山區裡的走走趯趯: Ciao Chow - Italian Cafeteria：輕型煮意

2017年11月26日星期日

Ciao Chow - Italian Cafeteria：輕型煮意

舊年年初，曾經到訪過中環嘅Ciao Chow食午餐當開年飯，試過啲意式凍肉拼盤、薄餅、甜點，知道其水準有幾高。最近，先聽聞晌又一城開咗新副線，名字無變，但形式走得更年輕化，定價比中環店便宜一截，無理由咁就腳唔去試試嘛！

又一城喺小弟覺得最唔好行嘅大商場之一，皆因扶手電梯左穿右插，行得好唔順。而餐廳位處溜冰場隔離，咁就變得好易搵，而環境採半開放形式，所以，晌鋪外已見到大部分餐廳環境。裝修走悠閒路線，配以柔和嘅燈光，讓人感到份外輕鬆。

我哋被安排坐晌較入嘅梳化位，感覺更舒服，而且，啱啱好對住個開放式廚房，睇到晒廚師做薄餅嘅情況，而牆邊嘅巨型大烤爐，令人對其薄餅充滿萬分期待。

仲記得佢哋中環店前菜、小食有超多選擇，嚟到又一城店，明顯地方所限，選擇就無咁多，前菜與沙律夾埋就只有11款，但定價感覺就平一、兩乘。

意粉及薄餅喺依度嘅主打食物，兩者都有「個人特色意粉DIY」之選，不過，好似我哋咁唔想諗，仲有11款預設意粉，分為蕃茄醬系、忌廉系及橄欖油系，定價都喺$68-$88，不過，份量我就覺得僅為女生嘅一人份量，大食啲嘅人應該唔喺好夠。

薄餅方面，除「個人自選」之外，同樣有11款預設薄餅，一樣分為3大系列：蕃茄醬系、橄欖油系及羅勒醬系，定價亦唔貴，都喺$68-$88，劃一呎吋，無厚薄之分。

意大利甜品向來都有特色，所以，店家亦有提供4款甜品。無論前菜、意粉、薄餅，抑或甜品，每款菜式都附設圖片作參考，難得跟上枱嘅成品唔會相差太遠。

最後，梗喺順道介紹埋飲品啦，唔多嘥氣抄一次，自行睇睇以下飲品餐牌。

上文都講過呢度走年輕路線，所以，點餐喺剔紙仔，兼自己出去櫃位落單，取號碼牌後就由店員奉上食物，好處咪就喺唔收加一服務費囉！

Affettati Misti $78

單睇啲意大利文唔識佢喺乜，其實就喺意式凍肉拼盤，由近至遠分別喺意大利煙燻火腿（Prosciutto Cotto）、意大利煙肉（Pancatta Coppata）、拿坡里莎樂美腸（Salame Napoli），每款均有多片，仲伴兩小件口感煙韌嘅烤麵包，呢個價抵食喎。煙燻火腿似一般凍切腸，但有一朕鹹鮮味；煙肉有啲似巴馬火腿，但質感唔差得過佢，一樣油潤鹹香；莎樂美腸微甜味而帶少少辣香。

Arugula $54

點得凍肉拼盤都知喺脂肪稍高嘅食物，所以，食得平衡啲，就一次過點兩客沙律，先嚟嘅喺以火箭菜、菊苣、巴馬臣芝士、車厘茄配意大利油醋汁嘅「Arugula」，淋上油醋，火箭菜食起嚟苦中散發出酸香，啲食材都食得出唔馬虎，尤其啲巴馬臣，原件刨出嚟，唔喺一般嘅芝士碎。

Kale $52

用羽衣甘藍做沙律，坊間少見，上一次晌中環店食過，所以，特別推仲俾友人試試。除羽衣甘藍，仲加有松子仁碎、麵包粒，並拌入香蒜蜜糖汁。羽衣甘藍入口清爽得咬落嗦嗦聲，松子仁碎及麵包粒加添口感嘅變化，醬汁輕盈而味道突出，整體喺一道好有個性嘅沙律。

Funghi Selvatici $70

意粉方面，選上忌廉系及橄欖油系各一款，先試試個雜菌闊條麵。雖然簡單，但做得唔錯，啲麵條好有韌性，且富蛋香，忌廉汁底香滑又掛汁，帶輕微菌香，喺一道健康嘅意大利麵。

Spaghetti Alla Pescatora $88

另一道海鮮意大利粉有青口、海蝦、魷魚、車厘茄，賣相幾有睇頭，海蝦質素唔錯，爽口無雪味，魷魚柔韌唔會韌到好似擦紙膠咁咬唔開，並以橄欖油、蒜頭炒製，味道比較輕盈。

Grilled Veg $72

蕃茄醬系嘅薄餅食得多，所以，就刻意揀呢款羅勒醬系，餅面一望就見鋪滿羅勒醬、烤茄子、意大利青瓜、南瓜片，再糝上少少巴馬臣芝士，入口好有一股香草味，雖然所有材料都喺素，但味道唔會太寡，當然唔及上次晌中環店所試嘅全肉「Italian Butcher 」咁濃香啦。餅底屬薄底，但又唔喺「餅乾」底，咬落軟熟，有點韌勁。