軟橋米苔目餐廳：軟在天邊？近在眼前！

落開鴨記買啲嘢，就順便搵埋細佬食晚飯，佢話想食米線，醒記就晌鴨記有家小店「軟橋」賣米苔目，雖然跟米線唔同，當喺帶佢試試啲特色嘢。

「軟橋」位處鴨寮街，本應唔難搵，但門面頗窄，唔多起眼，招牌又晌頂一頂，好易過門不入，其實就喺遠在天邊、近在眼前。而鋪內形狀，可想而知呈長條形，都幾深架。不過，勝在夠光猛，環境企理，啲阿姐招呼亦殷勤有禮，比好多深水埗茶記啲招呼好。

除米苔目，原來佢哋仲有好多滋味小食，大部份小食都有真實相片貼晒晌牆上俾客人參考。

至於米苔目系列，就如車仔麵咁，基本包兩餸，配豬骨湯，大大碗定價$36。當然，加餸、轉湯底、轉其他粉麵都唔喺問題。好多人對米苔目都比較陌生，小弟都喺晌台東食過一次，但店員都好樂意介紹吓佢哋手造嘅米苔目。

想慳啲，都仲有選擇，另一個餐牌羅列出大堆單餸粉麵或淨餸，只賣$29。

涼拌蓮藕 $18

啲蓮藕薄切，片片厚度勻一，一咬好爽脆，咯咯聲。而搵蒜蓉、芝麻、蔥花，再加少少醬油做成涼拌，既感覺涼涼爽爽，味道鮮濃又好食。

蒜蓉鴨肉 $39

雖然無用「涼拌」一詞，但跟藕片做法一樣，同樣以蒜蓉、芝麻、蔥花，再加醬油作調味，所以，幾咁濃香惹味。最正喺啲鴨肉，質地軟腍鬆化，又有鴨肉香，卻唔會有鴨臊味，片片切得薄薄哋易入口。

牛肉、雞肉、米苔目 $36

無轉湯底，而個豬骨湯底味道唔錯，當然，唔會好似日本拉麵嗰啲濃到漿口，但香而不膩。至於啲米苔目，個樣有啲似銀針粉，店員更強調喺自家人手製作，無添加，入口有米香，但無預期咁有咬口感。牛肉及雞肉都落唔少，一啲都無手緊，仲伴有好多椰菜絲添。

台南豬手飯 $39

啲豬手以小砵盛載，頗有地道風味。有別平時港式麵檔啲南乳豬手，台南豬手霎眼望埋去啲似潮式，伴上鹹酸菜同黃豆。啲豬手炆得好化，皮下啲骨膠原非常厚身，整體味道唔錯。

蜂蜜紅棗茶 $10、忌廉 $8

飲品方面都喺啲港式或汽水，反而晌牆上見到有啲蜂蜜特飲，就試咗杯蜂蜜紅棗茶，細佬就鍾意飲忌廉。杯蜂蜜紅棗茶都幾大杯，啲蜂蜜幾清甜，但紅棗部份就算搞勻晒都唔算好突出。

深水埗區嘅居民佔大多數都喺基層，便宜嘅餐廳選擇都唔少，「軟橋」可以講喺其中一家。食完餐飯九點都未到，但鴨寮街啲小販檔近乎收晒，立時變得好靜。

個人評分
味道：8/10
環境：7/10
服務：8/10
抵食：8/10
平均每人消費：HK$75

餐廳資料：
軟橋米苔目餐廳
深水埗鴨寮街249號地下B舖
2795 2798