肉餅哥小炒料理 Meat Pie Gor：從心所肉

公共屋邨嘅「冬菇亭」我原以為會賣少見少，拆一個邨，就少一組，不過，近十年八年啲新屋邨，預留咗地方容納「冬菇亭」，不過，形態都跟80年嗰啲唔同晒。小弟細個時晌大坑東返學，南山邨嘅「冬菇亭」就喺經常出沒嘅飯堂，嗰度就仲保留舊式「冬菇亭」，一個「冬菇」有幾檔餐廳，不外乎粥檔、茶記及車仔麵嘅組合，全開放型，無冷氣。依家嗰啲「冬菇亭」直頭喺間鋪頭啦，一菇一鋪，有裝修，有晒冷氣，就好似今晚嚟到嘅「肉餅哥」。

由大圍開始發跡，再晌荃灣插旗，但估唔到嚟到「樂華邨」開檔。走入店內，其實，跟一般屋邨餐廳無分別，水泥地配簡單嘅裝修，而且，地方頗大，客源都喺屋邨街坊居多，所以，牆上掛起大電視方便大家電視撈飯。

既然店名冠以「肉餅哥」，主打就梗喺肉餅啦，肉餅基本分兩大類，一喺煎，香口啲，一喺蒸，腍滑啲，配搭有傳統，亦有創新。多款套餐選擇，連老火例湯及白飯，都喺由$49-$128，豐儉由人。亦可以選擇升級為菜飯、薄餅或配湯米線，更可優惠價加配飲品。

潮流興食素，就連「肉」餅都有素嘅，早前晌「Green Common」就試過一款「新豬肉（Omnipork）」，估唔到呢度都有，兩款「新豬肉」肉餅定價唔貴，都喺$49，抵食喎。

此外，睇埋餐牌其他部份，仲有好多小炒供選擇，如精選推介、新鮮時蔬、蒸明之選、椒鹽系列、麻列系列、滑蛋系列、鑊仔小炒、煲仔菜系列、中式湯羹、特色肉餅，喺咪選擇非常之多呢！

仲有秋冬禦寒羊腩煲及雞煲，食完可以再嗌啲配料嚟打邊爐，一舉兩得。

既然喺街坊餐廳，梗喺會做得益街坊，所以，想慳慳哋都無問題，揀晚市套餐就最上算，定價$58，奉送老火湯，唯可惜飲品需加配。

飲品方面，大多喺茶記選項，所以就唔多講，另外，亦帶啤酒供應，大可叫啲香口嘢嚟餸啤酒。

青紅蘿蔔煲豬骨

一坐低就即刻送上是日例湯，質素唔可以話高，亦唔差，落足料，味道家常。

金沙蛋黃煎肉餅 $72

可能臨近農曆年，近期周街都見到唔少餐廳推出啲「金沙」菜式嚟賀歲，而煎肉餅菜式中亦有一道「金沙煎肉餅」，更喺招牌菜之一，當然要試試，而我哋更+$2改為菜飯。

無論啲菜飯，抑或件肉餅，都份量十足，先試試啲肉餅，果然做得有水準，煎過嘅肉餅外層帶點脆口，而咬落肉餅都好鬆化，唔會死實實，配以起晒沙嘅鹹蛋黃蓉，鹹香惹味，口感一流，當然，膽固醇之憂就要擺埋一邊啦。

椒鹽田雞 $98

呢道亦喺推介菜式之一，而椒鹽系嘅小菜，一向人見人愛。同樣，份量交足貨，好抵食，而田雞炸得甘香不膩，但就有啲嫩滑，有啲就無咁滑。另外，啲椒鹽明顯喺灑晌炸好嘅田雞之上，並非跟田雞一齊兜一兜，故此，中間嘅田雞就惹味啲，外圍嗰啲就變得味寡少少，呢方面可以改善吓！

熱奶茶、柑桔蜜 +$6

茶記就梗肯揀奶茶啦，呢個喺個人感覺，杯熱奶茶幾香，茶底確喺不俗，但個人嚟講，就始終未夠絲滑。

如果對肉餅情有獨鍾嘅朋友，「肉餅哥」真喺幾好，因為選擇多，具特色。而呢間「肉餅哥」更供應好多大排檔式嘅小炒，所以，講到尾，嚟到食乜都有，真喺可以從心所欲。

個人評分
味道：7/10
環境：6/10
服務：6/10
抵食：8/10
平均每人消費：HK$91

餐廳資料：
肉餅哥小炒料理 Meat Pie Gor
牛頭角振華道70號樂華南邨冬菇亭
2788 3331