摩登廚房 Moderno Kitchen：摩登．茶記

近排因家事過嚟長沙灣都較頻密，是夜處理完事情就隨意搵個方食晚飯。其實一入夜，荔枝角呢段青山道都幾鬼靜，晌街角好易發現到「摩登廚房」，皆因佢門面「燈火通明」。晌門口睇睇有咩啱食，發覺茶餐廳得嚟，啲菜式又好似幾特別，就放膽入內試一試。

餐廳環境喺茶記格局，但裝修算幾骨子，貼上仿磚牆嘅牆紙，燈光夠晒光猛，環境又整潔，雖無咩特別，但感覺唔錯。尤其卡位，設為皮椅，讓人坐得更舒服。原來餐廳新開無耐，客人亦唔多。

抱歉，張環境相影懞咗！

餐牌製作簡單，都喺好手作仔嘅製作，套上膠片再圈起去。有早餐、小食、下午餐、全日餐……等等，詳細就唔講喇，主要講講個晚餐啦。一共有5款，賣$68/$78，包熱飲一杯。

晌晚餐中，其中一款叫「每日廚師精選」，店主解釋喺大廚每日晌街市見到有咩好食材就用嚟做菜。今晚，就喺燒雞配沙律及薯角。

燒雞配摩登沙律及薯角 $78

份燒雞外觀睇落有板有眼，而睇隻雞嘅大細，比春雞大隻啲，但又唔會喺幾斤重啲大雞，燒得甘香，上枱時都聞到，而外皮真喺香脆，肉質就中規中矩，而較大嘅問題喺醃得唔平均，少部份位置有過鹹嘅情況。而摩登沙律唔好太着重個字眼，「摩登」只喺餐廳名，個沙律正正喺八十年代嘅款式，甘筍、薯仔、青瓜……撈卡夫奇妙醬；薯角更搭埋懷舊嘅曲紋薯條，所以，啲沙律同薯條好有兒時嘅味道。

黑松露鮑魚花膠燉飯 $78

燉飯以原煲上，睇見個燉飯，就知喺台式做法，因為無下芝士，個汁底亦唔會好忌廉咁款，而最明顯喺米心唔會好似意大利飯有少少硬心，入口猶如食湯飯嘅口感。個飯本身好大份量，兩個人「些牙」食都夠；鮑魚及花膠都無欺場，鮑魚咬落更喺煙韌有鮑味，花膠亦有咬口；唯一挑剔喺黑松露嘅香氣好有限，就算加入好多雜菌，都無預期咁幽香。

熱檸茶、熱檸水

甚少嚟茶記唔飲咖啡、唔飲奶茶，皆因早餐、午餐都已經飲咗兩杯，額滿即止，就飲杯熱檸茶。好怕啲咁細隻膠羹，根本好難篤散啲檸檬，又唔多環保。

店鋪原來開檔無耐，所以，環境非常新簇，店員都好有禮貌。雖然偏向喺茶記形式，但食物都見花咗啲心思，店主睇嚟都好有心做，因為見佢都有向啲客問意見，亦聽我「發噏風」，希望佢哋繼續進步，食物越做越好。

個人評分
味道：6/10
環境：7/10
服務：8/10
抵食：7/10
平均每人消費：HK$78

餐廳資料：
摩登廚房 Moderno Kitchen
荔枝角青山道514-516號地舖
2527 2260