香港好多食肆通常星期五、六、日因旺丁所以都會設分段時間，但估唔到呢度星期一至日都會分兩輪，頭輪6:00pm-7:45pm， 第二輪則8:15pm-10:00pm。今日只喺星期四，估唔到第二輪都咁多客，相信同我哋一樣，自助餐主題「即開生蠔‧蟹‧海鮮自助晚餐」折實三嚿水唔使就有即開生蠔、多款凍蟹嘅自助晚餐食，覺得值搏率高。
食物區集中晒晌一處，唔使四圍搵，不過，明顯較其他高星級嘅餐廳食物嘅種類為少，之但喺，由沙律、冷盤、即開生蠔、凍海鮮、魚生、壽司、天婦羅、芝士盤、餐湯、熱盤、烤肉、即煮粉麵、甜品、雪糕、生果、自助啡茶……算應有盡有。
平常食開自助晚餐，唔喺預3個鐘，都有兩個半小時，所以，好老實，1小時45分鐘食個自助餐，比平時兩小時任食放題仲要短啲，加上要自己出去拎，故此，當然要改改戰略，就喺今晚影相平比時少，亦未能夠記低咁多菜式名稱。因此，今晚嘅自助餐食評就唔及以往嘅咗詳盡俾大家參考喇，哈哈！
沙律
唔好怪我老套，頭盤一定喺沙律，食咗真喺可以開胃好多，呢度嘅沙律菜、配料款式、醬汁算喺多，放滿成枱，仲有數款預製式沙律。你見我碟沙律都砌滿一大碟，專登挑啲紅菜頭、櫻桃蘿蔔、南瓜做配襯，更加健康好食。
西洋菜湯
依度無燉湯供應，只有中湯、西湯各一，前者喺西洋菜，老婆就鍾意中湯多啲，飲碗湯暖吓胃。
海鮮忌廉湯
略嫌中式普通啲，所以，今次只揀西湯，再加配點麵包同芝士。雖然個湯叫海鮮忌廉湯，但內裡海鮮唔多，少少蝦粒，還好口感幾滑溜。
海鮮拼盤
今晚為海鮮而嚟，當然，熱湯過後就喺食凍海鮮時段，即開生蠔共有4款，但除每次限攞兩隻外，亦無款式可以揀，視乎師傅分派緊咩款式，觀感所見，大多數時間都喺較細隻嘅愛爾蘭蠔。
而其他凍海鮮，仲有甜蝦、龍蝦仔、青口、蜆，亮點就更加落晌4款凍蟹：登格斯蟹、加菲蟹、麵包蟹及加拿大蟹腳，不過，補貨頗慢，除一開始影咗張「全家福」，之後，出幾次去都未見補足貨。
結果，盡量拎滿一碟啱食嘅，整體質素唔算好突出，但都算夠鮮味；啲蠔肉地比較薄，口感仲帶點爽脆，海水味唔太重，較適合初食蠔嘅朋友。
熱盤、烤肉
主要放晌開放式廚房一排熱窩之上，因為，今次影相有啲匆趕，所以，可能寫唔齊有咩熱盤，大概印象中包括：蒸魚、菜膽雞、燒豬肋骨、西班牙海鮮飯、燴牛尾、牛仔骨、花雕蛋白蒸蟹、德國式燴牛肉、咖喱炒蟹、燒雞扒、香煎龍脷柳、炒時蔬、燒豬頸肉、香草焗田螺、天多利三文魚、印度黃飯、燒牛柳及烤羊架……等多款。
今回嘅熱盤陣容在我嚟講唔算太吸引，所以，拎一回就夠晒啦，不過，小弟都稱得上喺食肉獸一名，所以，熱盤類絕大部嘢都喺肉類。最得我心喺支羊架、燴牛尾同啲田螺，幾樣都食得叫人滋味，相反，最失望喺啲燴牛肉，超韌呀！
甜品
時間過得好快，仲剩廿零分鐘就10點，要作最後衝刺，就喺殺入甜品區。晌開頭有影過甜品區嘅相，對比下，臨尾時段甜品已無補貨，未夠10點已收埋啲名牌準備收工咁，不過，甜品嘅種類算喺多，概略數一數都有超過廿款：藍莓芝士餅、紅豆布甸、綠茶布甸、檸檬柚子乳酪、榴槤卷蛋、雲石芝士餅、榛子泡芙、白朱古力士多啤梨蛋糕、檸檬撻、愛爾蘭脆脆、雜啤梨蛋白餅、意大利芝士餅、熱情果慕絲蛋糕、焦糖朱古力慕絲餅、法式燉蛋、麵包布甸、蘋果卷、朱古力噴泉、曲奇……等等。
結果揀咗當中8款甜品，以款式而言，唔喺好特別，但以質素而言，算喺水準平穩，中間杯檸檬柚子乳酪啲柚子味超強勁；左邊件焦糖朱古力慕絲餅喺最好食；隔離件檸檬撻亦不俗酸香嘅檸味好突出；意大利芝士餅亦做到柔滑有酒香。
Häagen-Dazs雪糕
成櫃HD雪糕，共有4-5款口味（旁邊掛住4款口味嘅牌喺唔準），應滿足到大家。
小弟隨意滔起3球喺朱古力、咖啡同雲呢嗱，再唧上芒果漿，HD嘅雪糕有番咗上下，軟滑富奶香，為今餐晚飯作結。
佢哋仲提供一個無限量添飲套餐，額外加$45就無限量添飲汽水同果汁，而額外加$220就多埋無限量添飲啤酒、餐酒及氣泡酒，不過，既然嚟得喺想食得平啲，又有自助啡茶、檸水……等供應，就大可以無需加錢飲汽水、果汁嘞！
綜合嚟講，質素只喺屬中間位高少少，補貨亦較慢，雖然招呼有禮，但收碟等服務都未太到位，感覺有人手不足嘅情況。不過，都喺等價交換嘅事情，正所謂一分錢一分貨，三百蚊唔使就生蠔、凍蟹，加埋咁多款食物，我都算收貨，平平哋過吓自助餐癮。如果你喺唔在乎銀兩，而喺想食高質素好嘢，咁「品坊」應該唔啱你喇！
個人評分
味道：6/10
環境：8/10
服務：7/10
抵食：7/10
平均每人消費：HK$280（5折優惠券）
味道：6/10
環境：8/10
服務：7/10
抵食：7/10
平均每人消費：HK$280（5折優惠券）
餐廳資料：
品坊 the SQUARE
佐敦彌敦道348號香港九龍諾富特酒店1樓
3965 8788
品坊 the SQUARE
佐敦彌敦道348號香港九龍諾富特酒店1樓
3965 8788
沒有留言:
發佈留言