聯冠餅店：Busy拔絲

完咗活動之後，因為身處葵興，老婆打電話嚟幫手買啲「拔絲蛋糕」，小弟都喺第一次聽有樣咁嘢。一講拔絲，以為喺咩上海嘢，落到「冠聯餅店」，先知喺源自台灣嘅產物，門口仲好多人排添。

晌排隊期間，打量吓間餅店，可以講前鋪後工場，見後面有工作人員不停製作，啲蛋糕不停新鮮出爐。

打量個環境時，除拔絲蛋糕，見有唔少特色產品，如紅棗蛋糕、香酥板栗餅、肉鬆小貝、髒髒包、蟹小方、椰子批、榴槤葡撻、黃金手撕麵包、皇家曲奇……等等。不過，見右旁嘅麵包櫃空無一物，落單時順口問問，原來，好多產品喺未推出，純粹擺住出嚟先。

講到主打，就一定喺拔絲蛋糕，因為，門口櫃檯面貼有兩張大海報介紹，話喺新鮮雞蛋與優質黃色肉鬆嘅美妙相遇，感覺就當然有啲誇張。但好奇怪，既然喺源自台灣，又喺香港開鋪，但就用晒簡體字，就連店名隔離都有個微信QR碼，「國企」味濃！

此刻，只有3款產品：拔絲蛋糕、榴槤葡撻及紅棗蛋糕，拔絲蛋糕唔使多講，點都要試試，而榴槤葡撻剛出爐，當然都要試吓，不過，紅棗蛋糕未出爐，又唔想等，所以，今次就只試咗前兩者，溫提：買滿$30先有盒。

榴槤葡撻 $12

原意無打算試，皆因最初就唔知佢有定無，晌排隊期間剛遇到有一底新鮮出爐，又無理由唔試啫，況且，小弟一向愛食榴槤，$12買個體驗，抵喎。因為「新鮮」關係，又焗得金黃，先搶到唔少印象分。咬一口，酥皮殼好香脆，撻餡好有蛋香，又滑溜，而榴槤味突出得嚟唔會太霸道，恰到好處。

拔絲蛋糕 $10 / 7個

無寫錯，真喺10蚊雞有7個，而且，每個唔細，有半隻手掌大細，啲人想要盒，買親都$30，所以，一底出爐，轉眼無晒，又要再等。但可以咁講，買到嘅都保證「新鮮」，故此，即場食番件先，不過，真喺越嚟越多人排，小弟都唔好意思企正門口阻人做生意，行出少少先試真啲。

其實點解叫「拔絲」，我都喺事後上網翻查先知，就喺當分開兩半時，啲豬肉絲所產生嘅「拔絲」效果。不過，我所試到嘅效果就算唔得太明顯，但件蛋糕本身做得鬆軟而有蛋香，久唔久咬到啲豬肉絲，鹹鹹哋，又有啲絲絲口感，確喺幾唔錯。再者，10蚊7個，就算普通雞蛋糕都抵爆啦。

咁多人排都唔喺無原因，兩款出品都做得有水準，雖未至嘩嘩聲，但計埋個價，性價比都喺相當高。

個人評分
味道：8/10
環境：6/10
服務：8/10
抵食：9/10
平均每人消費：HK$22

餐廳資料：
聯冠餅店
葵涌光輝圍45號嘉寶大廈地舖
9530 8532