此外，餐具亦喺佢哋別出心裁嘅擺設之一，碗底瓷雕咗一條小魚，襯晌湖水藍嘅餐碗內，甚有栩栩如生嘅感覺。
菜式就唔多講喇，拎咗張點菜紙，掃描後貼出嚟，一眼睇晒有咩選擇，查實菜式種類都非常多選擇。順提一提，茶芥每位收$12，另設加一服務費！有過上次經驗，今次醒喇，分開點菜，唔會一次過嗌晒冷盤、點心、菜蔬、主食……等等。
另外，時近過年，多咗個「豬頭」撈起，意頭價$388，可4-6位用，不過就無寫供應期去到幾時啫。
沙薑蔥雞 $69（散點價）
冷盤前菜有「拼盤」組合（$119），A組選2客，B組選一客（例牌份量），比散點慳咗$48。B組我哋揀個「沙薑蔥雞」，上次都有點，喺傳統嘅樣，但今次嘅做法唔同晒，喺以雞卷形式做成，就好似日式嘅叉燒咁，初時都以為嚟錯，都有問清楚先架。啲雞肉都幾滑，不過，真喺無乜沙薑味，只喺得啲蒜味而已。
皮蛋豆腐 $49（散點價）
呢道菜盡顯刀功，啲豆腐厚薄均一，更排列得工整，食手工都抵啦。中間放咗啲皮蛋碎、蔥花、紅椒粒，淋上胡麻醬，極體味道唔錯，不過，嫌啲皮蛋裁得太細碎，缺少皮蛋應有嘅口感。
七彩茄子 $49
本來想點「橙棍冬瓜」，但我哋已經喺7點嚟，都話賣晒，退而求其次揀咗「七彩茄子」。唔知「七彩」意義何在，唔通喺好食到七彩？只屬一道平穩嘅冷盤涼拌茄子而已，食味普通，還好嘅喺茄子嘅軟腍度啱啱好。
睇住流奶 $49
本來打算叫多幾款特色點心，但唔喺賣晒，有啲就喺5:00pm前供應，最後，啱食又有貨嘅就只得招牌嘅「睇住流奶」。個包仍然保持到水準，造型有趣，包身軟熟唔黏牙，流沙奶皇餡夠多夠濃郁，不愧為店中招牌點心。
干媽蘿蔔 $59
睇個名都應該估佢喺「老乾媽」辣醬炒蘿蔔糕，啲蘿蔔糕裁得較大粒，同埋先煎過再炒，既有口感又香口，不過，老老實實，真喺唔點辣，所以，啱我呢啲唔多食得辣嘅人，但食得辣嘅就嫌佢無刺激感啫。
龍鬚芥蘭 $89
一餐飯點都要搭個菜架嘞，「龍鬚芥蘭」夠霸氣，其實，只不過喺蒜蓉炒芥蘭，但就將芥蘭切成齒狀，有點龍鬚嘅感覺，食味都OK嘅，爽爽哋又唔會一口渣。
辣蟻粉絲 $79
其實就等同滬菜嘅「螞蟻上樹」，都喺肉碎灑上粉絲度，辣辣哋，入口頗為惹味。欣賞佢粉絲唔會炒到黐埋一嚿，喺有啲油膩啫。
恐龍排骨 $99
個名夠勁，所以，點咗一客嚟試吓咩料，其實喺酥炸搵蝦醬醃成嘅肋排，大大件肋排，令人食得過癮，蝦醬又會令味道份外滋味，不過，小弟都算食得鹹吓，都覺得勁偏鹹，就算唧埋啲青檸汁，都喺鹹啫。
安格牛河 $119
本來晌主餐牌見到有款安格斯牛柳粒炒飯，正確菜名就唔記得喺乜，但店員無晒，反而建議我哋揀點菜紙中嘅「安格牛河」，算啦，細佬話牛河都OK。平心而論，個牛河真喺炒得唔錯，唔算油，而且，啲牛肉軟腍富肉香，不過，賣到百幾蚊卻喺份量唔太多。
甜品一環，一來款式唔多啱細佬妹口味，二來相對唔平，不如過隔離「滿記」食仲划算。對比起同類嘅餐廳「唐宮小聚」，因為幾個月前先去過，較好比較，覺得「唐」都喺稱心啲，「飲茶」仍有好多不足嘅地方。
個人評分
味道：6/10
環境：7/10
服務：6/10
抵食：7/10
平均每人消費：HK$182
味道：6/10
環境：7/10
服務：6/10
抵食：7/10
平均每人消費：HK$182
餐廳資料：
飲茶 Yum Cha
旺角亞皆老街8號朗豪坊4樓7號舖
2818 1099
飲茶 Yum Cha
旺角亞皆老街8號朗豪坊4樓7號舖
2818 1099
沒有留言:
發佈留言