喜鍋 Hey Pot：一喜去滾

雖然話依家食火鍋喺唔分季節，不過，天寒地凍時食喺別具風味啲，趁住驟冷少少嗰幾日，同友人嚟到「喜鍋」打打邊爐，「喜鍋」喺一位食友嘅心水推介，佢食過之後，大讚呢度用料靚，尤其牛肉，非常出色。

店鋪位處旺角嘅上海街，可謂旺中帶靜嘅地段。甫進入餐廳，地方睇落唔太大，其實仲有樓上，不過，小弟就無走上去，唔知有幾大。但整體環境裝修骨子，企理乾淨，牆上貼有巨型嘅黑白香港懐舊照，對後生一輩相信感受唔大。

坐低無耐，店員就遞上醬料架，有蔥花、生蒜、辣椒油、辣椒、熟蒜、麻醬及豉油，雖然陣容唔叫得強勁，但就啱我心水嘅醬料，收費每位$10，唔要都收架啦，唔夠亦可以再添。

如果大家入門口前，有留意鋪面嘅店名，就會見到喺「海鮮、火鍋、小廚」，門口旁就架設咗幾組大魚缸，內裡有不少生猛海鮮。另一方面，就提供好多餐前小食。

此外，更好多嘅人氣之選，小食、刺身、湯底、火鍋配料都有包括到，如諗唔到揀乜，就不妨喺度落手。

而講到食火鍋，湯底當然喺一家火鍋店嘅亮點，仲有，火鍋配料嘅種類、特色，都喺好重要，詳細就唔寫出嚟嘞，貼上佢哋嘅火鍋點菜紙，就一眼乜都睇晒，有埋價錢俾大家參考。

牆上不時貼有啲時令菜式或特價海鮮嚟吸客，今晚，就見有蟶子皇、大元貝、鮮鮑魚喇。

最後，順便介紹埋啲飲品，啤酒就唔使講啦，食火鍋嘅好朋友，此外，仲有紅白餐酒，健康啲嘅可以揀竹蔗馬蹄茅根、酸梅湯。

竹蔗馬蹄茅根 $38 / 渣

店長強調喺自家製，睇樣就知喺足料嘅好嘢嚟啦，玻璃樽內睇得出喺真材實料，味道清甜自然，冰涼解渴又清潤。

日本胡麻醬冰菜 $38

點好鍋底，都知無咁快有得食，所以，點一客餐前小食，因為一陣都食肉多，所以，就揀咗新出品嘅「日本胡麻醬冰菜 」，啲冰菜真喺好似有啲冰珠晌面，頗得意，入口勁爽脆，拌以胡麻醬，味道唔單調。

招牌花膠鯊魚骨膠原湯鍋 $188

打邊爐湯底喺靈魂之一，揀咗人氣之選嘅「招牌花膠鯊魚骨膠原湯」，並奉送一小桶甘香泡飯。湯底睇表面就梗喺平平無奇啦，但撈兩嘢就知有幾足料，無正式數，但啲花膠頭頭尾尾夾埋都有成6、7件，仲要件件都好大塊。

講到明足料，就梗唔喺齋得花膠，仲有雞腳同豬手，兩樣都煮到腍，食味唔差喎，而豬手同樣有好多骨膠原添。趁落火鍋料前，就梗喺先呷啖湯啦，咁精華，點可以錯過呀。確實，個湯底就咁淨飲，都好香甜，夠晒滋補，有種老火湯嘅感覺！

手打五寶丸 $88

多心嘅人就梗喺揀五寶丸啦，一碟過試勻店家嘅招牌自家手打肉丸：牛肉丸、豬肉丸、鯪魚丸、鮮蝦丸及墨魚丸。牛肉丸打到起筋，夠爽口；豬肉丸打得鬆化，混入冬菜，別具風味；鯪魚丸好爽身，鯪魚味濃郁；鮮蝦丸入口寧舍彈牙，極富蝦鮮味；墨魚丸則以墨魚味豐厚為主，口感無牛肉丸、鮮蝦丸嗰類咁爽身。

霜降手切肥牛粒 $128

心思思梗喺想上牛魔皇塔啦，但無4、5個人一齊都食唔晒啦，反而，未試過搵牛肉粒嚟打邊爐。上到枱，啲牛肉粒嘅油花好靚仔，不負霜降之名，店長提醒話比薄切嘅牛肉片灼耐少少，但估唔到，好似我哋穩陣啲灼耐多少少，入口都唔會韌，且甚有油香，肉味亦都不俗，掂喎！

雜菇拼盤 $48

老套啲都要啦，加份蔬菜籃平衡吓，喺自我感覺良好嘅選擇。不過，除蔬菜拼籃，仲有雜菇拼盤，結果我哋揀後者，都真喺有好多款式。

甘香泡飯

桶內其實喺炸過嘅飯粒，就咁食會好硬架，但倒入濃湯後，飯粒變軟，又吸收咗啲濃湯，味道特別正。但有兩點心得，一就喺如果你食嘅火鍋料喺太多肉，令個湯太油，就先撇咁啲油再下湯，其次，飯粒浸一陣就好喇，因為，食到飯粒外層濕濕哋，飯心就煙煙韌，幾有種食意大利飯嘅感覺。

食埋個泡飯，真喺飽到上心口，而成餐飯都食得出店家用料精，唔喺嗰啲任食任飲嘅火鍋可比，當然，收費喺成正比嘅，但你會覺得物有所值。最後，都講少少服務，店員招呼有禮，不時問我哋使唔使加湯（堅喺加湯，唔喺清水嚟），見我成碟都喺骨頭，主動幫手換碟，就算有啲貴價嘅靚火鍋料推介，卻唔會成纏你硬銷，最鬼憎啲酒樓經理乜都話好好好、出面食唔到架喇嚟硬銷。

個人評分
味道：9/10
環境：7/10
服務：8/10
抵食：8/10
平均每人消費：HK$300

餐廳資料：
喜鍋 Hey Pot
旺角上海街428號地舖
2766 1378