奇華餅家 Kee Wah Bakery：端午，林林糉糉。

唔夠一個月就喺端午，應節活動睇扒龍舟我就興趣唔大，但講到食糉呢，就幾有興趣。雖然家下一年四季都有糉食，但一到端午，糉嘅款式就多到你想像唔到，啲酒店、酒樓、餐廳、餅店……等等，為咗搶佔生意，啲款式有幾新得幾新，真哋唔可以唔佩服師傅們嘅創意。今次想同大家分享兩款新品「糉」。

原粒栗子藜麥素糉 $60

舊年食過佢哋嘅「姬松茸藜麥素糉」，素糉口味就啱晒我老婆，今年又見佢出咗去素糉。睇佢包裝袋後所列嘅成份，除有栗子、三色藜麥（紅、白、黑），仲有蓮子、紅棗、綠豆，非常健康，愛好健康人士不二之選。

打開糉葉，見到隻糉混和唔少藜麥，再切開，原來除原粒栗子，仲有栗子蓉，所以，整隻糉嘅味道喺屬於甜糉，我就OK，老婆就話唔太啱佢口味，覺得唔夾，而且，啲蓮子仲喺硬硬哋，唔鬆化，喺啲栗子蓉好香滑。

金腿瑤柱嘉湖糉 $80

跟上面隻素糉相比，加入五花腩、金華火腿、瑤柱、鹹蛋黃，仲有醬油、紹酒嚟做嘅呢隻嘉湖糉就好唔同，單喺外觀，色澤深沉，就已經覺得味道喺不一樣啦。

以醬油泡浸過啲糯米，所以，入口啲糯米香綿黏糯之外，就特別香濃惹味；而糉內填滿金華火腿同瑤柱絲，更加鹹香好食，我哋兩公婆對佢嘅評分都好高。

一款素糉，一款肉糉，唔知你又會喜歡邊一類呢？「糉」有啱你心水嘅。

個人評分
味道：7/10
環境：7/10
服務：8/10
抵食：7/10
平均每人消費：HK$70

餐廳資料：
奇華餅家 Kee Wah Bakery
葵涌葵昌路51-53號九龍貿易中心2樓201號舖
2654 9700