幾家金滿庭都光顧過，呢家鑽石山店算最細，一入門口整個大堂都睇晒，而我哋所訂嘅房晌大堂最埋一角，雖然話喺房，其實喺開放形式，數條柱隔住，內外視線通透。個房基本喺坐12人，我哋有大有細一共14位，難免有少少逼。
間間金滿庭嘅生意都幾火紅，訂枱喺常識，而晚市間間分店更分兩節，我哋有小朋友當然唔好食咁夜啦，所以，揀第一節（5:45-8:15pm），最低消費$2,000。
另外，中式酒家嘅慣常雜費，茶水巾芥$8位，餐前小食$20碟，我哋14人收4碟錢。下面仲有一段文字，大意喺叫啲客咪擅自拎走個餐牌，如欣賞據為己有，每本$500，真喺會有人偷走個餐牌？
不過，呢度提供嘅茗茶有少少特別，唔喺一般慣常嘅壽眉、水仙，而喺人參烏龍、野生大葉普洱及玄米茶，第一次試人參烏龍，無咩苦味喎，反而甘中帶微甜。
菜式分類為冷盤、熱炒、招牌烤鴨、海產、蔬菜、豆腐、湯羹、飯麵、包點、甜品等多項，少部份圖文並茂，當中亦有唔少人氣菜式推介。
另有一張「廚師推介」餐牌，背後就喺金滿庭嘅十大名菜。
餐前小食 $20碟
小食唔喺啲花生、菜脯，有芝麻合桃、酸辣青瓜、醉雞，味道唔錯，甜酸辣香，味道各有不同。晌等大家期間，食吓小食，刨吓餐牌。
四喜烤夫 $68
佢哋有個五福臨門大拼盤，可以揀5款冷盤，但唔喺全部都揀得，所以，索性散點4款。烤夫特別討歡心，烤夫綿腍，雲耳爽脆，仲有啲花生同金針，味道簡單，卻有益有營養。
老北京醬蹄 $68
一客薄切成十多片，好適合多人共享易分嘅冷盤，片片厚薄均一，外觀望落去似似哋分蹄，又似似哋牛展，入口軟腍卻有咬口。
豆腐三文治 $70
幾有趣嘅一道冷盤，以三層滑豆腐夾住肉鬆、蔥粒、醃菜，啲豆腐非常嫩滑而有豆香，而夾雜着唔同嘅食材令味道多層次。
山東手撕雞 $108
燒雞撕成碎條，又喺另一道好適合人多共享嘅冷盤，雞絲食起嚟肉質細嫩，沾點醬汁多添幾分惹味。
榨菜肉末 $108
本身每份榨菜肉末跟一客叉子燒餅，我哋人多就額外點多兩份燒餅（每份$36）。簡單嚟講就喺榨菜炒免治豬肉，放入燒餅一齊食，燒餅香脆，肉末濃香，夾埋一齊就喺滋味。
糖醋魚塊 $116
賣相就唔多靚仔，黑黑沉沉，但啲魚塊炸得外脆內嫩，層脆漿無過厚嘅問題，而個糖醋汁我就覺得調校得幾好，酸香微甜唔會有嗆喉感。
紅燒元蹄 $248
我哋呢班舊同學年紀有番咁上下，患膽固醇自然相對高啲，所以，今晚夠人多就放肆啲點依道菜，正所謂人多好辦事，叫做大家攤分個「風險」囉。買相做得不俗，落刀已感到肉質嘅鬆化感，入口脂盈甘香，肉質軟腍，唯啲脂肪未做到即化嘅感覺，仍帶有少少油膩感。但只賣二百零咁大份，已好抵食。
百頁小棠菜 $86
一道紅燒元蹄，當然要搵番啲蔬菜嚟降番低啲風險，所以，一口氣點3道蔬菜。先嚟比較清淡嘅百頁小棠菜，啲百頁比較碎濕濕，但味道算OK嘅。
燒汁釀茄子 $92
似喺新派少少嘅菜式，茄子燒得軟化味濃，並伴有唔少蜜糖豆、鮮百合做配菜，不過，茄子短短得一條，實在唔多夠分，每人只喺一啖仔。
紫心蕃薯浸莧菜 $92
雖然被列為十大名菜，但點都睇唔出有幾十大。然而，本身啲食材喺幾唔錯嘅，紫心蕃薯粉香有蕃薯味，莧菜入口清爽，不過啲賣相跟餐牌就差天拱地嘢。
肉絲兩面黃 $106
怕大家唔飽，最後嚟兩道炒粉飯麵喺正路嘅選擇。雖然啲肉絲冚晒上面，但隱若都睇到個兩面黃煎先點，咬落脆口但感覺未夠甘香，有人就覺得肉絲分開上會好啲，唔怕浸腍啲麵條。
傻佬炒飯 $128
傻佬炒飯一啲都唔傻佬，小弟覺得可以講喺豉油皇炒飯，搵豉油炒過寧舍香，飯粒分明又爽身，飯內混有鮮蝦、肉粒、蔥粒、粟米粒，仲灑咗啲肉鬆，令個炒飯豐富好食。
高力豆沙 $18 /個
呢度啲高力豆沙一向有水準，所以，甜品時間點都要叫啲。每個高加豆沙都好大個，外皮鬆鬆軟軟，內裡豆沙蓉填得滿滿，清甜不膩，又加入香蕉肉，正呀。唯一挑剔就梗喺糝糖霜可以做得靚仔啲，唔使咁隨便。
豆沙窩餅 $62
另一道滬式嘅經典甜品，再者，炸嘢一向有客路，點咗一定有人食。上枱趁熱食，窩餅炸得香脆，豆沙清甜起沙，水準依然。
杞子蘆薈桂花糕 $48
因為一大棚人，甜品都喺搵啲易分享嘅選擇，桂花糕就喺其一，一客9件，仲可以軋細一半，今次嘅桂花糕比較硬身少少，但滿滿桂花香及蘆薈帶嚟嘅口感，入口冰涼清爽。
黃金棗蓉 $46（圖為兩客份量）
其實即喺煎堆仔，不過，以棗蓉為餡。外皮沾滿芝麻，以所好有芝麻香，口感軟糯，而咬開喺填滿晒紅棗蓉，棗味超澎湃突出，鍾意棗味嘅朋友真喺唔可以錯過。
今晚女多男少，加埋又有細路，所以，消費唔高。既然喺廿幾年嘅舊同學聚餐，席間自不然有好多「當年今日」嘅話題，當中充滿歡笑聲，但最開心都喺睇到大家仲健健康康，行得走得，食得玩得。
個人評分
味道：8/10
環境：7/10
服務：7/10
抵食：8/10
平均每人消費：HK$140
味道：8/10
環境：7/10
服務：7/10
抵食：8/10
平均每人消費：HK$140
餐廳資料：
金滿庭京川滬菜館 Modern China Restaurant
鑽石山龍蟠街3號荷里活廣場3樓312A舖
2697 3033
金滿庭京川滬菜館 Modern China Restaurant
鑽石山龍蟠街3號荷里活廣場3樓312A舖
2697 3033
沒有留言:
發佈留言