豊洲水産海鮮丼専門店 Toyosu Suisan：丼之無愧

食海產幾時都喺以新鮮貨為重點，「海鮮批發」、「新鮮直送」，喺咪提升咗對一店源嘅信心呢！去年尾嚟自東京築地市場嘅海鮮批發商「豊洲水産」正式晌香港灣仔插旗，打住首間海外直營海鮮丼專門店，咁嘅背景已令人感到有一定嘅保證。過多幾個月就已經晌九龍區油麻地開分店，小弟就未去過東京，但久唔久就有食海鮮丼嘅傻勁，趁老婆今日有事無時間煮飯，就一於出去食撐撐枱腳。

甫入店，最搶鏡就應該喺右邊嘅吧枱，大大張設計和風味濃嘅大漁旗幟，色彩鮮明，喺吸晴焦點。

香港人一向貪新鮮，凡有新店就會一窩蜂跑去試，所以，避免排餐懞我都甚少專登晌新店開檔初期去試。事隔大半年先嚟，仍見近乎座無虛席，丼飯晌香港始終大有市場。

整體以木系為建築風格，配以柔和燈光，帶有暖和感，天花上嘅「魚骨」尖頂，似漁船嘅骨架，地方亦頗闊落。座位方面，二、四人座之外，仲有啲配布簾嘅小包廂，加添多幾分私隱。

日本人做事一向認真、細心，睇睇張櫈，櫈下另設計多一層供客人擺袋或其他個人物品！ 

日本人做嘢一向都有好多堅持，而「豊洲水産」都喺，對鮮度嘅堅持，對食材嘅堅持，對自家製嘅堅持，所以，要細嚐每一道菜式先喺佢哋嘅尊重。

既然以「海鮮丼專門店」自居，海鮮丼就絕對喺主打，翻開餐牌，真喺有好多選擇，此外，仲有唔少非海產定食，所以，唔食得海產嘅朋友都有選擇，有咩款式就唔講，自行睇睇餐牌。平嘅百令蚊有交易，貴嘅去到三百幾都有，總之，豐儉由人。由於水產來源都喺由築地市場本店直送，價錢相對平啲，重點喺質素更有保證。

此外，有一頁嘅海鮮丼飯組合好得意，可以講喺「車仔」丼，因為丼底再自行從13款海產選配3種或以上嘅海產，輕鬆組合出個人心水丼。

不過，都想特別一提，佢哋原條日本飛天鮪魚空運過嚟，可以試到唔同刁鑽位，而餐牌亦有一專頁介紹，用唔同位置做出唔同菜式，成為餐牌中嘅亮點。

丼飯、定食之外，更有唔少一品料理供選擇，蛋卷、串燒、天婦羅、炸物、刺身……等等，多達30款，不愁搵唔到啱食嘅嘢。

飲品方面，比預期中多嘢揀，一系列嘅鮮果汁乳酪特飲，另一面喺果汁、汽水、啤酒……等等，兼且有兩款甜品供應添，所以，嚟到唔喺單單食海鮮丼咁簡單。

之前睇過啲介紹，話佢哋嘅煎蛋卷頗有名氣，所以，嚟之前都有打算點一客試試。煎蛋卷共有4款口味：三文魚、明太子、芝士松葉蟹肉及鰻魚。

自家製鰻魚蛋卷 $48

一客有3件，蛋卷入口帶微甜而滿有蛋香，煎得鬆軟唔死實，口感確喺幾好，而捲住嘅鰻魚好香軟，一口過咁食，鰻魚嘅油香滲入蛋中，更感滋味。

北海道響螺松葉蟹甜蝦丼 $208

食海鮮丼除咗想一次過品嚐到多款海產之外，小弟就最常點包含有蟹肉成份嘅海鮮丼，鍾意食蟹但嫌拆蟹煩，點蟹丼就最好不過，唔使郁手坐享其成。年初晌「Moshi Moshi」點嘅「蟹霸丼」，年中去咗「うまい鮨勘」試嘅「函館丼」，今回嚟到「豊洲水産」，「北海道響螺松葉蟹甜蝦丼」近乎成為小弟嘅不二之選。

個丼飯好豐富呀，北海道響螺肉、松葉蟹棒、松葉蟹肉，黃金魚籽、甜蝦、黑鮪魚腩蓉……等等鋪滿成個飯面，仲疊到高一高，誇張啲講餸料多過飯，視覺立體感強，睇落去啲海產又好有光澤，喺新鮮度嘅表徵，賣$208真喺抵食。

北海道響螺肉

唔喺得三幾片，而喺有一大堆，雖然切得較細片，但口感柔韌有咬口，帶微微鹹香嘅螺肉味。

松葉蟹棒

一共有4件蟹棒，件件都拆得好完整，一口一件，夠晒爽呀，蟹棒極有蟹肉嘅鮮甜味，鮮度感爆燈。

黃魚籽

黑魚籽都食過好幾次，黃色就較少食，外觀晶瑩閃閃，令整碗丼搶唔少分，味道唔太鹹，撈埋啲飯一齊食，脆卜卜，提升口感趣味。

松葉蟹肉

食完蟹棒未夠喉，黃魚籽下面仲有一大球蟹肉，絲絲蟹肉絕無欺場，味道同樣鮮甜；用嚟搵紫菜包成手卷，飯粒黏糯軟綿，紫菜脆口十足，一樣好食到不得了。

黑鮪魚腩蓉

雖然餐牌無講呢款丼有鮪魚成份，原來亦加入一小撮黑鮪魚腩蓉，口感綿柔，軟軟滑滑。

甜蝦

啲甜蝦都好正，老套啲講，甜得嚟蝦味濃，有點黏黏滑滑，肉質卻有份爽口嘅感覺。試過後，款款海產都的確喺有質素。

火炙海鮮丼 $248

老婆就唔太想一次過食太多生冷嘢，所以，揀咗一碗火炙海鮮丼，海產包括黑鮪、三文魚、帆立貝、鰈魚邊、三文魚籽，睇見個彈容都流口水呀。

落單後無耐，海鮮丼送嚟，份量一樣十足，一片又一片刺身經過火炙，疊住圍晌啲飯上，排列工整。仲伴了薑蓉及一件青檸角嚟提鮮，加上三文魚籽晶瑩剔透，令色澤對比鮮明，賣相非常吸引。

黑鮪

老實講，小弟又未叻到識細分啲黑鮪同三文嘅分別，不過，就算炙燒過，亦擋唔住其油香。

三文魚

唔使多介紹，香港人不知食幾多，入口油潤，夠晒新鮮；而其他嘅海產，如帆立貝、鰈魚邊、三文魚籽，同樣具質素。

味噌湯

每客海鮮丼均附送味噌湯，而且，非常大碗，一般食啲定食，個「例湯」都喺細細碗，呢度嘅份量應等同兩倍有多。味噌湯特意加入魚肉熬製，感覺多咗一份鮮甜，此外，麵豉味亦夠濃香，誠意之作。

不愧為過江龍築地水產店，海鮮水產確喺高質素，以海鮮丼而言，俾到咁嘅份量，確喺抵食。而且，環境舒適，人手比例足，我哋無點飲品，但不時為我哋添茶，招呼的確唔錯。

個人評分
味道：9/10
環境：8/10
服務：8/10
抵食：8/10
平均每人消費：HK$260

餐廳資料：
豊洲水産海鮮丼専門店 Toyosu Suisan
油麻地彌敦道558-560號譽發廣場1樓
2869 6289