最後要試嘅一道前菜，喺味濃嘅芝士西京燒，將忌廉芝士塗上醬汁嚟燒，都幾新穎嘅做法。芝士口感非常軟綿，味道香濃而帶點點焦香。

都話最好喺坐吧枱位，睇住師傅做菜，又能欣賞其刀工。晌享受前菜之祭，不知不覺間，師傅已為稍後享用刺身、壽司作好準備，就喺預備好酸薑片、紅酒橋頭、醬油漬牛蒡及漬蘿蔔，作為每道菜嘅間場，又有清清味蕾之效，更擺設得好有藝術感。

左口魚薄切

前菜過後，開始以廚師特選刺身打開序幕，一道「左口魚薄切」，賣相漂亮，絕對體現出師傅刀工，因為片片刺身薄透清澈。沾少少酸汁，更能吊出本屬清淡嘅左口魚魚嘅鮮甜味，而刺身上本灑下少許柚子青，故能嗒出柚子帶嚟嘅清新。

油甘魚刺身

油甘魚喺刺身、壽司嘅常客，咪睇小兩件油甘魚刺身，不單色澤光亮，唔會暗暗啞啞，喺新鮮度嘅明證，而且，切得厚薄均一，入口魚味足，又柔嫩，口感帶少許爽。

粒貝刺身

唔喺單單切成刺身就算，貫徹賣相要夠精緻。啲粒貝本身已灑下即刨岩鹽及新鮮檸檬汁，故此，乜都唔使沾就可以放入口。貝肉十分爽口，卻又帶點韌勁，喺跟食魚刺身嘅另一種體驗。

牡丹蝦刺身

一向都以為嚟自日本嘅牡丹蝦本已喺靚貨，但師傅上菜時，就特別介紹呢啲牡丹蝦喺俄羅斯貨，一樣喺顏值高，質素好。睇落外觀真喺好靚，既有光澤，又夠厚肉，一啖入口，肉質黏黏咃卻又有啲爽身，最神來之筆喺糝咗唔少以蝦頭、蝦殼、蝦膏烘乾再自家研磨嘅蝦殼粉，鹹香味勁突出呀。

深海池魚刺身
最後一道刺身喺深海池魚，色澤帶淡粉紅，保持一貫光澤亮麗，食落肉質嫩得嚟帶爽口，魚鮮味頗突出。好奇都問問師傅，點解總喺刺身上鎅幾刀，師傅解釋都喺美觀啲而已。

清湯煮鮟鱇魚
料理方面，大多數會喺啲肉類料理，不過，師傅話啲鮟鱇魚新鮮返貨，故除前菜三點嘅「鮟鱇魚肝」，晌料理一環再加個「清湯煮鮟鱇魚」，正好為食咗咁多道「生冷嘢」嚟暖暖胃。個湯湯色清澈而鮮，最特別加入絲絲柚子皮，令味道有種幽香，除有鮮嫩嘅鮟鱇魚之外，仲混有唔少野菜。

針魚壽司

見到師傅又再切啲漬物擺上碟，就知喺壽司時間到。先嚟有針魚壽司，壽司外形真喺好靚、好流線，猶如銀色快艇般，鎅花亦非常工整。針魚本身屬於淡味，但魚身帶點柔韌，伴上薑蓉、蔥花，有份小清新嘅感覺。

石垣鯛壽司

霎眼望埋去似件油花十足嘅霜降和牛添，而面頭灑滿日本烏魚子，以及少少俄羅斯黑魚子作點綴。但入口，意外咁有油香，而魚子嘅鹹香，令味道更具層次，好食。順帶分享埋啲壽司飯，份量剛好，而且，鬆軟卻唔易散，飯粒黏糯。

海膽壽司

海膽壽司做成「開放式」軍艦，所以，一睇就知落咗幾多海膽。以北海道馬糞海膽入饌，海膽味道甘香豐腴，質感綿密細膩。師傅千叮萬囑最好盡快食，因為紫菜好易變腍，入口果然咔嚓一聲咁脆。

喜之次壽司

印象中，喜之次嘅一夜干就食過，但刺身就好似未曾食過，而今次嘅喜之次壽司就以火炙處理，所以，變得額外富油香，肉嫩而帶膠質。再晌上面放擺少少俄羅斯黑魚子，令矜貴嘅喜之次變得更高檔。

拖羅壽司

食咗幾款特色嘅壽司，來一客貫見嘅「拖羅」，雖然喺貫見，但絕對都喺靚貨，睇到色澤均勻紅潤，閃爧爧無暗啞，放入口腔，一樣油潤無比，柔嫩味鮮。

海鰻壽司

最後一道壽司，師傅揀嚟「海鰻」，並用咗醬油漬，故味道較濃，加上海鰻相對夠油膩，因此放在最後。海鰻壽司做的小巧，肉質有種入口即化嘅感覺，食到尾，一樣讓人感到滿足。

鮑魚清湯

壽司過後，就喺一道吸物，讓人感到暖意窩心。吸物喺簡單嘅鮑魚清湯，咪睇佢個樣好清，絕對唔喺「淡茂茂」，湯中嘅鮑魚片好有咬口。

北海道蜜瓜

果物喺北海道嘅名物「蜜瓜」，睇見鮮橙紅色嘅蜜瓜肉，喺一份期待，而高甜度嘅瓜肉，嗰份甜喺自然而不造作，正正為今餐有個完美、甜蜜作結。

由於全程喺師傅直接招呼，佢會睇住我哋嘅進度而上菜，所以，食得非常寫意，當然仲有其他店員熨貼嘅招呼，如添茶、收碟，都恰到好處；而且，所有刺身、壽司，啲魚生晌溫度上嘅處理，均值得一讚，因為入口時唔會太凍，亦唔會好似擺耐咗攤暖咁。故此，對整體嘅服務，都十二分滿意。

個人評分
味道：9/10
環境：8/10
服務：9/10
抵食：8/10
平均每人消費：HK$1,520

餐廳資料：
鮨川 Sushi Kawa
銅鑼灣渣甸街66號亨環17樓
2988 8355