而一室亮白，裝修走簡約路線，最花巧喺入面牆上富中國色彩嘅通花木架，擺咗好多小盆栽及陳年茶餅。座位唔多，正常餐枱亦唔多，我哋又唔想坐高腳枱，所以，要等張4人枱都要等好一陣子。而且，坐滿人嘅時間，感覺喺有點逼。
餐牌面已標明「茶、素食、甜品」，定位清晰。
咁餐廳嘅名字「2DP」又何解呢？2DP即喺2 Decimal Places，兩個小數位，取其精準化、標準化、現代化之意。引入中國名山高品質茶葉，以傳統結果現代方式沖泡一杯優質茶飲，誠意所在，不過，相信限於茶飲吧！
翻一翻餐牌，其實都好簡單，頭兩版就喺各款飲品，包括傳統嘅手沖 / 冷泡純茶系列、富特色賣點嘅調茶系列、以茶代啡嘅拿鐵系列；
再下兩頁餐牌就喺食品，包括11款前菜及14款主菜，最欣賞喺每道菜列明有無蛋、奶、五辛、堅果……成份，方便真正茹素嘅食客，並且頁底寫明搵埋註冊營養師專業制訂；
最後兩頁喺甜品及食材介紹，而甜品有刨冰系列、養生系列、小芭菲系列及特色茶系列，甜品嘅選擇頗多。晌櫃面落單後，就會由店員把食物送上，唔收服務費。
墨西哥粟米片配牛油果醬及蕃茄莎莎 $54
叫個墨西哥粟米片喺友人嘅主意，粟米片喺現成貨就唔使多講，牛油果醬好軟滑，最鍾意喺撈埋酸忌廉一齊食，啲蕃茄莎莎比平時食嘅有少許唔同，帶點辣勁，好醒神。
海葡萄無花果沙律 $76
日本嘅海葡萄雖然唔喺咩稀有食材，但唔喺咁多餐廳有賣，加埋老婆至鍾意嘅無花果，所以，呢款沙律啱晒佢。沙律十分新鮮爽脆，淋上醋汁，但㗳落仲有啲菠蘿嘅香味，似乎加咗少少菠蘿汁；海葡萄喺啲藻類，無乜味，但卜卜脆，無花果好清甜，仲灑上點點蔾麥，好味兼好健康嘅一道沙律。
香辣咖喱海鮮意粉 $76
呢道菜喺招牌推介菜式之一，自然會帶有期望。除咗有少少菇菌、雜椒，睇見海鮮喺以素蝦為主，口感幾爽彈，都幾像真；意粉煮得咬口，個汁底亦幾香咖喱味，但個咖喱味稍為單薄啲，即喺無乜層次，唔及印度咖喱般帶唔同香料嘅層次，而較大問題喺汁底比較稀，令啲意粉唔喺好掛汁。
經典素肉醬意粉 $72
另一款招牌推介，「經典」一詞喺在於肉醬意粉喺意大利麵中嘅經典，但喺「2DP」嘅出品就唔屬經典，唔知喺咪素肉嘅關係，個肉醬真喺唔太香濃，當然，食開素嘅人士感覺可能唔同，所以，喜歡濃味嘅朋友依道意粉應該唔太滿足到你。之前都講過佢哋啲汁底偏稀，呢道意粉表露無遺，食完啲意粉個汁底可以當湯飲。
黑松露雜菌闊條蛋麵 $76
雖然唔喺推介，但覺得比海鮮意粉及肉醬意粉為好，一送到嚟，黑松露香極之突出，食一口，充滿黑松露嘅味道，而且，混有好多雜菌，個人本身鍾意真哋素嘅食材多過扮素嘅「海鮮」同「肉醬」，唯一挑剔喺啲闊條蛋麵，有蛋香，卻哋質感有啲散散哋，一咬就斷，唔喺嗰種柔韌嘅咬口感。此外，佢哋每款意大利麵，都伴有一件香草法包，雖然焗得脆口，但有啲乾，好似食餅乾好過喺一件法包咁。
百年古樹月光白茶 $48
老婆見佢餐牌嘅介紹喺咁寫「以300年以上古樹，全人手製作而成，不經殺青或揉捻。」講到真喺好勁咁，不過，老婆話味道真喺無咩個性，小弟試咗兩啖，都只可以講唔識點欣賞古樹靚茶囉。賣到近50蚊一杯，仲要以紙杯呈上，唔環保，觀感又大打折扣，唯一自我安慰，就喺佢喺自然界最高抗氧化植物之一，比一般綠茶高出3倍，但偶然嚟飲一杯，相信無乜成效吧！
熱情果檸檬茶 $38
之前介紹餐牌時，提到飲品有一組調茶系列，當中再細分茶底為鐵觀音、古樹白茶、古樹紅茶，而友人呢杯「檸茶」喺屬於白茶底，加入熱情果肉及檸檬片，佢話味道真喺唔錯，酸香得嚟唔會過酸，好清爽，但真喺唔使落到近成半杯冰咁多囉。
古樹紅茶拿鐵 $42
去茶記我就首選奶茶，去咖啡店首選喺拿鐵，呢杯算唔算喺一次過滿足「兩個」期望！其實，叫拿鐵只不過喺以奶泡撞紅茶，並無咖啡成份。拉花欠奉，口感唔均勻，都喺撞奶泡嘅手勢問題，唯一喺茶底幾夠香，但餐牌就無特別介紹呢隻古樹紅茶有咩功效喇！
雪蓮．鐵觀音小芭菲 $66
友人對甜品唔好，所以，只喺我倆公婆點咗一客甜品試試。有雪蓮，有桃膠，再配上鐵觀音意大利雪糕及新鮮雜莓，依一款相信既好食，又養顏嘅甜品啱晒老婆。雪糕嘅茶味非常突出，而且，有奶香，質感黏滑，面頭嘅雪蓮，食落似似哋椰果，有抗衰老及增強免疫力之效，而琥珀色嘅桃膠喺天然樹脂，最正喺清血降脂。不過，底下墊滿「淨」刨冰，如果，淋啲雜莓汁會好好多囉，食到尾，啲冰結到一嚿嚿，又硬又無味。
近年，不斷有餐廳進駐入厚福街，越開越多，有地鋪，有上樓，漸漸自我形成一條有名氣嘅食街。香港地咩都有得食，所以，香港人真喺好有口福，而且，不時有新餐廳登場，確喺「厚」福無窮。可惜，本來對「2DP」滿有期望嘅，但幾道主菜、啲茶飲及甜品，都只可以講喺一般般，同埋，呢道啲份量都偏細，招呼就還可以啦。
個人評分
味道：7/10
環境：7/10
服務：6/10
抵食：7/10
平均每人消費：HK$140
味道：7/10
環境：7/10
服務：6/10
抵食：7/10
平均每人消費：HK$140
餐廳資料：
2DP
尖沙咀厚福街12至12號A藍馬商業大廈地下
3705 9590
2DP
尖沙咀厚福街12至12號A藍馬商業大廈地下
3705 9590
沒有留言:
發佈留言