Grill：成績Grill人

是夜只喺同朋友有交收兼短聚，所以，搵個地方吹吓水、食吓嘢。雖然唔當正餐，但又想食得特別少少，朋友就相中中環嘅「Grill」，中環區就晒我啦，食串燒，唔錯喎，平時都好少食。收工即過嚟，5分鐘內就到。

雖然返中環工，但好少走入和安里，「Grill」正正位處街口，一上蘭桂芳就見。原來佢喺雙連鋪，一邊「Grill」賣串燒，另一邊「Thainan Chicken」賣泰國嘢。裡面有少量堂座，裝修簡潔時尚，誇張嘅人物壁畫，喺搶眼球嘅焦點。而所有座位都喺高腳櫈，且有少少逼，嚟食嘢就要有少堂心理準備。

先到收銀櫃枱落單，再由店員送上，餐廳兩版紙顯示晒出嚟，一版喺各款串燒，另一版喺多款泰式美食及飲品，無加一。

柚子海鮮沙律 $68

因為主打嚟食串燒，所以，食串燒前先搵啲清爽嘢打底，柚子沙律喺小弟心水。個沙律好抵食，除咗堆到滿滿夠大份之外，海鮮料無欺場，有大蝦、墨魚仔、蜆肉，啲海鮮大隻又新鮮，蝦肉非常爽口，墨魚仔好柔韌。墊底嘅喺柚子肉、 青木瓜絲 、甘筍絲及腰果，份量十足，柚肉爽甜爆汁，青木瓜絲特別酸爽，單以魚露及醋調味就夠晒。

Somersby Apple Cider $25

食串燒配凍飲先夠爽，飲品有酒精類及非酒精類，唔太飲得酒嘅，「蘋果仙地」就喺最好不過，酒精度低，冰涼爽口，帶蘋果香，極易入口。

San Pellegrino $20 

嚟自意大利利血橙果汁，幾年前已晌銅鑼灣嘅Amina² Cuisine遇見過，但講到有最多口味選擇時，想返起又一城嘅2/3 Dolci，足有4款供選擇。血橙口味（Aranciata）喺叫我想試嘅原因，色澤較一般橙汁略帶鮮紅，飲落橙味較清甜，感覺自然。好多餐廳都賣到四十幾蚊支，依度只賣$20，有興趣不妨一試。

跟住就嘆串燒，未講食物，順帶講講鋪面，閃亮搶眼嘅招牌，加上富動感嘅火焰效果，確喺幾吸晴。

而隔住大玻璃，睇到師傅不停咁燒，不停翻弄啲串燒，務求燒得靚仔又焦香。而串燒均以紙袋袋住，堂食，拎住晌街食都得。所有串燒都有配唔同嘅汁，除非你特別要求，否則都喺按「官方」嘅配搭。

魷魚鬚 $25

一串串住好多魷魚鬚，燒得焦香，配上泰式甜酸醬（因為我唔食辣），惹味得嚟又有啲甜酸味吊吓。而啲魷魚鬚好軟腍，咬落又帶點柔韌，不俗。

白鱔 $60

是夜最貴嘅串燒，一客叉住4件，睇起嚟以為燒燶，其實唔喺，喺灑咗好多香茅碎去醃，所以，入口甚有香茅嘅香味，而白鱔本身極之油潤，肉質柔滑細緻，外皮帶點脆口，唯一挑剔喺有啲偏鹹。

豬頸肉 $20

比預期中少，因為啲豬頸肉喺薄切，一客只得4件，但口感又確喺幾脆口，火候又剛好，微微焦香，亦唔會燒到太乾身。

菠蘿 $20 x 2

燒菠蘿作飯後果又得，作為甜品都得，簡單灑咗少少沙糖燒，令表面有微微焦脆嘅效果；而啲菠蘿一睇就知喺新鮮貨，鮮甜多汁，切得夠晒大粒，食得夠爽，又點可以唔翻兜多一串呢！

食正蘭桂芳有好多人嚟飲酒，佢哋可能會買外賣食吓串燒，同時又供應飯品，而堂座又方便啲嚟當食正餐嘅客人，部份串燒定價又唔貴，無怪乎客人源源不絕，晌網上睇到有唔少好評，成績驕人啦！

個人評分
味道：8/10
環境：6/10
服務：7/10
抵食：8/10
平均每人消費：HK$130

餐廳資料：
Grill
中環蘭桂坊德己立街17-19號地下
2530 1022