洪記海鮮酒樓 Hung Kee Seafood Restaurant：周中嘆茶

平常好少入嚟西貢，都喺因為路途遙遠，而且，近年越嚟越多人入西貢行山、去地質公園、到訪萬宜地質步道……等等，每逢星期六、日都幾塞車吓。雖然烈日當空，最高溫超過35°C，由於工作關係，都要走入嚟西貢郊區一轉。午餐跟負責人一同出西貢市中心嘅「洪記」飲餐茶，是日為閒日，成個市中心遊人唔多。

「洪記」叫得海鮮酒樓，又加上臨近海濱旁，食海鮮就梗喺主打。不過閒日晏晝，嚟嘅人都喺街坊多，嘆吓茶，一盅兩件咁。鋪前嘅半露天位，如果夠風都幾通爽，不過，我哋就揀咗上二樓，涼吓冷氣。上到去，其實，跟一般酒樓差唔多，但就多咗一排對海嘅大窗。

友人帶路，再行深啲，仲有啲房仔，午市都會開放，入面呢度勝在靜局啲，少騷擾，傾偈最好。

點心紙一張過睇晒，除咗一款金牌餐包，全部點心名都專登改為5個字，叫有啲心思，但都喺常見嘅款式，晌呢度唔會有太多花巧嘢。

點心分為小、中、大、特、頂點，價錢晌入門口位置或收銀櫃枱都會見到。

此外，亦有啲午市待價炒粉麵餐，送老火湯，睇佢定價都頗實惠，明顯都喺搶吓茶記生意。之但喺，茶位$7，又需加一，計埋都應該唔及茶記平。

另外，肯花多少少錢，又夠人多，就不妨試試午市優惠套餐，包老火靚湯、半隻鹽焗雞、一條清蒸海上鮮、兩款自選小茶，都喺$368，夠4-6人享用。

五香咸水角 $16

個阿姐幾好，幫手剪開一半。個外皮幾煙糯，但個人就覺得有少少厚，而且，餡料好味就好味，但偏少。

潮州靚粉果 $16

一客有3件粉果，個個都包得大個飽滿，雖然外皮唔喺話薄到好透，但入口唔覺厚，又唔黐牙，裡面好多沙葛粒，挺爽口，算做得唔錯。

蠔汁叉燒包 $16

講到喺蠔汁，唔知有幾堅，不過，叉燒餡做得惹味，醬濃味香，最緊要喺上枱時熱辣辣，包身鬆軟。

蜜味叉燒腸 $23

啲腸粉皮拉得厚就實在喺厚咗啲，但都算軟滑，而且，勁塞滿叉燒餡，又唔會太多肥肉，絕無欺場。

八珍糯米雞 $23

呢個喺小弟嘅是日推介，不單隻糯米雞夠晒大隻，裡面嘅餡料十足，有雞件、叉燒、臘腸、冬菇……等等，而且，味道做得香濃有水準，啲糯米又確有荷葉香。

整體而言，「洪記」嘅點心話差唔算差，話好又未至於超好食，算喺中規中矩，招呼唔錯，環境幾好坐。不過，始終今日喺閒日，一到假日就唔敢想像。

個人評分
味道：7/10
環境：8/10
服務：7/10
抵食：7/10
平均每人消費：HK$60

餐廳資料：
洪記海鮮酒樓 Hung Kee Seafood Restaurant
西貢海旁廣場兆日大樓地下6號及9-10號
2792 1348