巨人冰室：別巨一格

今個月嘅細胞小組活動喺行山，大家一齊晌太子食完午餐就出發，坐巴士上馬騮山，因為有小小小朋友同行，所以揀行鷹巢山自然教育徑最好不過，無乜難度之餘，輕輕鬆鬆兩個鐘左右行晒。至於食晏，就揀咗晌太子嘅巨人餐廳，其實無咩特別原因，只哋近上車個巴士站啫。

茶記一間改個「巨人」之名好似好搞笑，但入到去就真哋見到好多小巨人，一室都喺珍藏公仔模型，有鹹蛋超人、悟空、鐵甲萬能俠……等等，唔喺玩懷舊，認真別具一格。而餐廳環境四正企理，光猛整潔，闊落就一定唔會，但枱櫈編排就唔會好擠逼。

只不過，我哋一行13人想坐埋一齊，一字排開嘅3張方枱連成嘅長枱，坐埋就喺有啲勉強少少嘅，但一齊坐開心啲嘅，反正唔食好耐，無所謂啦。

基本餐牌攝晒晌玻璃枱面下，另有一個廚師推介餐牌，可睇為午餐，包飲品，所以，簡單啲就晌當中揀一款碟頭飯。由於我哋都太多人，所以，就唔寫朋友食嘅嘢，單講自己碟飯就算。

滑蛋蝦仁飯 $44

老婆唔喺太鍾意滑蛋蝦仁、粟米班塊之類茨汁滑潺潺嘅碟頭飯，所以，今日老婆有要事無同行，小弟就一於點個滑蛋蝦仁飯。茶記碟頭嘢，唔講賣相，最緊要質素，老實講，個滑蛋蝦仁真喺做得唔錯，個汁底滑溜，滑蛋又唔少，蝦仁夠大隻又爽口。

熱奶茶（跟餐）

奶茶喺小弟去茶記嘅必然之選，依度嘅奶茶亦都唔錯，聞落幾香，入口茶底醇厚，口感夠絲滑。

茶記一向予人嘅服務都喺麻麻，不過，今日晌「巨人」嘅感覺又唔差喎，你知啦一大棚人點餐，混亂難免，當中幾個都要麵餐，又炒蛋、又煎蛋、又太陽蛋，其他嘢又改嚟改去，落單嘅哥仔夠晒耐性，無話粗聲、黑面嚟招呼我哋，唯一喺入座時安排有少少亂。

個人評分
味道：7/10
環境：6/10
服務：8/10
抵食：8/10
平均每人消費：HK$44

餐廳資料：
巨人冰室
太子彌敦道761號地下2-3號舖
2885 2478