雖然同樣叫做賣台灣菜，但絕對喺不一樣嘅台菜餐館，因為始終位處荷李活道、雲咸街一帶，加入酒吧元素，所以，近門口嘅霓虹招牌「我愛台妹」已成功吸引路人眼球，而店內環境摩登型格，一邊喺酒吧區，另一邊喺用餐區，氣氛輕鬆無拘束。
餐牌就喺一張好似枱墊嘅大餐卡（初時真喺以為枱墊，點完餐由侍應拎走先知唔喺），底面兩面，印有各類菜式，包括：涼拌小菜、台式蛋餅、鹽酥雞、夜市小食、青菜、鎮店滷味、鐵板酥皮蛋捲、魯肉飯、乾拌意麵及牛肉麵。
而另一張喺飲品餐單，既然「Check-In Taipei」有以酒吧定位，酒類飲品自然不少，如雞尾酒、清酒、啤酒、餐酒，唔飲得酒嘅可以揀台式特飲、牛乳、苦瓜汁或台式經典飲品。
近門口收銀處吊起有個細燈箱，寫住「苦瓜汁大王、綠豆沙牛乳專門店」字樣，所以，點都要試一試吓先。
綠豆沙牛乳 $48
晌台灣啲夜市，最常見就喺啲乜乜乜牛乳，而小弟最鍾意喺木瓜牛乳，友人則揀咗店家推介嘅綠豆沙牛乳，綠豆沙煮得好綿又起沙，綠豆味好突出，混入鮮牛乳，奶味濃郁，友人更讚其口感綿滑。
鮮芭樂苦瓜汁 $48
雖然小弟鍾意飲木瓜牛乳，但相反苦瓜汁就真喺好少飲，所以，貪得意先揀咗杯鮮芭樂苦瓜汁，芭樂即喺我哋慣叫嘅蕃石榴。色澤似甘蔗汁，但入口苦瓜味好出，帶點點甘味，然而，芭樂嘅味道就似有還無。
梅子蕃茄 $38我哋因為想慢慢食、慢慢傾，所以，先上啲冷盤及小食。梅子蕃茄率先登場，以梅子做嘅酸汁淋落新鮮嘅蕃茄上，蕃茄食落鮮甜多汁而有點點酸香，的確醒胃；啲洋蔥亦索晒啲梅子汁，故亦唔好錯過而唔食喔。
窩夫鹽酥雞 $65
鹽酥雞喺台灣小食嘅名物之一，唔使多介紹喺乜嘢嚟，而呢道窩夫鹽酥雞就稍作升級，墊底加片迷你窩夫，再淋上由葡萄醋混入楓糖調成嘅醬汁，令酥脆嘅雞肉味道更具層次，亦有去膩之效；最驚喜喺鹽酥雞底下仲有啲菠蘿蓉，令酥香中多一份清甜，果然頗有心思。
黑松露玉米蛋餅 $68我仲記得第一次食蛋餅喺晌高雄，蛋餅更喺台灣人傳統早餐食品之一。而呢度做嘅蛋餅雖然比較厚身啲，但質感軟軟綿綿，內裡塞滿清甜嘅粟米粒，似喺搵牛油炒過，因為有陣陣牛油味；蛋餅面層唧滿自家製黑松露醬，其實一上枱已散發出好香嘅黑松露香氣，入口就更加明顯嚐到黑松露嘅幽香味。
紫薯芝士乒乓 $75
對上一次嚟都有試呢道菜，好嘢自然就會仲保留晌度。因為做成球狀，所以叫乒乓，將麻糬加入紫薯蓉內搓成球，炸香之後外層香脆，內層煙糯，入口甚有蕃薯香；而整道菜灑滿巴馬臣芝士碎，仲一啲都無手軟，令芝士香氣更狂熱爆發，越食越過癮。
主廚牛四寶湯麵 $98
食咗幾道小食，喺時間搵啲粉麵墊肚，飽肚嘢都有幾多選擇，原條慢煮嘅牛肋骨湯麵夠氣勢，當然想試啦，不過，份量睇落太多喇。次選喺主廚牛四寶湯麵，除咗喺店家推薦之外，更因為一碗麵有齊半筋半肉、牛坑腩及金錢肚，心多嘅人就梗喺揀佢啦。
咪睇少佢，分完兩碗仲有剩唔少麵晌湯碗內，可講得喺份量十足，其實，唔只啲麵條，餸料亦非常足秤，件件肉都大大嚿，絕無欺場。牛筋炆得超腍，牛坑腩鬆化肉味濃，金錢肚好爽口，而且，幾樣嘢都極之入味，帶濃郁滷水香，怪唔得食物中有一項鎮店滷水啦。個湯底亦真材實料，濃而不濁，啖啖精華，不過，喺啲麵條有些微偏腍嘅情況，我就喜歡咬口啲嘅。
伯爵茶凍QQ芋圓 $58
甜品就只有一款，而且，仲喺好地道嘅款式添，由自家製嘅伯爵茶凍、台灣直送嘅芋圓及地瓜圓、檸檬愛玉、黑糖珍珠、綠豆，淋上花奶及煉奶組合而成，堆得豐富，兩個人共享就啱啱好。啲伯爵茶凍口感比較古怪啲，比果凍硬身啲，但嗰朕伯爵茶勁突出，芋圓及地瓜圓十分咬口，檸檬愛玉滑嘟嘟，黑糖珍珠就口感非常QQ，黑糖味香濃，食過再食都覺得好食。
今晚多道菜式都有心思及做得具水準，碗主廚牛四寶湯麵用料更見誠意十足。雖然環境有少少逼，但服務招呼周到，好似上湯麵時，幫我咃換過兩隻大啲嘅碗，到上甜品時，亦換上小碗，而且，按足指示上菜，唔會堆到一枱都喺嘢食。兩年半後再嚟過，水準無跌喎，今晚都只喺閒日都咁爆場，認真勢不可擋！
個人評分
味道：8/10
環境：7/10
服務：8/10
抵食：8/10
平均每人消費：HK$275
環境：7/10
服務：8/10
抵食：8/10
平均每人消費：HK$275
餐廳資料：
Check-In Taipei
中環荷李活道27號地下
2351 2622
Check-In Taipei
中環荷李活道27號地下
2351 2622
沒有留言:
發佈留言